Lewitiki 10 - MUKANDA WA MYIDI MUKULU

Mikenji idi itangila madilu

¹ Nadabe ne Abiku bavua bana ba balume ba Arone. Yonsu wa kudibu kuangata tshiamu tshiende tshia musenga wa kamonya, kuelamu makala a kapia, kabidi ne manananshi bua kulambula Maweja-Nangila. Kadi kapia kakavua ka tshijila, kakavua mushindu uvua Maweja-Nangila mubambile to.

² Diakamue kapia kufuma kudi Maweja-Nangila, kubosha, kubashidisha muaba awu.

³ Nanku Moshe kuambila Arone ne: — Ke muvua Maweja-Nangila mumane kukudimuka, pawaye wamba ne: “Bonsu badi bangenzela mudimu, badi ne bua kunnemeka, bualu ndi wa tshijila. Bantumbishe, bantu bonsu batangile.” Arone kushala mupuwa.

⁴ Moshe kubikila Mishayele ne Elishafane, bana ba balume ba Uziyele mansebende wa Arone. Kubambilaye ne: — Umbushayi bitalu bia bana benu muaba wa tshijila, numuke nabi mu mitanda bua kubijika.

⁵ Ke kusemenabu pabuipi, kuambula bitalu abi, bivuadike mintumpu. Kumukabu nabi mu mitanda, bilondeshile diyi dia Moshe.

⁶ Moshe kubikila Elazare ne Itamare, bana ba balume ba Arone, pamue ne Arone mene. Kubambilaye ne: — Kanuteki madilu to. Longololayi nsuki yenu bimpe. Kanupandi bilamba bienu, bu bantu badi mu madilu, bualu nudi mua kufua, kabidi Maweja-Nangila udi mua kufikila bantu bonsu munda. Kadi bena Izrayele bakuabu bonsu bateke madilu bua bantu bavua Maweja-Nangila mushidishe ne kapia.

⁷ Nanku nuenu kanumuku mu mushiku wa ntenta wa kusambakena bua kanufu, bualu Maweja-Nangila mmunulabe mafuta a tshijila. Ke Arone ne bana bende kuitaba bionsu bivua Moshe ubambila.

Mikenji idi itangila maluvu makole

⁸ Maweja-Nangila kuambila Arone ne:

⁹ — Wewe ne bana bebe, kanuena mua kunua maluvu a mvinyo, nansha a kapia, panudi nubuela mu ntenta wa kusambakena, bualu nudi mua kufua. Mukenji ewu ushale kashidi kunudi ne kudi ndelanganyi yenu.

¹⁰ Kanunu kabidi maluvu makole, panudi nusunguluja bintu bidi bia tshijila, ne bidi kabiyi bia tshijila, bidi ne mikiya, ne bidi kabiyi ne mikiya.

¹¹ Kanuena mua kunua kabidi maluvu makole, panudi nulongesha bena Izrayele mikenji eyi idi Maweja-Nangila mubatumine kudi Moshe.

Mikenji idi itangila minyinyi ya milambu

¹² Pashishe Moshe kuambila Arone ne bana bende ba balume babidi, Elazare ne Itamare, bavua bashale ne muoyi ne: — Angatayi bukula budi bushale bua ku mulambu uvuabu balambula Maweja-Nangila. Nuenze nabu mampa kaayi mela buanga. Kadi nuadile pabuipi ne tshilambuilu, bualu adi biakudia bia tshijila menemene.

¹³ Kabidi nudi mua kuadila amu muaba wa tshijila. Tshitupa tshia milambu ivuabu balambula Maweja-Nangila etshi, ntshienu nuenu batuangaji, bu mu-vua Maweja-Nangila mungambile.

¹⁴ Kadi wewe ne bana bebe bonsu ba balume, nuangate tshiadi ne tshibelu bia nyama ya milambu ya bobumue, binuvua bela mulu, banyukula kumpala kua Maweja-Nangila, nubidile muaba musunguluke, bualu ntshitupa tshia mulambu tshidi tshiebe ne tshia bana bebe ba balume. Nudi mua kubidia pamue ne bana bebe ba bakaji.

¹⁵ Nanku, misangu yonsu idibu bosha mafuta pa tshilambuilu kumpala kua Maweja-Nangila, nebafile kabidi tshibelu ne tshiadi, babiela mulu, babinyukule Pashishe wewe ne ndelanganyi yebe, nubiangate, nubidie, bualu mbintu bivua Maweja-Nangila munupe kashidi, bu muvuaye mumane kuamba.

¹⁶ Moshe uvua musue kumanya tshivuabu benza ne mbuji wa mpumbu wa mulambu wa kukobolola nawu bantu. Kumuambilabu ne: “Mbuji wa mpumbu awu, mbamane kumuosha pa tshilambuilu kudi Elazare ne Itamare, bana ba Arone bavua bashale ne muoyi.” Ke kubafikilaye munda. Kubakonkaye ne:

¹⁷ — Munyinyi ewu wa mulambu udi Maweja-Nangila munupe, kanuena baudile muaba kampande wa tshijila bua tshinyi? Kanuena bamanye ne: ngwa tshijila menemene anyi? Maweja-Nangila mmunupeshe nyama ewu bua nukobolole bena Izrayele ku malu mabi adibu benza.

¹⁸ Bu munuvua kanuyi baya ne mashi a nyama ewu munda mua ntenta wa kusambakena, nuvua mua kudila munyinyi ewu muaba wa tshijila, bu mumvua munuambile.

¹⁹ Arone kukonka Moshe ne: — Lelu bena Izrayele bavua balambula Mvidi Mukulu mulambu wa kudikobolola, pamue ne mulambu wa kuosha. Kadi udi mumanye bivua bingenzekela. Nanku bu meme mudie munyinyi wa mulambu wa kukobolola dituku edi, Maweja-Nangila uvua mua kusanka anyi?

²⁰ Moshe umvua miaku eyi, kuitabaye.