Lewitiki 18 - MUKANDA WA MYIDI MUKULU

Nunemeke buena nzubu

¹ Maweja-Nangila kuambila Moshe bua

² amanyishe bena Izrayele ne: “Ndi Maweja-Nangila Mvidi Mukulu wenu!

³ Kanulondi bibidilu bia bena ditunga dia Ejipitu dinuvua basombe, nansha bia bena ditunga dia Kenaane dindi nnupesha. Kanulondi dikasa dia bantu aba to.

⁴ Kadi nulame meyi ne mikenji yanyi, bualu meme ndi Maweja-Nangila Mvidi Mukulu wenu.

⁵ “Nulame mikenji yanyi ne meyi anyi. Muntu udi ubikumbaja, nebimupeteshe muoyi. Bualu ndi Maweja-Nangila.

⁶ “Meme Maweja-Nangila, ndi ngamba ne: muntu wa kunudi nansha umue, kena mua kubuelela mukaji wa mulela wende mu nzubu.

⁷ “Kuena ne bua kubuelela mamuebe mu nzubu to, kufuisha tatuebe bundu. Udi ufuisha ne mamuebe bundu, bualu udi muledi webe.

⁸ “Kuena ne bua kubuelela mukaji mukuabu wa tatuebe mu nzubu to, bualu udi ufuisha tatuebe bundu.

⁹ “Kuena ne bua kubuelela muanenu wa bakaji wa tatuebe nansha wa mamuebe mu nzubu to, nansha bobu kabayi bamukoleshila mu diku dienu.

¹⁰ “Kuena ne bua kubuelela muikuluebe wa muanebe wa balume nansha wa muanebe wa bakaji mu nzubu to, bualu udi udiluisha amu bundu nkayebe.

¹¹ “Kuena ne bua kubuelela muana wa bakaji wa mukaji wa tatuebe mu nzubu to, bualu mmuana wa tatuebe, kabidi mmuanenu.

¹² “Kuena ne bua kubuelela tatuebe mukaji mu nzubu to, bualu mmuanabu ne tatuebe.

¹³ “Kuena ne bua kubuelela mamuebe mukuabu mu nzubu to, bualu udi muanabu ne mamuebe.

¹⁴ “Kuena ne bua kubuelela mukaji wa tatuebe mukuabu mu nzubu to, kufuisha tatuebe mukuabu bundu, bualu ke mukajende.

¹⁵ “Kuena ne bua kubuelela mukaji wa muanebe mu nzubu to, bualu mmukaji wa muanebe.

¹⁶ “Kuena ne bua kubuelela mukaji wa muanenu mu nzubu to, bualu udi umuluisha bundu.

¹⁷ “Kuena ne bua kubuelela mukaji mu nzubu, kubuelela kabidi muanende wa bakaji, nansha muikuluende, muana wa bakaji wa muanende wa balume nansha wa muanende wa bakaji. Bia nanku mbuenzavi, bualu badi bantu bamue.

¹⁸ “Kuena ne bua kusela bukonde buebe, patshidi mukajebe ne muoyi to. Bia nanku nebikebeshe mikawu mu lubanza.

¹⁹ “Kuena ne bua kubuelela mukaji mu nzubu, patshidiye ku tshijila tshia bakaji to, bualu utshidi mupie mikiya.

²⁰ “Kuena ne bua kubuelela mukaji wa bana benu mu nzubu to, bualu udi upia mikiya.

²¹ “Kuena ne bua kulambula bana bebe kudi mvidie wa Moleke to, bualu udi upepeja dina dianyi. Meme ndi Maweja-Nangila Mvidi Mukulu wenu.

²² “Kuena ne bua kubuelela mulume nebe mu nzubu, bu mudibu babuelela mukaji to. Nngenzelu mubi udibu bakandika kashidi.

²³ “Kuena ne bua kulala ne nyama to, bualu neupie mikiya. Kabidi muntu mukaji kena mua kulala ne nyama to. Muntu muenze nanku, udi unyanga mikenji.

²⁴ “Kanuena ne bua kupia mikiya ku ngenzelu ya nanku to. Bualu bisamba bindi ngipata kumpala kuenu ebi, mbipie mikiya anu ku ngenzelu ya bundu ya mushindu ewu.

²⁵ Nenku ditunga kabidi divua dimane kupia mikiya. Ke mumvua mudinyoke. Dikadi dibenga benadi.

²⁶ “Kadi nuenu bena Izrayele too ne benyi badi munkatshi muenu, nulonde mikenji yanyi ne meyi anyi bindi nnupesha. Kanuenji malu mabi aa to.

²⁷ Bualu bantu bavua badianjila kusomba mu ditunga edi, bavua benza buenzayi ebu, ditunga kupia mikiya.

²⁸ Nenku nuenu bena Izrayele, kanuena mua kupisha kabidi ditunga mikiya nansha. Bualu ditunga didi mua kunubenga, bu muvuadi dibenga bantu bavua badianjila kuasamu.

²⁹ Nanku bantu bonsu badi benza malu mabi a nenku, nebabipate mu bena Izrayele.

³⁰ “Nenku Meme Maweja-Nangila Mvidi Mukulu wenu, ndi ngamba ne: ‘Nutumikile mikenji yanyi, anu bu mundi munupayi. Kanuenji malu mabi, avuabu benza kudi bantu bavua badianjile kuasa mu ditunga edi. Nudilame bua kanupi mikiya.’ ”