Lewitiki 13 - MUKANDA WA MYIDI MUKULU

Masama a pambidi pa muntu

¹ Maweja-Nangila uvua muambile Moshe ne Arone ne:

² “Padi muntu ne tshiuja pambidi, nansha muaba muwule, nansha muikale ne dikeji ditoke, dimueneka bu disama dia nsudi, baye ne muntu awu kudi mutuangaji Arone, nansha kudi umue wa ku ndelanganyi yende.

³ Mutuangaji neakenkete muaba udi disama. Pikale boya bua muaba awu butokoloke, kabidi muaba awu mondoke, mutuangaji neajadike ne: muntu awu udi ne disama dia nsudi. Neambe ne: muntu ewu udi ne mikiya.

⁴ Kadi padi muntu awu ne dikeji ditoke pambidi, mputa kayi mondoke, kabidi boya kabuyi butokoloke, mutuangaji neumushe muntu awu munkatshi mua bantu. Amuteke pa nkayende matuku muanda mutekete.

⁵ Nanku dituku dia muanda mutekete, mutuangaji neakenkete muntu awu kabidi. Padiye umona ne: disama didi amu muvuadi, kadiena ditampakane mubidi mujima, neateke kabidi muntu awu pa nkayende matuku muanda mutekete makuabu.

⁶ Pashishe, dituku dia muanda mutekete, mutuangaji neakonkonone muntu awu tshiakabidi. Padiye usangana dikeji dienda dikepela, kadiyi ditampakane pambidi, mutuangaji neajadike ne: muntu awu uvua amu ne tshiuja. Mutuangaji neambe ne: muntu awu kena ne mikiya to. Nanku muntu awu neasukule amu bilamba biende bua kikadi ne mikiya.

⁷ Padi mutuangaji mumane kuteta muntu, mumusangane ne: kena ne mikiya, kadi pashishe dikeji didi dituadija kutampakana pambidi, muntu awu neapingane tshiakabidi kudi mutuangaji.

⁸ Mutuangaji neamukenkete tshiakabidi. Padiye umona ne: dikeji didi dienda ditampakana pa dikoba, neambe ne: muntu ewu udi ne mikiya, bualu tshidiye natshi ndisama dia nsudi.

⁹ “Muntu yonsu udi ne disama difuanangane ne dia nsudi, nebamufile kudi mutuangaji.

¹⁰ Mutuangaji neamukenkete. Padiye ne tshiuja, kabidi padi boya bua muaba awu butokoloke, mputa upatuka tufina,

¹¹ mutuangaji neambe ne: muntu ewu udi ne mikiya, bualu neikale ne disama diende adi misangu ne misangu. Nanku kabena ne bua kumuteka pa nkayende to. Bualu mbimueneke patoke ne: udi ne mikiya.

¹² Kadi padi mutuangaji umona ne: muntu ewu udi ne mpusu mubidi mujima, ku mutu too ne ku makasa,

¹³ neamukenkete menemene. Padiye umona mpusu mitampakane mubidi mujima, neambe ne: muntu ewu kena mupie mikiya, bualu mubidi wende mujima mmuandamuke mutoke.

¹⁴ Kadi dituku didi mputa umueneka, upatuka tufina, muntu awu neikale ne mikiya.

¹⁵ Mutuangaji udi ukenketa miaba idi mputa. Padiye umona ipatuka tufina, neambe ne: muntu ewu mmupie mikiya. Bualu mputa udi upatuka tufina mushindu ewu, udi ne mikiya, uleja disama dia nsudi.

¹⁶ Padi mputa awu utokoloka tshiakabidi, muntu neaye kudileja kudi mutuangaji.

¹⁷ Mutuangaji neamukenkete. Padiye umona ne: mputa mmutokoloke tshiakabidi, neambe ne: mputa wa mushindu ewu kena ne mikiya to. Nanku muntu ewu kena mupie mikiya nansha.

¹⁸ “Padi muntu mushale ne tshibangu tshia tshiuja pambidi,

¹⁹ padi tshibangu tshiuwula tshiakabidi, nansha dikeji ditokoloke dimueneka mu tshibangu atshi, muntu awu aye kudileja kudi mutuangaji.

