Genese 50 - MUKANDA WA MYIDI MUKULU

Badi benza madilu a Yakobe

¹ Yozefe kupukila tshitalu tshia tatuende, kudila, binsonji bimatshila tatuende mu mpala.

² Pashishe kuambilaye baminganga bende bua bumishe tshitalu atshi bua katshibodi to.

³ Baminganga abu kulongolola tshitalu matuku makumi anayi ne mafuta a manananshi. Bena Ejipitu kuenza madilu a Yakobe matuku makumi muanda mutekete.

⁴ Batangalaja amu madilu a Yakobe, Yozefe kuambila balombodi ba mu bukalenga bua bena Ejipitu ne: — Ndi nnusengelela ne: Panudi bannange, nundombele kudi mukalenga wa bena Ejipitu, akumbaje dijinga dianyi edi:

⁵ “Tatu wanyi kayi muanji kukula muoyi, uvua munshila diyi bua meme kuditshipa bua kumujika amu mu ditunga dia Kenaane mu lukita luvuaye mumane kudilongolola.” Nanku ndi ndomba bua kuya kumujika. Pashishe nempingane.

⁶ Mukalenga wa bena Ejipitu kuitaba ne: “Mbimpe, uye kujika tatuebe bu muvuaye mushiye diyi.”

⁷ Yozefe kuya kujika tatuende. Bavua bamushindikija kudi balombodi ba mu bukalenga bua bena Ejipitu, bakulu ba mu ditunga dijima dia Ejipitu,

⁸ bena diku dia Yozefe bonsu, bana babu ne Yozefe, ne bena diku bakuabu ba tatuende. Nanku mu Ngoshene muvua mushale amu bana batekete ne bimuna.

⁹ Mu njila amu, bavua kabidi ne musumba wa bantu babande pa tubalu ne matempu.

¹⁰ Bafika mu Ngorene-Atade, dishiya dia musulu wa Yardene, kujukulabu miadi mikole. Yozefe kuenza madilu a tatuende matuku muanda mutekete. Tshibilu tshivua tshinene.

¹¹ Bena ditunga dia Kenaane bamona madilu mu Ngorene-Atade, kukemabu bamba ne: — Aa mmadilu manene a bena Ejipitu! Ke padibu babikila muaba awu ne: Abele-Misrayime, mmumue ne: muaba wa madilu a bena Ejipitu.

¹² Bana ba Yakobe kuenza bionsu amu muvua tatuabu mubashila diyi.

¹³ Kuyabu ne tshitalu tshiende mu ditunga dia Kenaane. Kutshijikabu mu lubuebue luwa mu budimi bua Makpela, muaba uvua Abrahame musumbe kudi Efrone muena Iti, bua wikale wende wa kujika bafue. (Lubuebue alu luvua pabuipi ne Mambre.)

¹⁴ Yozefe mumane kujika tatuende, kupinganaye mu Ejipitu ne bana babu, kabidi ne bonsu bavuaye muende nabu bua kuya kujika tatuende.

Bantu bamba muabu, Mvidi Mukulu wamba muende

¹⁵ Bana babu ne Yozefe bamona ne: tatu wafu, bavua bapampakana, bamba ne: “Misangu mikuabu Yozefe udi mua kutusombuela ku malu mabi onsu atuvua bamuenzele.”

¹⁶ Nanku kutumabu bantu kudi Yozefe, bamuvuluija meyi a ndekelu avua tatuabu mubambile ne:

¹⁷ “Nuambile Yozefe mu dina dianyi ne: ufuile bana benu luse ku malu mabi onsu adibu bakuenzele.” Ke pavuabu bamulomba ne: “Utufuileku luse, bualu tudi tutendelela Mvidi Mukulu umue wa tatuebe Yakobe.” Yozefe umvua miaku ayi, kuasaye muadi.

¹⁸ Bana babu ne Yozefe kuya kudiela panshi ku makasa ende, bamuambila ne: — Tudi bapika bebe.

¹⁹ Kadi Yozefe kubakolesha ku muoyi, wamba ne: — Kanutshinyi to. Meme tshiena Mvidi Mukulu to.

²⁰ Nuenu nuvua ne meji a kungenzela bibi. Kadi Mvidi Mukulu uvua musue kukudimuna bibi abi bua bikale bimpe. Mvidi Mukulu uvua musue kupandisha bantu ba bungi, bu munudi numona lelu.

²¹ Nanku kanutshinyi to. Meme nennuambuluishe ne meku enu onsu. Yozefe kukolesha bana babu ku muoyi ne miaku eyi ya mushinga mukole.

²² Yozefe uvua mushale mu Ejipitu ne bena diku dia tatuende bonsu. Bidimu bia Yozefe bionsu bivua lukama ne dikumi.

²³ Yozefe kumona bana ba Efrayime, kumona kabidi ndelanganyi yabu. Yozefe kuangata bana ba muikuluende Makire, muana wa Menashe, bu bende.

²⁴ Yozefe kulayangana ne bana abu, ubambila ne: — Meme nkadi mikolu ku tshiina. Kadi Mvidi Mukulu neanuambuluishe. Neanunuishe mu ditunga edi, anufikishe mu ditunga divuaye mulaye Abrahame, Izake ne Yakobe.

²⁵ Yozefe kutshipisha bana babu, ubambila ne: “Pikala Mvidi Mukulu munumushe mu ditunga edi, numuangale ne mifuba yanyi.”

²⁶ Yozefe kufua, mumane kukumbaja bidimu lukama ne dikumi. Kuluishabu tshitalu tshiende ne mafuta a manananshi bua katshibodi. Kutshitekabu mu mushete wa mabue mu Ejipitu.