Lewitiki 16 - MUKANDA WA MYIDI MUKULU

Dituku dinene dia kukobolola bantu

¹ Bana babidi ba Arone bamane kufua pavuabu balambula Maweja-Nangila mulambu wa manananshi avua kaayi a tshijila, Maweja-Nangila kuambila Moshe ne:

² “Ambila muanenu Arone kabuedi tshibuelabuela muaba wa tshijila menemene, panyima pa tshilamba tshidi tshijika mushete wa tshijila ne tshibuikidiji tshiawu to. Bualu yeye mubuele nanku, udi mua kufua musangu undi lumuenekela mu muinshi, udi pa mutu pa tshibuikidiji tshia mushete.

³ “Nenku bua kubuelaye muaba awu, ikale ne ngombe mulume bua mulambu wa kudikobolola nawu kudi Mvidi Mukulu, kabidi ne mukoku wa tshimpanga bua mulambu wa kuosha.

⁴ Arone udi ne bua kuvuala muntumpu muenza ne buanda bua ndanda, kaputula ka muinshi ka buanda bua ndanda. Neasuike kabidi mukaba wa buanda bua ndanda, uvuala ne tshifulu tshienza ne buanda bua ndanda. Kadi, mudi bilamba ebi bia tshijila, udi ne bua kubivuala amu yeye muanji kuowa mayi.

⁵ Bena Izrayele nebamupe mbuji ibidi ya mpumbu ya mulambu wa kukobolola nawu bantu, ne mukoku wa tshimpanga umue bua mulambu wa kuosha.

⁶ “Arone nealambule ngombe mulume bua kudikobolola, pashishe neakobolole kabidi bena diku diende.

⁷ Pashishe neangate mbuji ibidi ya mpumbu, ayimanyike kumpala kua Maweja-Nangila mu mushiku wa ntenta wa kusambakena.

⁸ Ku mbuji ibidi ya mpumbu ayi, Arone neatshinke bua kumanya mbuji udi wa Maweja-Nangila, ne mbuji udi wa Azazele.

⁹ Padiye ujadika ne mbuji ewu ngua Maweja-Nangila, udi umulambula bua mulambu wa kukobolola nawu bantu.

¹⁰ Kadi mbuji udiye umona ne ngua Azazele, neajikije nende mibi. Amuimanyike ne muoyi kumpala kua Maweja-Nangila, bangabanga ne kumuipata bua kuyaye kudi Azazele mu tshipela.

¹¹ “Arone neafike ne ngombe mulume udiye udikobolola nende. Neenze bionsu bidi bikengela bua kudikobolola, kukobolola ne bena diku diende. Pashishe neakose ngombe awu muminu.

¹² Neambule makala a kapia adi pa tshilambuilu tshia muaba wa tshijila, ela mu mbabula. Neambule manza abidi a musenga wa manananshi. Neaye ne bionsu ebi panyima pa tshilamba tshidi tshilembeleja muaba wa tshijila menemene.

¹³ Muaba awu kumpala kua Maweja-Nangila, neele musenga wa manananshi mu mbabula. Muinshi wa manananshi awu, neubuikile mushete wa ndondu ne tshibuikidiji tshiawu. Nanku Arone kakufua to.

¹⁴ Arone atue munu mu mashi a ngombe mulume awu, aamiamine pa tshibuikidiji tshia mushete wa ndondu luseke ludi diba dipatukila luatshi. Atue kabidi munu, amiamine mashi kumpala kua mushete awu misangu muanda mutekete.

¹⁵ Pashishe neakose muminu wa mbuji wa mpumbu bua mulambu wa kukobolola nawu bantu. Angata mashi a mbuji awu, aye nawu muaba wa tshijila menemene, panyima pa tshilamba tshidi tshilembeleja. Aamiamine pa tshibuikidiji tshia mushete ne kumpala kua mushete, bu nuwuaye muenze ne mashi a ngombe mulume.

¹⁶ Padi Arone ufika muaba wa tshijila menemene, udi wenza bionsu bidi bikengela bua kujikija mikiya ivua muaba awu, bua buntomboji ne bubi bua bena Izrayele. Pashishe muaba udi mushale wa ntenta wa kusambakena, Arone neenze anu mushindu umue, bualu ntenta mmuase munkatshi mua bantu badi bapia mikiya.