²⁰ Padi mutuangaji umona ne: tshibangu ntshiondoke, kabidi boya bua muaba awu mbutokoloke, mutuangaji neambe ne: muntu ewu mmupie mikiya. Bualu udi ne disama dia nsudi, dimuenekela mu tshibangu tshia tshiwuja.

²¹ Pamona mutuangaji ne: boya bua muaba awu kabuena butokoloke, kabidi tshibangu katshiena tshiondoke, tshibangu atshi tshidi anu tshimpe, neateke muntu awu pa nkayende matuku muanda mutekete.

²² Pashishe pikale dikeji ditampakane pambidi ponsu, mutuangaji neambe ne: muntu ewu mmupie mikiya, bualu udi ne disama dia nsudi.

²³ Kadi padi dikeji kadiyi ditampakana pambidi ponsu, mutuangaji neambe ne: muntu awu kena mupie mikiya to. Udi amu ne tshibangu tshia tshiuwuja.

²⁴ “Kadi padi muntu ne mputa wa kapia pambidi, tshibangu tshia mputa awu tshikale tshitokoloke, nansha tshikunzubile,

²⁵ mutuangaji neakenkete muaba udi disama. Padi tshibangu atshi tshiondoke, boya bua muaba awu butokoloke, mutuangaji neambe ne: muntu ewu mmupie mikiya, bualu disama dia nsudi ndimuenekela mu tshibangu tshia mputa wa kapia.

²⁶ Kadi padi mutuangaji umona ne: mu tshibangu kamuena boya butokoloke, kabidi katshiena tshiondoke, tshidi anu tshimpe, neateke muntu ewu pa nkayende matuku muanda mutekete.

²⁷ Padi dituku dia muanda mutekete dikumbana, mutuangaji mumone ne: muntu awu udi ne disama mubidi mujima, ambe ne: muntu ewu mmupie mikiya, bualu udi ne disama dia nsudi.

²⁸ Kadi padi dikeji adi dikale anu muadi muvuadi, kadiyi ditampakane pambidi ponsu, mutuangaji ambe ne: muntu ewu kena mupie mikiya to. Udi amu ne tshibangu tshia mputa wa kapia.

²⁹ “Padi muntu mulume nansha mukaji muikale ne bilundu ku mutu, nansha ne mputa ku tshibanga,

³⁰ mutuangaji amukenkete. Padi mputa awu mondoke, kabidi boya bua muaba awu bukunzubile, buenda butuka, mutuangaji neambe ne: muntu ewu mmupie mikiya, bualu udi ne disama dia nsudi ku mutu nansha ku tshibanga.

³¹ Kadi padi mutuangaji umona ne: mputa awu kena mondoke, kabidi muaba awu kawena boya bukunze, nenku mutuangaji anji kuteka muntu awu pa nkayende matuku muanda mutekete.

³² Padi mutuangaji ukenketa tshiakabidi muntu awu dituku dia muanda mutekete, usangana disama kadiyi ditampakane muntu mubidi mujima, kayi ne boya butokoloke, nansha mputa mondoke,

³³ muntu awu neakungule mu mutu, ashiye miaba idi mputa ya bilundu. Pashishe, mutuangaji amuteke pa nkayende matuku makuabu muanda mutekete.

³⁴ Padi matuku awu muanda mutekete ajika, mutuangaji neakenkete muntu awu tshiakabidi. Padiye usangana mputa ya bilundu kayiyi mitampakane mutu mujima, kayiyi miondoke, mutuangaji neambe ne: muntu ewu kena mupie mikiya to. Nanku muntu uvua ne disama, neasukule anu bilamba biende bua kikadi ne mikiya to.

³⁵ Kadi padi mutuangaji mumane kuamba ne: muntu ewu kena mupie mikiya, pashishe mputa ya bilundu imueneka kabidi mu mutu,

³⁶ mutuangaji neakenkete musangu muibidi. Padi mputa mitampakane mutu mujima, mutuangaji kena ne bua kutangila boya to. Bualu biamueneki patoke ne: muntu awu mmupie mikiya.

³⁷ Kadi padi mputa ya bilundu kayiyi mitampakane, kabidi boya bukunze butoloke muaba awu, mutuangaji neambe ne: muntu ewu kena mupie mikiya to, bualu disama diende ndimane kujika.

