Lewitiki 1 - MUKANDA WA MYIDI MUKULU

MIKENJI YA PA MILAMBU Mulambu wa kuosha

¹ Pavua Maweja-Nangila mu ntenta wa kusambakena, kubikilaye Moshe, kumuambila bua

² amanyishe bena Izrayele ne: “Padi muena Izrayele ulambula Maweja-Nangila mulambu wa nyama, asungule ngombe, mukoku nansha mbuji.

³ “Padiye ulambula ngombe bu mulambu wa kuosha, ngombe awu ikale anu mulume, kayi bulema. Aye nende mu mushiku wa mbelu wa ntenta wa kusambakena bua kulomba luse kudi Maweja-Nangila.

⁴ Ateke tshianza pa mutu pa ngombe awu, bua Maweja-Nangila anyishe mulambu, afuile muntu awu luse.

⁵ Akose ngombe awu muminu kumpala kua ntenta. Batuangaji, bana ba Arone, baye ne mashi a ngombe awu kudi Maweja-Nangila. Baamiamine ku nseke yonsu ya tshilambuilu tshidi ku mushiku wa mbelu wa ntenta.

⁶ Muntu asaye ngombe awu, akosolole munyinyi.

⁷ Batuangaji bateke nkunyi pa tshilambuilu, batemeshe kapia.

⁸ Batekepu mabulu a munyinyi, mutu ne mafuta a nyama.

⁹ Kadi, bia munda bionsu, ne bikonu bia ngombe, babisukule mu mayi. Pashishe mutuangaji abioshe pamue ne munyinyi onsu udi pa tshilambuilu, bua dipembu dimpe dia mulambu wa kuosha disankishe Maweja-Nangila.

¹⁰ “Padi muena Izrayele ulambula mbuji nansha mukoku bu mulambu wa kuosha, asungule anu mukoku wa tshimpanga, nansha mbuji wa mpumbu udi kayi bulema.

¹¹ Amukose muminu kumpala kua ntenta, luseke lua ku mutu kua tshilambuilu. Batuangaji bamiamine mashi awu ku nseke yonsu ya tshilambuilu.

¹² Pashishe, muena Izrayele awu umushe mutu ne mafuta, akosolole munyinyi. Mutuangaji ateke bintu bionsu abi pa nkunyi ya kapia idi pa tshilambuilu.

¹³ Bia munda ne bikonu babisukule mu mayi. Mutuangaji abiele mulu, abinyukule, abioshile bionsu Maweja-Nangila pa tshilambuilu, bualu mmulambu wa kuosha, udi ne dipembu dimpe didi disankisha Maweja-Nangila.

¹⁴ “Padi muena Izrayele ulambula Maweja-Nangila nyunyi bu mulambu wa kuosha, asungule kamanda-nkutshi nansha nkudimba.

¹⁵ Mutuangaji aye ne nyunyi awu kumpala kua tshilambuilu. Amukose mutu, awoshe pa tshilambuilu. Pashishe, ele mashi ku nseke yonsu ya tshilambuilu.

¹⁶ Umushe dibodi dia nyunyi ne bintu bionsu bidimu. Abimanshe muaba udibu bimansha butu luseke ludi diba dipatukila lua tshilambuilu.

¹⁷ Mutuangaji apande nyunyi awu mu tshiadi amutanyinyike. Oshe munyinyi onsu pa nkunyi ya kapia idi pa tshilambuilu, bualu mmulambu wa dipembu dimpe didi disankisha Maweja-Nangila.