Lewitiki 20 - MUKANDA WA MYIDI MUKULU

Kutendelela kudibu bakandika

¹ Maweja-Nangila kuambila Moshe ne:

² umanyishe bena Izrayele mikenji idi ilonda eyi ne: “Padi muena Izrayele, nansha muenyi udi munkatshi mua bena Izrayele, ulambula mvidie wa Moleke muanende, bena ditunga bamuase mabue, bamushipe.

³ Kabidi meme Maweja-Nangila nennyoke muntu awu. Nemmuipate munkatshi mua bena Izrayele, bualu mmulambule mvidie wa Moleke muanende. Mulambu wa mushindu awu, udi upisha muaba wanyi wa tshijila mikiya, upepeja dina dianyi dia tshijila.

⁴ Padi bena ditunga balengulula buenzayi bua muntu awu, batshina mua kumushipa,

⁵ meme nkayanyi nemmunyoke ne bena diku diende. Nembipate munkatshi mua bena Izrayele, yeye ne bonsu badiye utendelela nabu mvidie wa Moleke.

⁶ “Padi muntu ubukisha lubuku lua mishindu yonsu, bua kumvua mudi bakishi bamba, udi mufuanangane ne muntu udi utendelela mvidie. Nanku nemmunyoke, mmuipate munkatshi mua bena Izrayele.

⁷ “Nuikale bantu ba tshijila. Bualu meme ndi Maweja-Nangila Mvidi Mukulu wenu.

Kubuelelangana kua mu nzubu kudibu bakandika

⁸ “Nulame mikenji yanyi bimpe. Bualu meme ndi Maweja-Nangila, uvua munusungule bua nuikale tshisamba tshia tshijila.

⁹ “Muntu yonsu udi utshipa tatuende nansha mamuende, badi ne bua kumushipa. Yeye nkayende ke udi mudikebele lufu, bualu udi utshipa baledi bende.

¹⁰ “Muntu yonsu udi ubuelela mukaji wa bende mu nzubu, babashipe bonsu babidi, muena tshibawu kabidi ne mukaji awu.

¹¹ “Muntu udi ubuelela mukaji wa tatuende mu nzubu, udi ufuisha tatuende bundu. Nanku bashipe mulume ne mukaji awu. Bualu mbena tshibawu, bavua badikebela lufu.

¹² “Padi muntu ubuelela mukaji wa muanende mu nzubu, mmupie tshibindi. Bashipe mulume ne mukaji awu. Bualu mbena tshibawu bavua badikebela lufu.

¹³ “Padi muntu mulume ulala ne mulume nende, bu mudibu balala ne mukaji, bonsu babidi mbenze bualu bupite bubi, budi kabuyi busankisha Mvidi Mukulu. Babashipe bonsu babidi. Bualu bobu nkayabu mbadikebele lufu.

¹⁴ “Padi mulume ubanjija mukaji pamue ne mamuende wa mukaji, mmuena tshibawu. Mulume awu ne bakaji bonsu babidi nebaboshe ne muoyi mu kapia. Nanku malu mabi a mushindu ewu kaakutungunuka munkatshi muenu to.

¹⁵ “Padi mulume ulala ne nyama, bamushipe, bashipe kabidi ne nyama awu.

¹⁶ “Padi mukaji ulala ne nyama, bamushipe. Bashipe kabidi ne nyama awu, bualu bonsu babidi mbadikebele lulu.

¹⁷ “Padi muntu usela, kabidi ubuelela muanabu wa bakaji wa tatuende nansha wa mamuende mu nzubu, babanyoke, bantu bonsu batangile, bualu mbenze bualu bua bundu. Mulume mmuangate muanabu wa bakaji wa tatu nansha wa mamu. Nanku mmuena tshibawu.

¹⁸ “Padi muntu ubuelela mukaji mu nzubu, kadi mukaji muikale ku tshijila tshia bakaji, bonsu babidi babipate munkatshi mua bena Izrayele. Bualu bavua bumvuangana bonsu babidi bua kubenga kunemeka mikenji ya tshijila tshia bakaji.

¹⁹ “Kuena mua kubuelela mamuebe mukuabu nansha tatuebe mukaji mu nzubu to. Muntu udi ulala ne mulela wende, bonsu babidi mbena tshibawu.

²⁰ “Padi muntu ubuelela mukaji wa mansebende, nansha wa tatuende mukuabu mu nzubu, kena munemeke mansebende nansha tatuende mukuabu to. Nanku bonsu babidi, mulume ne mukaji, nebalue bunkumba, bualu mbena tshibawu.

²¹ “Padi muntu ubanjija mukaji wa muanabu, muntu awu mmuena tshibawu, bualu mmufuishe muanabu bundu. Bonsu babidi nebafue bunkumba.”

²² Maweja-Nangila kuamba kabidi ne: “Nulame meyi anyi ne mikenji yanyi bimpe, nuyilonde. Nanku ditunga dindi nnupa bua kusomba, kadiakunubipilato.

²³ Kanulondi bibidilu bia bena ditunga bandi ngipata aba to. Bantu aba, ndi mubabenge, bualu bavua benza bibi bipite.

²⁴ Ke pandi nnulaya ne: Nenupete buloba buabu ebu, ditunga didi mabele ne buitshi. Meme Maweja-Nangila ndi nnupeshadi.’ Bualu ndi Maweja-Nangila Mvidi Mukulu wenu, udi munusungule munkatshi mua bisamba bikuabu.

²⁵ Nanku, nunemeke mikenji idi itangila nyama idi ne mikiya ne idi kayiyi nayi, nyunyi idi ne mikiya ne idi kayiyi nayi. Kanudipishi mikiya panudi nulenga nyama, nyunyi nansha bilandadi bidi ne mikiya. Ndi munupe mikenji eyi bua nujadike bintu bidi ne mikiya.

²⁶ “Nuikale bantu ba tshijila, badi bajidila mua kungenzela mudimu, bualu meme Maweja-Nangila ndi wa tshijila. Ndi munusungule munkatshi mua bisamba bikuabu, bua nuikale bantu banyi meme.

²⁷ “Padi muntu mulume nansha mukaji, bikale ne tshibidilu tshia kubukila bantu bakuabu, bua kumvua mudi bakishi bamba, bantu aba babase mabue, babashipe. Bualu mbadikebele lufu nkayabu.”