³⁸ “Padi muntu mulume nansha mukaji muikale ne makeji matokoloke pambidi,

³⁹ mutuangaji neamukenkete. Padiye usangana makeji mikale ne mubidi muimpe, disama adi kadiena dikole to. Nanku muntu awu kena mupie mikiya to.

⁴⁰ “Padi muntu ne dibala mutu mujima, kena mupie mikiya to.

⁴¹ Padi nsuki ya pa lubombu ituka, upeta dibala muaba awu, kena mupie mikiya to.

⁴² Kadi padi mu dibala dia ku dikoshi nansha mu lubombu mumuenekela dikeji dikunzubile, atshi ndisama dia nsudi didi dituadija.

⁴³ Mutuangaji amukenkete. Padiye umona mputa mu dibala mukunzubile, mufuanangane ne wa disama dia nsudi,

⁴⁴ mutuangaji neambe ne: muntu awu mmupie mikiya, bualu disama dia nsudi ndimukuate ku mutu.

⁴⁵ “Muntu yonsu udi ne disama dia nsudi, udi ne bua kuvuala bilamba bipandike. Kena mua kuasa tshifulu ku mutu to. Abuikile kuinshi kua mpala. Ele amu mbila ne: ‘Ndi mupie mikiya! Ndi mupie mikiya!’

⁴⁶ Matuku onsu adi muntu awu ne disama, udi mupie amu mikiya. Nanku udi ne bua kumuka mu mitanda, kuya kusomba pa nkayende.

Mikenji ya bintu bidi bikuata butu nansha nsumba

⁴⁷ “Padi butu bukuata ku bilamba bienza ne miosa ya nyama, nansha ku bia ndanda,

⁴⁸ nansha ku bilamba bia pambidi bienza ne miosa ya nyama, nansha ne ndanda, nansha ku bilamba bia biseba, nansha ku bintu bienza ne biseba,

⁴⁹ padi makeji awu amueneka makunzubile, nansha a mayi a matamba, mutuangaji neakenkete butu abu.

⁵⁰ Mutuangaji mumane kukenketa tshintu tshidi ne makeji, neatshiteke pa nkayatshi matuku muanda mutekete.

⁵¹ Padi dituku dia muanda mutekete dikumbana, mutuangaji udi ukenketa dikeji tshiakabidi. Padidi ditampakane ku tshintu tshijima, udi ujadika ne: tshintu atshi ntshipie mikiya, bualu utshikuate butu budi kabuyi mua kumusha.

⁵² Nanku, mutuangaji udi osha tshilamba atshi, nansha tshiotshi tshilamba tshia mushindu kaayi, nansha tshiotshi tshia pambidi, nansha tshiotshi tshienza ne miosa ya nyama, nansha tshienza ne ndanda, nansha tshiotshi tshia biseba. Bu mudi butu kabuyi mua kumusha, boshe tshintu atshi.

⁵³ Kadi padi mutuangaji utshikenketa, umona ne: dikeji adi kadiena ditampakane tshintu tshijima,

⁵⁴ udi utuma diyi bua basukule tshintu atshi. Batshiteke kabidi pa nkayatshi matuku muanda mutekete makuabu.

⁵⁵ Pashishe, mutuangaji neatshikenkete kabidi. Padiye umona ne: dikeji adi ndishale anu mushindu umue, nansha kadiyi ditampakane, udi wamba ne: tshintu etshi ntshipie mikiya. Mutuangaji neatshioshe, nansha butu bukuate luseke lumue.

⁵⁶ Kadi padibu basukule tshintu atshi, dikeji dishale dimueneka kakese, mutuangaji neakose anu muaba udi dikeji awu.

⁵⁷ Pashishe padi butu bukuate ku tshintu atshi, dikeji dimueneka tshiakabidi, neboshe tshintu atshi.

⁵⁸ “Padibu basukula tshintu atshi, dikeji dijika, batshisukulule musangu muibidi, bua tshishale katshiyi ne mikiya.”

⁵⁹ Ke mikenji idi itangila bintu bikuate butu, nansha biobi bienza ne miosa ya nyama, nansha bienza ne ndanda, nansha bilamba bikuabu bia pambidi, nansha bienza ne biseba. Mikenji eyi idi yambuluisha bua kujadika ne bintu ebi mbipie mikiya, nansha kabiena biyipia.