¹⁷ Padi Arone ubuela muaba wa tshijila menemene, bua kulambula milambu ya kujikija nayi mikiya ya muaba wa tshijila, muntu mukuabu nansha umue kikadi mu ntenta wa kusambakena too ne padi Arone upatuka. Padi Arone mumane kuenza bionsu bidi bikengela bua kudikobolola ne kukobolola bena diku diende pamue ne bena Izrayele bonsu,

¹⁸ neapatuke mu ntenta, asemena ku tshilambuilu tshidi kumpala kua ntenta. Neenze bionsu bidi bikengela bua kujikija mikiya idi ku tshilambuilu. Pashishe neangate mashi makese a ngombe mulume ne a mbuji wa mpumbu, aamiamine ku matumba adi matalame adi ku tshilambuilu.

¹⁹ Neatue munu mu mashi awu, aamiamine ku tshilambuilu atshi misangu muanda mutekete, bua kujikija mikiya ivuaku, bua bubi bua bena Izrayele ne bua kutshijidila tshiakabidi.

²⁰ “Diba didi Arone ujikija kujidila muaba wa tshijila menemene, ne muaba udi mushale wa ntenta wa kusambakena ne tshilambuilu, neangate mbuji wa mpumbu uvua mushale ne muoyi.

²¹ Atenteke bianza biende bibidi pa mutu pa mbuji awu, utonda pambidi pende mibi yonsu, buntomboji ne buenzayi bua bena Izrayele. Udi ubiumpuila mbuji awu. Pashishe badi basungula muntu udi ne bua kuipata mbuji awu, kumutuma mu tshipela.

²² Mbuji awu neaye ne bibawu bionsu bia bantu mu tshipela. “Diakamue padibu bipata mbuji awu uya mu tshipela,

²³ Arone neabuele mu ntenta wa kusambakena, avula bilamba bia ndanda bivuaye muvuale, pawaye muaba wa tshijila menemene, abishiye anu mu ntenta amu.

²⁴ Arone aye muaba kampande wa tshijila, wowe mayi pambidi, avuale bilamba bikuabu. Pashishe apatuke, alambule Maweja-Nangila milambu ibidi ya kuosha, buende yeye ne bua bena Izrayele. Pashishe neadikobolole, akobolole ne bena Izrayele bonsu.

²⁵ Pashishe neoshile mafuta a nyama ya milambu ya kudikobolola nayi pa tshilambuilu.

²⁶ “Nenku muntu uvua muye kushiya mbuji wa mpumbu wa Azazele mu tshipela, bangabanga ne kupingana mu mitanda, anji kusukula bilamba, wowe mayi.

²⁷ Ngombe mulume ne mbuji bivuabu balambula bua kudikobolola, biena mashi avuabu bangate bua kujikija mikiya ya miaba ya tshijila, nebapatuke nabi mu mitanda bua kuosha tshiseba, munyinyi ne bia munda.

²⁸ Muntu uvua muye kuosha bintu abi, neasukule bilamba biende, wowe mayi pambidi bua kupingana mu mitanda.

²⁹ “Nuenu bena Izrayele, umvuayi mukenji unudi ne bua kulama kashidi: matuku dikumi a ngondu wa muanda mutekete, nuenu, bana benu ne benyi badi munkatshi muenu, nujile biakudia. Kanuena kabidi mua kukuata mudimu.

³⁰ Bualu dituku edi, ke didibu banukobolola, bajikija mikiya yenu. Nanku mpindiewu kanuena kabidi ne bubi kumpala kua Maweja-Nangila to.

³¹ Dituku edi ndia dikisha menemene, dinudi nujila biakudia. Nulame mukenji ewu kashidi.

³² “Mu matuku avuavua, mutuangaji udibu balaba mafuta, bamujidila bua kupingana tatuende ku mudimu wa mutuangaji munene, ke udi mua kunukobolola, kujikija mikiya yenu. Neavuale bilamba bia tshijila bienza ne ndanda,

³³ bua alambule mulambu wa kujikija mikiya muaba wa tshijila menemene, ntenta wa kusambakena, ne tshilambuilu. Pashishe, neenze bionsu bidi bikengela bua kukobolola batuangaji ne bena Izrayele bonsu.

³⁴ “Mukenji ewu, nuulame kashidi bua kukobolola bena Izrayele musangu umue ku tshidimu tshionsu bua mibi yabu yonsu ijike. Arone kukumbaja mudimu onsu uvua Maweja-Nangila mumufundile kudi Moshe.