Lewitiki 23 - MUKANDA WA MYIDI MUKULU

Matuku a bibilu bia bena Izrayele: dituku dia Dikisha

¹ Maweja-Nangila kuambila Moshe bua

² amanyishe bena Izrayele mikenji idi ilonda eyi ne: “Panudi nungenzela tshibilu, nuikale muaba umue bua kuntendelela, bilondeshile dilondangana dia matuku a bibilu, dindi mumane kujadika.

³ “Nuenze mudimu matuku asambombu, kadi dituku dia muanda mutekete dikale dituku dia Dikisha, dia tshijila. Nuikishe, nudisangishe bua kuntumbisha meme Maweja-Nangila, miaba yonsu inudi basombe. Kanuena ne bua kukuata mudimu dituku adi to.

⁴ “Matuku makuabu a bibilu anudi mua kudisangisha mua kuntumbisha adi nenku:

Tshibilu tshia Dipita dia Maweja-Nangila, ne tshia Mampa kaayi mela buanga

⁵ “Dilolu dia matuku dikumi ne anayi a ngondu wa kumpala, nuikale nungenzela ku tshidimu tshionsu tshibilu tshia Dipita dianyi meme Maweja-Nangila.

⁶ “Dituku dia dikumi ne ditanu dia ngondu awu, nuikale nungenzela tshibilu tshia Mampa kaayi mela buanga. Nudie mampa awu matuku muanda mutekete malondangane.

⁷ Dituku dia kumpala dia ku matuku awu muanda mutekete, kanuenji mudimu wenu wa tshibidilu to. Nudisangishe bua kuntendelela.

⁸ Ku dituku dionsu dia ku matuku awu muanda mutekete, nuikale nundambula mulambu wa kuosha. Kadi dituku dia muanda mutekete, kanuenji midimu yenu ya buatshiabuatshia to. Nudisangishe bua kuntendelela.”

Tshibilu tshia Biakudia bia tshianyi

⁹ Maweja-Nangila kuambila Moshe

¹⁰ bua amanyishe bena Izrayele mikenji idi ilonda eyi ne: “Panudi bamane kufika mu ditunga dindi munupe, nuye kudi mutuangaji ne biakudia bia tshianyi bia mu madimi enu binudi nunowa.

¹¹ Mutuangaji neabiele mulu, abinyukule kumpala kuanyi, dituku didi dilonda dia Dikisha, bua nupete diakalenga kundi.

¹² Anu dituku adi, nenundambule kabidi mulambu wa kuosha wa muana wa mukoku wa tshidimu tshimue, udi kauyi ne bulema.

¹³ Mulambu awu, nuulambule pamue ne mulambu wa kuosha wa bukula bua kilo isambombu, bunuvua basambakaje ne mafuta. Nenganyishe dipembu dia mupuya wa mulambu awu. Nundambule milambu ayi pamue ne litre wa maluvu umue ne tshitupa.

¹⁴ Nenku biakudia bia tshianyi bia mu madimi enu binudi nunowa abi: nansha mampa, nansha midioku mibishi, nansha miosha, kanuena mua kubidia, kanuyi banji kubindambula. Nulame mikenji eyi kashidi miaba yonsu inudi nusomba.

Tshibilu tshia Dinowa

¹⁵ “Nubadike mbingu muanda mutekete milondangane, bituadije dituku didi dilonda dia Dikisha, dinudi bandambula biakudia bia tshianyi bia mu madimi enu.

¹⁶ Nanku nubadike matuku makumi atanu too ne ku dituku didi dilonda dituku dia Dikisha dia musangu wa muanda mutekete. Dituku adi, nudi ne bua kundambula mulambu mukuabu wa biakudia binudi banowa mu madimi enu.

¹⁷ Nenuntuadile mampa abidi a ku nzubu yenu bua kundambula. Diampa dionsu nedikale diosha ne bukula bua kilo isatu, buela buanga. Mulambu awu, newikale wa biakudia bia tshianyi bia ntete.

¹⁸ Ku mulambu wa mampa abidi awu, nusakidileku kabidi ne bana ba mikoku muanda mutekete bakadi bakumbaje tshidimu tshimue, badi kabayi ne bulema, ne mikoku ya bimpanga ibidi ne ngombe mulume umue. Nundambule bintu abi bua mulambu wa kuosha, pamue ne mulambu wa bukula ne wa maluvu. Nenku meme nenganyishe dipembu dia mupuya wa milambu ayi.

¹⁹ “Nenundambule kabidi mbuji wa mpumbu wa kudikobolola nende. Kadi bua mulambu wa bobumue, nenundambule bana ba mikoku babidi, bakadi ne tshidimu tshijima.

²⁰ Mutuangaji neandambule nyama ayi, pamue ne bana ba mikoku babidi, pamue kabidi ne mampa. Neabiele mulu abinyukule. Nenku milambu ayi ishale ya mutuangaji, bualu idi ya tshijila.

