Lewitiki 17 - MUKANDA WA MYIDI MUKULU

BENA IZRAYELE MBANTU BA TSHIJILA Mikenji idi itangila mashi

¹ Maweja-Nangila kuambila Moshe ne:

² ambila Arone ne bana bende ba balume ne bena Izrayele bonsu ne:

³ “Padi muena Izrayele musue kushipa ngombe, mukoku, mbuji mu mitanda nansha ku mpenga kuayi,

⁴ udi ne bua kufika ne nyama ayi ku mushiku wa ntenta wa kusambakena bua ayilambule Maweja-Nangila kumpala kua nzubu wende wa tshijila. Yeye kayi muenze nanku, mmuena tshibawu. Nenku nebamuipate mu bena Izrayele, bua mashi adiye mumatshishe panshi, kayi mulonde mikenji.

⁵ Nenku bilondeshile mudi mukenji awu, bena Izrayele kabatshiena mua kushipela nyama ku misoku. Kadi bayifile ne muoyi kudi mutuangaji mu mushiku wa ntenta, bua ayilambule Maweja-Nangila bu mulambu wa bobumue.

⁶ Mutuangaji amiamine mashi a nyama awu pa tshilambuilu tshidi kumpala kua ntenta. Pashishe, oshile munyinyi wa mafuta onsu pa tshilambuilu, bua wikale mulambu udi ne dipembu dimpe didi disankisha Maweja-Nangila.

⁷ Nenku bena Izrayele nebalekele kulambula milambu yabu kudi mvidie ya dishima, idibu benzele mpingu mifuanangane ne mbuji ya mpumbu. Badi batendelela mvidie eyi mushindu mubi udi ukuatshisha bundu. Bena Izrayele balame mukenji ewu kashidi too ne ku ndelanganyi yabu yonsu.

⁸ “Diba didi muena Izrayele, nansha muenyi udi munkatshi mua bena Izrayele, musue kufila mulambu wa kuosha nansha mulambu mukuabu,

⁹ udi ne bua kulambuila nyama awu ku mushiku wa ntenta wa kusambakena. Yeye kayi muenze nanku, nebamuipate mu bena Izrayele.

¹⁰ “Padi muena Izrayele nansha muenyi udi munkatshi mua bena Izrayele, udia mashi a mushindu onsu, nanku Maweja-Nangila neamunyoke, amuipate munkatshi mua bena Izrayele.

¹¹ Bualu muoyi wa tshintu udi mu mashi. Maweja-Nangila uvua munuambile bua kulambula mashi pa tshilambuilu bua amone mua kunufuila luse. Nanku mashi adi ambuluisha bua kujimija bubi, bualu adi apetesha muoyi.

¹² Ke padi Maweja-Nangila mukandike bena Izrayele ne benyi badi basombe munkatshi muabu bua kabadi mashi to.

¹³ “Padi muena Izrayele, nansha muenyi udi musombe munkatshi muabu, ukuata nyama nansha nyunyi mu bulembi, wa ku idi bantu mua kudia, neele mashi ende panshi, aajibikile ne buloba.

¹⁴ Nenku, padi tshintu ne muoyi, muoyi udi mu mashi. Ke pavua Maweja-Nangila mukandike bena Izrayele bua kabadi mashi, bualu muoyi wa tshintu tshionsu udi mu mashi. Muntu udi udia mashi nebamuipate mu bena Izrayele.

¹⁵ “Padi muena Izrayele, nansha muenyi udi munkatshi muabu, udia munyinyi wa nyama mudifuile nansha mushipa kudi nyama mukuabu wa mu mpata, muntu awu neasukule bilamba biende, wowe mayi pambidi. Kadi neikale mupie mikiya too ne ku dilolu. Pashishe mikiya yende neyijike.

¹⁶ Kadi padiye kayi usukula bilamba biende, kayi wowa mayi pambidi, neapete tshibawu.”