Lewitiki 24 - MUKANDA WA MYIDI MUKULU

Bitekedi bia miendu bia mu nzubu wa Mvidi Mukulu

¹ Maweja-Nangila kuambila Moshe ne:

² “Utumine bena Izrayele diyi bakutuadile mafuta mimpe a tumuma tua olive, bua kutemesha nawu miendu dilolu dionsu.

³ Arone ateke kapia aku mu ntenta wa kusambakena, kumpala kua tshilamba tshidi tshijika mushete wa ndondu. Kapia aku, nekashale katema butuku bujima, kumpala kua Maweja-Nangila. Bena Izrayele ne ndelanganyi yabu yonsu nebalame mukenji ewu kashidi.

⁴ Arone neateke miendu pa tshitekelu tshienza ne tshiamu tshia mpawungi nkayatshi, bua kapia kikale katema kumpala kuanyi meme Maweja-Nangila butuku bujima.

Mampa malambula Mvidi Mukulu

⁵ “Wangate bukula, wenze mikata dikumi ne ibidi, mukata onsu wikale ne bujitu bua kilo isambombu.

⁶ Uyiteke pa mesa menza ne tshiamu tshia mpawungi nkayatshi, adi kumpala kuanyi meme, Maweja-Nangila. Mikata ayi, ikale miteka mu milongu ibidi. Mulongu onsu wikale ne mikata isambombu.

⁷ Wele musenga wa kamonya muimpe pa mulongu onsu. Pashishe oshe musenga wa kamonya awu bua kuulambula Maweja-Nangila pa mutu pa mampa, bu tshivulukilu.

⁸ “Tshibidilu etshi netshishale mu bena Izrayele bua bikale bangoshila mikata ya nanku dituku dionsu dia Dikisha.

⁹ Arone ne bana bende ba balume nebangate mikata ayi, bua kuyidila pa muaba kampande wa tshijila. Kadi mikata ayi idi amu ya Arone ne bana bende ba balume, bualu idi ya tshijila menemene, ivuabu bamane kundambula meme, Maweja-Nangila. Mikata ayi idi yabu bua kashidi.”

Dinyoka dia muntu udi upetula Mvidi Mukulu

¹⁰ Mu mitanda ya bena Izrayele, muvua nsongalume wa bena Ejipitu, muikale muipu wa bena Izrayele.

¹¹ Dina dia mamuende divua Shelomite, muana wa Dibri, wa mu tshisamba tshia Dane. Nsongalume awu kuluangana ne muena Izrayele mukuabu. Kutuadijaye kupenda Mvidi Mukulu, usendeka dina diende. Diakamue bena Izrayele kumufunda kudi Moshe.

¹² Kumukuatabu bua Mvidi Mukulu nkayende akose tshilumbu tshiende.

¹³ Maweja-Nangila kuambila Moshe ne:

¹⁴ — Ipatayi muntu awu mu mitanda. Bantu bonsu bavua bumvua nuwuaye ungela nsenda, nebatenteke bianza biabu pa mutu pende. Pashishe bena Izrayele bonsu bamuase mabue, bamushipe.

¹⁵ Nenku wambila bena Izrayele mikenji eyi ne: “Padi muntu usendeka Mvidi Mukulu wende, udi udikebela tshilumbu.

¹⁶ Muntu yonsu udi usendeka dina dia Maweja-Nangila, bamushipe. Bena Izrayele bonsu bamuase mabue, bamushipe, nansha yeye muenyi, nansha yeye muena Izrayele, bualu mmuse-ndeke Mvidi Mukulu.

¹⁷ “Padi muntu ushipa mukuende, bamushipe pende.

¹⁸ Padi muntu ushipa tshimuna tshia mukuende, amupingajile tshimuna tshikuabu tshia muoyi.

¹⁹ “Padi muntu utapa mukuende mputa, bamutape pende mputa wa momumue.

²⁰ Muntu mutshibulangane, bamutshibule pende. Muntu mushipangane disu, bamushipe diende. Muntu mupolangane dinu, bamupole diende. Nebamuenzele bibi, bivuaye muenzele muntu mukuabu.

²¹ “Muntu udi ushipa tshimuna tshia bende, apingaje tshimuna tshikuabu. Muntu udi ushipa mukuende, bamushipe pende.

²² “Mikenji eyi idi bua bantu bonsu, nansha benyi, nansha bena Izrayele. Bualu meme ndi Maweja-Nangila Mvidi Mukulu wenu.”

²³ Moshe kuambila bena Izrayele mikenji eyi ya Maweja-Nangila. Bena Izrayele kumuka mu mitanda ne muntu uvua usendeka Mvidi Mukulu awu. Kumuasabu mabue, kumushipa, bu muvua Maweja-Nangila muambile Moshe.