Genese 39 - MUKANDA WA MYIDI MUKULU

Yozefe kua Potifare, muena Ejipitu

¹ Bena Ismayele kufika ne Yozefe mu Ejipitu kumusumbisha kudi muena Ejipitu diende Potifare. Mukalenga wa bena Ejipitu uvua mutekemene bikole Potifare ewu. Potifare uvua kabidi mulombodi wa bena mvita ba mu bukalenga.

² Maweja-Nangila uvua ne Yozefe, umututshisha diakalenga. Yozefe kusomba ku nzubu kua mfumuende, muena Ejipitu.

³ Potifare kujadika ne: Maweja-Nangila mmulame Yozefe, mmumututshishe diakalenga mu bionsu bivuaye wenza.

⁴ Nanku Potifare kunanga Yozefe bikole. Kumupeshaye mudimu wa kulombola bantu ne bintu bionsu bia mu nzubu muende.

⁵ Amu bualu bua Yozefe, Maweja-Nangila kututshisha muena Ejipitu diakalenga. Diakalenga edi kumueneka mu bintu biende bionsu, ne mu nzubu wende ne mu madimi ende.

⁶ Potifare uvua ne mudimu amu wa kudia. Uvua ulombola bintu biende bionsu uvua amu Yozefe. Yozefe uvua nsongalume wa mpala muimpe mutambe, mumanye mua kusomba ne bantu.

Yozefe ne mukaji wa mfumuende

⁷ Mukaji wa Potifare umona mushindu uvua Yozefe, kumualakanaye bua kulala nende.

⁸ Yozefe kubenga kashidi, umuambila ne: — Mfumuanyi mmunteke mulombodi wa bintu biende bionsu. Udi munnange.

⁹ Mu nzubu emu katshiena utangila tshintu nansha tshimue. Tudi nende ne bumfumu bua mushindu umue ku bintu bionsu, pa kukumusha wewe, bualu udi mukajende. Nanku tshiena mua kuenzela Mvidi Mukulu bibi, kubunda tshibawu bunene nunku!

¹⁰ Mukaji awu uvua utatshisha amu kutatshisha Yozefe matuku onsu, umusengelela bua ashale bayende. Kadi Yozefe uvua ubenga amu kubenga kashidi.

¹¹ Dituku dikuabu Yozefe uvua ubuela mu nzubu bua kuenza mudimu wende. Kamuvua muena mudimu mukuabu to.

¹² Mukaji wa Potifare kumukuata mu muntumpu, umuambila ne: — Ndi musue, ungangate. Kadi Yozefe kunyema lubilu, kupatuka pa mbelu, kumushiya ne muntumpu mu bianza.

¹³ Mukaji umona Yozefe upatuka pa mbelu, umushiya ne muntumpu mu bianza,

¹⁴ kubikilaye bena mudimu bende bonsu, wela mbila, ubambila ne: — Luayi, numone muena Ebrewu, udi bayanyi muteke mu nzubu emu bua kuenza mudimu, udi musue kumpotela. Mmufike mu nzubu emu, munkuate bua ngikale mukajende. Kadi ngamueledi mbila.

¹⁵ Diba diumvuye ngela mbila nnubikila, wapatuku lubilu, kushiya ne muntumpu wende panshi, muaba undi ewu.

¹⁶ Mukaji kulama muntumpu wa Yozefe too ne pafiki bayende.

¹⁷ Kulondelaye bayende bualu abu, umuambila ne: “Mupika muena Ebrewu ewu, uudi muteke mu nzubu muetu, mmumpotele, mundenge pambidi, bua ngikale mukajende.

¹⁸ Kadi pangabikidi bantu ngela mbila, kunyemaye, ushiya muntumpu wende panshi muaba umvua.”

¹⁹ Potifare umvua muvua muena kuende umulondela bionsu bivua Yozefe muenze abi, kufikaye munda bikole bitambe.

²⁰ Kukuatshishaye Yozefe, kumuelesha mu nzubu wa lukanu, muaba uvua bena lukanu bakuabu ba mukalenga. Yozefe kubuela mu nzubu wa lukanu wa ditunga.

Yozefe mu nzubu wa lukanu

²¹ Maweja-Nangila uvua mulame Yozefe bimpe, uvua mumutokele ku muoyi nansha muaba awu. Uvua umututshisha dikasa dimpe kudi mulombodi ba balami ba bena lukanu.

²² Mulombodi awu kuteka Yozefe mutangidi wa bena lukanu bakuabu bonsu. Amu yeye ke uvua uludika midimu yonsu ivua bena lukanu benza.

²³ Mulombodi wa balami ba bena lukanu awu katshivua ulondolola bionsu bivua kudi Yozefe to, bualu Maweja-Nangila uvua ne Yozefe, umutatshisha diakalenga mu bionsu bivuaye wenza.