Genese 42 - MUKANDA WA MYIDI MUKULU

Yakobe udi utuma bana bende mu Ejipitu

¹ Yakobe umvua ne: biakudia bidi mu Ejipitu, kuambilaye bana bende ba balume ne: — Nukadi basombe tshianana, kanuyi ne tshinudi nuenza.

² Ndi mumvue bamba ne: mu Ejipitu mudi ntete ya kuenza bukula. Ndayi nutusumbile ntete ayi bua tumone mua kushala ne muoyi. Katuena basue kufua to.

³ Bakulu ba Yozefe dikumi, kuya mu Ejipitu bua kusumba biakudia. —

⁴ Kadi Yakobe kavua musue bua baye mu Ejipitu ne Binyamine, muakunyi wa Yozefe wa mamuende to. Uvua utshina ne: Binyamine kapetshi diakabi mu njila. —

⁵ Bana ba Yakobe kufika mu Ejipitu pamue ne bantu bakuabu, bua kusumba ntete ya kuenza bukula, bualu tshiyole tshia nzala tshivua mu ditunga dijima dia Kenaane.

Yozefe udi uteta bana babu

⁶ Bafika mu Ejipitu, kudielabu mpala panshi kumpala kua Yozefe, bualu yeye ke uvua utangila ditunga adi dijima, usumbisha bantu benyi bonsu biakudia.

⁷ Yozefe umona bana babu, kubamanya. Kadi kavua mudimanyishe kudibu nansha. Kubakanyinaye, ubebeja ne: — Nudi nufuma penyi? Kuandamunabu ne: — Tudi bumukile mu Kenaane. Tudi basue kusumba biakudia munemu.

⁸ Yozefe uvua mumanye bana babu. Kadi bobu kabatshiwa bamumanye nansha.

⁹ Yozefe kuvuluka bilota bivuaye mulotele bana babu. Kubambilaye ne: — Nuenu nudi batentekedi. Nudi bafike munemu bua kumanya miaba ya kubuelela ne mvita mu ditunga edi.

¹⁰ Ke bobu kumuandamuna ne: — Kabiena nanku to, Mukalenga. Tuetu tudi bafike munemu anu bua kusumba biakudia.

¹¹ Tuetu katuena batentekedi to. Tudi bantu ba nsongu. Tudi bonsu bana ba tatu umue.

¹² Yozefe kubambila kabidi ne: — Nudi nushima! Nudi batentekedi. Nudi nukeba miaba ya kubuelela ne mvita mu ditunga edi.

¹³ Bobu bavua bamuambila amu kumuambila ne: — Kabiena nanku nansha kakese. Tuetu tudi tufuma mu ditunga dia Kenaane. Tuvua bana dikumi ne babidi ba tatu umue. Muakunyetu wa mukala mmushale kudi tatu. Kadi muakunyetu mukuabu ukadi mumane kufua.

¹⁴ Yozefe kubambila ne: — Ndi ngamba bulelela ne: nudi batentekedi.

¹⁵ Kadi ndi musue kunuteta. Ndi nditshipa ne: bu mudi mukalenga wa bena Ejipitu ne muoyi, kanuena mua kumuka mu ditunga edi, muanenu muana wa mukala awu kayi mufike to.

¹⁶ Nanku tumayi muntu umue wa kunudi, aye kumukeba. Kadi nuenu badi bashale, nubuele mu nzubu wa lukanu. Ke mundi mua kujadika ne: binudi bambe mbia bushuwa. Padibi kabiyi nanku, ndi njadika ne mutshipu ne: bu mudi mukalenga wa bena Ejipitu ne muoyi, nudi batentekedi.

¹⁷ Yozefe kubelesha bonsu mu lukanu matuku asatu.

¹⁸ Dituku disatu, Yozefe kubambila ne: — Meme ndi nnemeka Mvidi Mukulu. Nanku bua nuenu kuikala ne muoyi, nuitabe tshindi nnuambila.

¹⁹ Panuikala bantu ba nsongu, nuanyishe bua muntu umue wa kunudi ashale mu lukanu emu. Kadi bakuabu bonsu baye ne ntete ya kuenza bukula ku Kenaane, bua kuyipesha bena meku enu badi bafua nzala.

²⁰ Pashishe nuenu bafike ne muakunyenu udi mushale awu, nenjadike ne: nudi nuamba bulelela. Nanku kanuakufua to. Bana babu kuanyisha muvuaye wamba amu.

