Lewitiki 22 - MUKANDA WA MYIDI MUKULU

c. Didia dia bintu bilambula Mvidi Mukulu

¹ Maweja-Nangila kuambila Moshe ne:

² “Manyisha Arone ne bana bende ba balume bua kabapepeji dina dianyi dia tshijila to. Nanku banemeke milambu ya tshijila idi bena Izrayele bandambula meme, Maweja-Nangila.

³ Ubambile ne: “Padi muntu wa ku ndelanganyi yenu ya batuangaji idi ilonda, mupie mikiya, usemena pabuipi ne milambu ya tshijila idi bena Izrayele bandambula, numushe muntu awu ku mudimu wanyi. Bualu meme ndi Maweja-Nangila.

⁴ Padi mutuangaji muikale ne disama dia nsudi, nansha muikale ne tufina tupatuka mu mubidi, nansha muikale mulenga muntu udi mupie mikiya bua tshitalu tshivuaye mulenga, nansha mutuangaji mene muele mayi a balume panshi, kena mua kudia bintu bia mulambu wa tshijila udi bena Izrayele bandambula to. Bua kubidiaye, amu muanji kujikija mikiya.

⁵ Padi mutuangaji ulenga tshilandadi tshidi ne mikiya, nansha ulenga muntu udi ne mikiya, nansha yoyi ya mushindu kaayi, udi upia mikiya.

⁶ Nenku neashale mupie mikiya too ne ku dilolu. Bua kudia milambu ya tshijila, amu padiye owa mayi mubidi mujima.

⁷ Padi diba dibuela, mikiya yende yajiki. Nenku, udi mua kudia kabidi bintu bia milambu ya tshijila, bualu mbiakudia bia batuangaji.

⁸ Padi mutuangaji udia munyinyi wa nyama mudifuile, nansha mushipa kudi nyama mukuabu, udi upia mikiya. Bualu meme ndi Maweja-Nangila.

⁹ “Batuangaji bakumbaje muabu muonsu bindi mubambile. Tshianana nebikale bena tshibawu, amu bua biakudia. Nebafue, bualu kabena balonda mikenji idi itangila bintu bia tshijila. Bualu meme ndi Maweja-Nangila, udi ujidila batuangaji bua bankuatshile mudimu.

¹⁰ “Muntu udi kayi mutuangaji, nansha yeye muena mudimu wa mutuangaji, nansha muenyi wende, kena mua kudia biakudia bia tshijila ebi to.

¹¹ Kadi, padi mutuangaji musumbe mupika, nansha bobu balele mupika mu diku diende, mupika awu udi mua kudia biakudia bia tshijila.

¹² Padibu basela muana wa bakaji wa mutuangaji kudi mulume udi kayi mutuangaji muana wa bakaji awu kena mua kudia bintu bidibu bumusha ku milambu ya tshijila to.

¹³ Kadi padi muana wa bakaji wa mutuangaji ushala mukamba, nansha dibaka diende difue kayi mulela, padiye upingana kabidi kumbelu kua tatuende, udi mua kudia biakudia bia tshijila. Pa kumusha bualu ebu, muntu udi kayi mutuangaji kena mua kubidia to.

¹⁴ “Padi muntu udia biakudia bia tshijila kayi mumanye, udi ne bua kufuta mutuangaji bintu bikuabu bungi bua bintu bivuaye mudie. Kabidi neasakidile tshia bitanu tshimue tshia bintu abi.

¹⁵ “Batuangaji kabena ne bua kunyanga biakudia bia tshijila bidi bena Izrayele bumusha ku milambu idibu balambula Maweja-Nangila.

¹⁶ Padi batuangaji badia bintu bia tshijila bia milambu, kabayi babikumbanyine, badi badibueja mu tshibawu. Bualu meme ndi Maweja-Nangila udi ujidila milambu.”

Mikenji ya kusungula nyama ya mulambu

¹⁷ Maweja-Nangila kuambila Moshe

¹⁸ bua amanyishe Arone ne bana bende ba balume ne bena Izrayele bonsu mikenji idi ilonda eyi ne: “Padi muntu wa munkatshi muenu, nansha muenyi nansha muena Izrayele, musue kundambula mulambu wa kuosha, bua bualu buvuaye mulaye, nansha bua bualu buvuaye mudisuile,

¹⁹ padiye musue kupeta diakalenga kundi, andambule anu ngombe mulume, nansha mukoku wa tshimpanga, nansha mbuji wa mpumbu, kadi amu nyama udi kayi bulema.

²⁰ Kadi panudi nundambula tshimuna ne bulema pambidi, tshiena ngitaba mulambu wenu awu to.

²¹ Panudi nundambula mulambu wa bobumue, bua kukumbaja bualu bunuvua balaye, nansha bunuvua badisuile, nengitabe mulambu wa bimuna binene ne bikese. Kadi anu bidi kabiyi ne bulema.

²² Pa tshilambuilu tshianyi kanuena mua kundambula mulambu wa kuosha wa tshimuna tshifue mesu, nansha tshitebuke, nansha tshikoseke tshidimba, nansha tshikale ne disama pambidi.

²³ Kadi tshimuna tshionsu, tshinene nansha tshikese, tshidi tshitebuke, nansha tshidi ne tshidimba tshishawuke, udi mua kutshindambula amu bua mulambu wa budisuile. Kadi kuena mua kutshilambula bu mulambu wa mapiku to.

²⁴ Kanuena mua kundambula tshimuna tshia mupaku: tshikale ne mipesa mibozeka, misunsuka, mitula, nansha mikosa. Kabidi nuenu bamane kufika mu ditunga dienu, nulekele tshibidilu tshia kupakula bimuna.

²⁵ Muenyi kena mua kunupesha tshimuna tshia mupaku, bua nuenu kutshindambula meme Mvidi Mukulu wenu. Tshiena mua kuitaba mulambu awu to, bualu tshimuna tshia mupaku ntshifuanangane ne tshidi ne bulema. Nanku tshiena mua kuanyisha milambu yenu ya mushindu ewu to.”

²⁶ Maweja-Nangila kuambila Moshe kabidi ne:

²⁷ “Padi ngombe, mukoku nansha mbuji ulela, muana awu ashale kudi mamuende lumingu lujima. Kadi biangatshile ku dituku dia muanda mukulu, ndi nganyisha bua bamundambule bua mulambu wa kuosha.

²⁸ Kadi kanuena mua kukosa ngombe, nansha mbuji, nansha mukoku, muminu dituku dimue ne muanende bua kundambula to.

²⁹ “Panudi nundambula milambu, nuenda nuimba misambu, nuntumbisha, nuenze bionsu bilondeshile mikenji yanyi, bua nuenu kupeta diakalenga.

³⁰ Nenku nudie munyinyi wa mulambu awu, ujike anu dituku dimue, kauladi to. Bualu meme ndi Maweja-Nangila.

³¹ “Nulame mikenji yanyi bimpe, nuyikumbaje. Bualu meme ndi Maweja-Nangila.

³² Nuenu bena Izrayele, kanupepeji dina dianyi dia tshijla to. Ndi musue bua numanye ne: ndi wa tshijila. Ndi Maweja-Nangila, uvua munusungule bua nuikale bantu ba tshijila.

³³ Ke pamvua munupatule mu ditunga dia Ejipitu, bua meme kuikala Mvidi Mukulu wenu. Meme ndi Maweja-Nangila.”