Genese 47 - MUKANDA WA MYIDI MUKULU

¹ Pashishe Yozefe kuya kuambila mukalenga wa bena Ejipitu ne: — Tatu ne bana betu mbafike ne bimuna biabu, kabidi ne bintu biabu bionsu. Mbafumine ku ditunga dia Kenaane. Mpindiewu mbasombe mu ditunga dia Ngoshene.

² Yozefe kuya ne bana babu batanu kudi mukalenga wa bena Ejipitu.

³ Mukalenga kubakonka ne: — Nudi bamanye mudimu kayi? Bobu kuandamuna ne: — Mukalenga, tuetu tudi bamunyi ba bimuna bu muvua bankambua betu.

⁴ Tudi bafike bua kusomba munemu, bualu ku Kenaane kudi tshiyole tshikole, tshiumisha too ne bisosa bia kudisha bimuna bietu. Nanku, anyisha bua tusombele mu Ngoshene.

⁵ Mukalenga wa bena Ejipitu kuambila Yozefe ne: — Tatuebe ne bana benu mbamane kufika.

⁶ Ditunga dia Ejipitu dijima edi ndiebe. Sungula muaba muimpe wa mu ditunga bua basemu. Badi mua kusomba nansha mu Ngoshene. Kadi paudi mumanye ne: munkatshi muabu mudi bantu ba meji, ubateke bikale balama bimuna bianyi.

⁷ Yozefe kuya kuleja kabidi tatuende Yakobe kudi mukalenga wa bena Ejipitu. Yakobe kuela mukalenga wa bena Ejipitu muoyi ne kanemu.

⁸ Mukalenga kukonka Yakobe ne: — Udi ne bidimu bungi munyi?

⁹ Yakobe kuandamuna ne: — Ndi muendakane eku ne eku bu muenyi, ne ntatu ne makenga, bidimu lukama ne makumi asatu. Kadi bidimu ebi mbikese, bualu kabiena bungi bua bidimu bia bankambua banyi bavua pabu bendakanyi to.

¹⁰ Yakobe mumane kulayangana ne mukalenga wa bena Ejipitu, kumukaye mu nzubu wa bukalenga.

¹¹ Yakobe ne bana bende kusomba mu ditunga dia Ejipitu, muaba muimpe uvua Yozefe mubasunguile bua wikale wabu. Bavua basombe pabuipi ne tshimenga tshia Ramsese, bu muvua mukalenga wa bena Ejipitu muambe.

¹² Yozefe uvua wambuluisha tatuende, bana babu ne bonsu ba mu diku diabu ne biakudia bilondeshile bungi bua bantu.

Yozefe udi ulombola ditunga bimpe

¹³ Mu ditunga dia Ejipitu ne dia Kenaane muvua tshiyole tshikole. Biakudia kabiyi bimueneka, bantu bonsu bavua bakeba kufua nzala.

¹⁴ Yozefe kusumbisha bena Ejipitu ne bena Kenaane biakudia, wela makuta onsu mu mushete wa mukalenga wa bena Ejipitu.

¹⁵ Bena Ejipitu ne bena Kenaane bamane kujikija makuta onsu ku biakudia, bena Ejipitu kuya kudidila Yozefe, bamba ne: — Enza muebe muonsu mua kuenza bua utupeshe biakudia. Katuena ne makuta kabidi to. Nanku tudi mua kufua ne nzala, wewe mumone. Mbimpe anyi?

¹⁶ Yozefe kubandamuna ne: — Bu munudi kanuyi ne makuta, tushintakajayi bimuna bienu ne biakudia.

¹⁷ Bena Ejipitu kutuadila Yozefe bimuna biabu: tubalu, mikoku, mbuji, ngombe ne mpunde. Yozefe kushintakaja bimuna abi ne biakudia. Kubapeshaye biakudia bikumbane bua kudia tshidimu tshijima.

¹⁸ Tshidimu atshi tshijike, bena Ejipitu kupingana kabidi kudi Yozefe, bamuambila ne: — Mfumu, kufua bundu nkufua nzala. Makuta atuvua nawu ne bimuna bietu, ukadi mumane kubiangata. Tudi bashale amu ne madimi etu, kabidi ne mibidi yetu.

¹⁹ Katuena mua kufua ne nzala, wewe muikaleku to. Tuetu bafue, mu ditunga kamuakushala kabidi babidime to. Nanku, utusumbe, usumbe kabidi ne madimi etu. Utupe biakudia, tushale bapika ba mukalenga wa bena Ejipitu. Utupe ne maminu a kukuna, bua katufu ne nzala, kadi madimi etu mavue kushala tshipela.

²⁰ Bua bukole bua tshiyole tshia nzala, bena Ejipitu kusumbisha madimi abu onsu kudi Yozefe. Ditunga dijima kushala dia mukalenga wa bena Ejipitu.

²¹ Yozefe kubueja bantu mu bupika mu ditunga dijima.

²² Kadi Yozefe kavua musumbe madimi a batuangaji to. Bualu bavua babadisha kudi mukalenga wa bena Ejipitu. Kabidi meyi ne mikandu bia mukalenga wa bena Ejipitu bivua bikandika bua kabasumbishi madimi abu.

²³ Yozefe kuambila bena ditunga ne: — Mpindiewu nuenu bonsu nudi bajadike mundi mumane kunusumba, musumbe kabidi ne madimi enu. Nudi bashale bapika ba mukalenga wa bena Ejipitu. Nanku, angatayi maminu, nuye kukuna mu madimi.

²⁴ Kadi, diba dia kunowa, nufile tshia bitanu tshimue tshia bintu abi kudi mukalenga wa bena Ejipitu. Biakudia bidi bishale mbienu. Nubilame bua maminu. Bikuabu nudie ne bena meku enu bonsu.

²⁵ Bena Ejipitu kuandamuna Yozefe ne: — Wewe udi mumane kutupandisha. Tukadi bapika ba mukalenga wa bena Ejipitu, bualu udi mumane kutufuila luse.

²⁶ Yozefe kuela mukenji ne: tshia bitanu tshimue tshia biakudia, ntshia mukalenga wa bena Ejipitu. Mukenji ewu utshidiku too ne lelu. Anu madimi a batuangaji kaavua mu dina dia mukalenga wa bena Ejipitu to.

Yakobe udi ulaya Yozefe

²⁷ Bena Izrayele kusomba mu Ejipitu, kuasa mu ditunga dia Ngoshene. Kuvulanganabu bikole, kusumba mpangu.

²⁸ Yakobe ukumbaja bidimu dikumi ne muanda mutekete mu Ejipitu, bidimu biende bionsu kuenza lukama makumi anayi ne muanda mutekete.

²⁹ Yakobe umvua ne: diba dia lufu diakumbanyi, kubikilaye muanende Yozefe, umuambila ne: — Pawikala munnange, kunjiki mu Ejipitu nansha. Kuata muinshi mua tshibelu tshianyi, uditshipe bua kundeja muudi munnange ne mundamate.

³⁰ Meme mumane kulonda bankambua banyi, angata tshitalu tshianyi, uye kutshijika anu muaba udibu bajike bankambua banyi. Yozefe kuitaba ne: — Eyowa! Nengenze bionsu biudi wamba ebi.

³¹ Yakobe kumuambila ne: — Uditshipe bua meme kujadika ne: newenze. Yozefe kuditshipa. Nanku, Yakobe kuela Yozefe tuasakidila, kuinama panshi ku mutu kua bulalu.