²¹ Kuambilanganabu ne: — Ee, mbatunyoke mpindiewu, bualu tuvua bakengeshe muakunyetu Yozefe. Yeye kututendakena ulomba luse, tuetu kubenga kumufuila luse. Ke mutudi lelu mu dikenga amu dia momumue.

²² Rubene kubavuluija ne: — Mvua munuambile ne: kanuenzedi muana ewu bibi to. Nuenu kubenga kunteleja. Mpindiewu bakadi batusombuela, bua lufu luende.

²³ Kabavua bamanye ne: Yozefe udi umvua bitudi tuamba to, bualu Yozefe uvua ne muntu uvua wandamuna mu muakulu wabu bivuaye uyukila nabu.

²⁴ Yozefe kubashiya mutantshi bua kuya kudila. Yozefe upingana, kubambilaye ne: “Ndi ndama Shimeyone.” Kumusuikishaye nkanu, bobu batangile.

Bana ba Yakobe badi bapingana mu Kenaane

²⁵ Yozefe kubuwujila bibombi biabu tente ne ntete ya kuenza bukula. Kupingajilaye kabidi muntu yonsu makuta ende mu tshibombi tshiende. Kutumaye kabidi diyi bua babape bia kudiabu mu njila. Kuenzekabi nanku.

²⁶ Bana babu ne Yozefe kuambuisha tumelu tuabu bibombi bia ntete ya kuenza bukula abi, kupingana ku Kenaane.

²⁷ Bimane mu njila diba dia kulala, umue wa kudibu usulula tshibombi tshiende bua kupesha mpunde wende biakudia, kumona makuta ende mateka ku mibangubangu ya tshibombi.

²⁸ Kubikilaye bana babu, wamba ne: — Tangilayi: mbampingajile makuta anyi. Ngowu aa mu tshibombi tshianyi. Bana babu kupampakana, kumvua bowa. Kukonkanganabu ne: “Tshidi Mvidi Mukulu mutuenzele nunku ntshinyi?”

²⁹ Bafika ku Kenaane kuvua tatuabu Yakobe, kumulondelabu muvua luendu luabu lujima. Bavua bamba ne:

³⁰ — Mulombodi wa ditunga dia Ejipitu uvua ututandisha bikole, utuamba ne: nudi batentekedi.

³¹ Tuetu kumuandamuna ne: “Tuetu katuena batentekedi. Tudi bantu ba nsongu.

³² Tudi basombe mu ditunga dia Kenaane. Tuvua bana dikumi ne babidi ba tatu umue. Muakunyetu wa mukala mmushale kudi tatu. Kadi mukuabu ukadi mumane kufua!”

³³ Mulombodi awu uvua musue kujadika mutudi bantu badi bamba malu malelela. Kutuambilaye ne: “Bua meme kujadika ne: nudi nuamba malu malelela, ndi nkuata muanenu umue lukole. Bakuabu bonsu baye ne ntete ya kuenza bukula ku Kenaane bua kupesha bena meku enu, bualu badi bafua nzala.

³⁴ Kadi nupingane ne muakunyenu wa mukala udi mushale, bua meme kujadika ne: kanuena batentekedi, kadi bantu ba nsongu. Pashishe, nendekele muanenu Shimeyone undi mukuate lukole. Nanku nenumone mua kuendakana mu ditunga emu bua kusumba bintu bienu.”

³⁵ Kutuadijabu kusukumuna biakudia bivua mu bibombi. Muntu yonsu kusangana mu tshibombi tshiende makuta ende. Bowa kubenza pavuabu bamona makuta awu. Bowa kukuata ne tatuabu Yakobe.

³⁶ Tatuabu Yakobe kubambila ne: — Nuambutuidi bana banyi babidi: Yozefe kufua, Shimeyone kenaku! Mpindiewu nudi basue kuya kabidi ne Binyamine. Anu meme nkayanyi makenga bungi nunku!

³⁷ Rubene kuambila tatuende ne: — Mpesha Binyamine. Pangikala tshiyi mupingane nende, neushipe bana banyi ba balume babidi.

³⁸ Yakobe kubenga, wamba ne: — Kanuena nuya ne Binyamine wanyi to. Muanabu ukadi mufue. Yeye ke undi mushale nende. Bu yeye mupete dikasa dibi, panudi nuya nende apu, nenunshipeshe meme mukulumpe bua kanyinganyinga ka lufu luende.