²¹ Dituku mene adi, kanuenji mudimu to. Nudisangishe bua kuntendelela. Nulame mikenji eyi kashidi, miaba yonsu inudi nusomba.

²² “Musangu unudi nunowa biakudia, kanuena mua kunowa too ne bidi ku mpenga kua budimi to. Kabidi kanuena mua kupingana bua kupumbulula biakudia binuvua bapue muoyi to. Nubilekele, bishale bua kuambuluisha bapela ne benyi. Bualu meme ndi Maweja-Nangila Mvidi Mukulu wenu.”

Dituku dia tshivulukilu ne dia disanka

²³ Maweja-Nangila kuambila Moshe

²⁴ bua amanyishe bena Izrayele mikenji idi ilonda eyi ne: “Dituku dia kumpala dia ngondu wa muanda mutekete, ndituku dia tshivulukilu ne dia dikisha. Nudisangishe bua kuntendelela.

²⁵ Kanuenji midimu yonsu ya tshibidilu dituku adi to. Kadi, nundambule mulambu wa kuosha.”

Dituku dinene dia Kukobolola bantu

²⁶ Maweja-Nangila kuambila Moshe ne:

²⁷ “Dituku dia dikumi dia ngondu wa muanda mutekete, ndituku dinene dia kukobolola bantu. Dituku adi, nudisangishe, nuntendelele. Nujile biakudia, nundambule mulambu wa kuosha.

²⁸ Kanuenji mudimu nansha mukese dituku adi. Bualu ndituku dia kukobolola bantu, kumpala kuanyi meme, Maweja-Nangila Mvidi Mukulu wenu.

²⁹ Muntu yonsu udi kayi ujila biakudia dituku adi, nebamumushe munkatshi mua bena Izrayele.

³⁰ Kabidi muntu yonsu udi wenza mudimu dituku adi, meme nkayanyi nemmushipe, mmumushe munkatshi mua bena Izrayele.

³¹ Nulame mikenji eyi kashidi miaba yonsu inudi basombe.

³² Dituku adi, nenuikishe, anu bu munudi nuenza dituku dia Dikisha. Nujile kabidi biakudia. Nunemeke mukenji ewu wa dikisha, bituadije ku dilolu dia matuku tshitema a ngondu, too ne dilolu dia matuku dikumi a ngondu.”

Tshibilu tshia Tuzubu tua Bisasa

³³ Maweja-Nangila kuambila Moshe

³⁴ bua amanyishe bena Izrayele mikenji idi ilonda eyi ne: “Biangatshile ku matuku dikumi ne atanu a ngondu wa muanda mutekete, nenungenzele tshibilu tshia tuzubu tua Bisasa lumingu lujima, bua kunnemeka.

³⁵ Dituku dia kumpala, kanuenji mudimu wenu wa tshibidilu to. Nudisange bua kuntendelela.

³⁶ Lumingu alu lujima nundambule milambu ya kuosha ku dituku dionsu. Kadi dituku dia muanda mukulu, kanuenji mudimu to. Nudisange kabidi bua kunnemeka, anu bu munuvua badisange dituku dia kumpala. Nundambule kabidi milambu ya kuosha.

³⁷ “Mu bibilu bionsu ebi, nudisange bua kuntendelela ne bua kundambula milambu mishilangane: ya kuosha, ya bia mu madimi, ya bobumue, ne ya maluvu. Nuyilambule bilondeshile meyi ne mikandu bia tshibilu tshionsu.

³⁸ Milambu ayi, nuyilambule pamue ne inudi nundambula matuku a Dikisha. Nuyisangishe kabidi ne milambu yenu ya mapiku ne ya budisuile.

³⁹ “Nanku panuikala bamane kunowa biakudia, matuku dikumi ne atanu a ngondu wa muanda mutekete, nungenzele tshibilu tshia lumingu lujima. Nuikishe dituku dia kumpala, ne dia muanda mukulu dia tshibilu etshi.

⁴⁰ Lumingu alu lujima, kutuadija ku dituku dia kumpala, nupole bimuma, nukose matamba a mitshi, nutape malala ne ntupu. Nuende ngendu ya mazengu lumingu lujima kumpala kuanyi meme Maweja-Nangila.

⁴¹ Mu ngondu wa muanda mutekete wa tshidimu tshionsu, nenungenzele tshibilu etshi lumingu lujima. Nenku nulame mukenji ewu kashidi.

⁴² Nuenu bena Izrayele bonsu, lumingu alu lujima, nuikale anu basomba mu tuzubu tua bisasa,

⁴³ bua ndelanganyi yenu ijadike ne mvua munupatule mu ditunga dia Ejipitu, kabidi mvua munuladike mu tuzubu tua bisasa. Bualu meme ndi Maweja-Nangila Mvidi Mukulu wenu.”

⁴⁴ Ke muvua Moshe mumanyishe bena Izrayele bibilu bishilangane bivuabu ne bua kutendelela Maweja-Nangila nabi.