Lewitiki 12 - MUKANDA WA MYIDI MUKULU

Mua kukobolola mukaji kunyima kua dileta

¹ Maweja-Nangila kumanyisha Moshe

² bua ambile bena Izrayele mikenji eyi ne: “Padi mukaji ulela muana wa balume, mukaji awu udi upia mikiya matuku muanda mutekete, anu bu muvuaye muyipie mu matuku ende a tshijila tshia bakaji.

³ Padi matuku muanda mukulu akumbana, bateke muana awu panshi.

⁴ Pashishe padi mamuende wa muana awu kayi muanji kudilongolola ku buvyele budiye nabu, kena mua kulenga tshintu tshia tshijila, kena mua kubuela muaba wa tshijila, too ne padi matuku makumi asatu ne asatu akumbana.

⁵ “Padi mukaji ulela muana wa bakaji, neashale ne mikiya mbingu ibidi, anu bu muyilaye mupie mikiya matuku ende a tshijila tshia bakaji. Kadi ashale kabidi nanku bua kudilongolola mu buvyele buende, too ne padi matuku makumi asambombu ne asambombu akumbana.

⁶ “Nanku padi matuku a kudilongolola ku buvyele akumbana, bua muana wa balume, nansha bua wa bakaji uvuaye mulele, mukaji awu aye kudi mutuangaji, imanyine ku mushiku wa mbelu wa ntenta wa kusambakena. Amupeshe muana wa mukoku wa tshidimu tshimue bua aulambule Maweja-Nangila, bu mulambu wa kuosha. Neamupeshe kabidi nkudimba nansha kamanda-nkutshi bu mulambu wa kukobolola nawu bantu.

⁷ Mutuangaji nealeje Maweja-Nangila milambu eyi, bua kulongolola muvyele awu ne kujikija buvyele buende. Amu kutuadija pa diba adi, mukaji awu kena kabidi ne mikiya ya buvyele to.” Ke munudi mua kuenzela mukaji yonsu padiye ulela muana wa balume, nansha wa bakaji.

⁸ “Kadi padi mukaji awu kayi mua kupeta muana wa mukoku, udi mua kufila nkudimba ibidi, nansha tumanda-nkutshi tubidi. Nyunyi umue ikale bu mulambu wa kuosha, mukuabu ikale bu mulambu wa kumukobolola nawu. Nanku padi mutuangaji ulambula bintu abi kudi Maweja-Nangila, buvyele bua mukaji buajiki.”