Genese 38 - MUKANDA WA MYIDI MUKULU

Yuda ne Tamare

¹ Mu tshikondu atshi, Yuda kushiyangana ne bana babu, bua kuya kusomba kua Ira, mu tshimenga tshia Adulame.

² Kuinaku Yuda kusela muana wa bakaji wa Shuwa, muena Kenaane.

³ Nsongakaji awu kuimita difu, kulela muana wa balume. Yuda kumuinyika dina dia Ere.

⁴ Mukaji wa Yuda kuimita kabidi difu, kulela muana wa balume muibidi. Yuda kumuinyika dina ne: Onane.

⁵ Pashishe mukaji awu kuimita kabidi difu, kulela muana muisatu wa balume, kumuinyika dina dia Shela. Kadi musangu awu Yuda kavua kumbelu to. Uvua muye ku Kezibe.

⁶ Yuda kuselela muanende muanabute Ere mukaji. Dina dia mukaji awu divua Tamare.

⁷ Ere, muanabute wa Yuda, kavua ukumbaja bivua Maweja-Nangila musue nansha. Nanku Maweja-Nangila kumushipesha.

⁸ Yuda kuambila muanende mukuabu Onane ne: — Upiane mukaji wa mukuluebe bua umulelele bana.

⁹ Kadi misangu yonsu ivua Onane ubuelela mukaji awu mu nzubu, uvua wela mayi a balume panshi. Bualu kavua musue kulela ne mamu awu nansha. Uvua mumanye ne: bana badibu mua kupeta ne mukaji awu, nebikale anu ba mukuluende.

¹⁰ Bivuaye wenza kabivua bisankisha Maweja-Nangila. Kumushipeshaye ne yeye kabidi.

¹¹ Ke Yuda kuambila Tamare, mukaji wa muanende Ere, ne: — Uye kusomba kuenu kua tatuebe, too ne pakola muananyi wa balume Shela bua akupiane. Tamare kuya kuabu. Yuda uvua mumushe Tamare, bua muanende wa balume Shela kavu kufua muvua bakulu bende bafue.

¹² Matuku a bungi mamane kupita, mukaji wa Yuda, muana wa Shuwa, kufila. Yuda mumane kutangalaja madilu, kuyaye ku Timna ne mulunda wende Ira wa mu tshimenga tshia Adulame. Bavua baye kutangila bena mudimu bavua bakosa miosa ya mikoku yende.

¹³ Ke kumanyishabu Tamare difika dia tatuende muenu Yuda mu Timna bua bakose miosa ya mikoku yende.

¹⁴ Tamare kuvula bilamba bia lufuila, kusuika tshitambala mu mpala, kuya kusomba ku tshibuelelu tshia Enayime ku njila udi muye ku Timna. Tamare uvua mumanye ne: bayende tshina Shela, uvuaye muindile, ukavua mumane kukola. Kadi kabavua basue bua Shela amupiane to.

¹⁵ Yuda umona Tamare, kuela meji ne: mmukaji mudisombele, bualu uvua musuike tshitambala mu mpala.

¹⁶ Yuda kutantshila kudi Tamare ku muelelu wa njila, umuambila ne: — Ndi musue tuye nebe. Yuda uvua umuambisha, bualu kavua mumanye ne: mmukaji wa muanende Ere to. Tamare kuandamuna ne: — Kadi neungonde tshinyi?

¹⁷ Yuda kumuandamuna ne: — Nenkonde lukungulu lua mbuji lua ku bimuna bianyi. Tamare kuanyisha, umulomba ne: — Kadi wanji kungeyeka tshintu bua nshale mutekemene.

¹⁸ Yuda kumukonka ne: — Udi musue nkueyeka tshinyi? Tamare kumuambila ne: — Ungeyeke tshitampi tshiebe tshia mu nshingu, ne nshinga uudi mutshiela. Ungeyeke kabidi dikombu diebe. Yuda kumupesha bintu abi. Kumubuelelaye mu nzubu. Tamare kuimita difu.

¹⁹ Tamare upingana kuabu, kuvulaye tshitambala. Kuvualaye tshiakabidi bilamba biende bia lufuila abi.

²⁰ Yuda kutuma mulunda wende Ira wa mu Adulame ne mbuji wa lukungulu bua kupikula bintu biende bivuaye mueyeke mukaji awu. Kadi Ira kena musangane mukaji awu kabidi to.

²¹ Kuebejaye bena mu Enayime ne: — Mukaji mudisombele uvua pa buipi apa ku muelelu wa njila eku, udi penyi? Kumuandamunabu ne: — Muetu munu kamuena mukaji mudisombele to.

²² Ira kupingana kudi Yuda, umuambila ne: — Tshiena musangane mukaji awu to. Kabidi bena musoku badi bajadika ne: katshia muabu kamuvua mukaji mudisombele to.

²³ Yuda kuamba ne: — Mvua mutumine mukaji ewu mbuji umvua mumulaye. Mbikumbane. Patupu, bantu nebatuseke. Paudi mumukebe kuyi mumusangane, nanku alame bintu bidiye nabi abi.

²⁴ Kupita anu ngondu isatu muntu kampande kuambila Yuda ne: — Tamare, mukaji wa muanebe, ukadi mudisombele. Kabidi udi mumane kuimita ne difu. Yuda kutuma diyi ne: — Bamupatule pa mbelu, bamoshe mu kapia, abutuke.

²⁵ Patshi wabu bapatula Tamare pa mbelu, kutuminaye tatuende muenu mukenji ne: — Joja bintu abi: tshitampi, nshinga ne dikombu mbia muena difu dindi muimite. Ukebe muntu awu!

²⁶ Yuda umona bintu abi, kubimanyaye. Kuambaye ne: — Mukaji ewu mmunemeke mikenji, mmuenze bimpe, mumpite ne meme mene. Bushuwa uvua ne bua kuikala mukaji wa muananyi Shela. Nanku ndi muenze bibi padi muananyi kayi mumupiane. Kashidi Yuda kena mubuelele kabidi Tamare mu nzubu to.

²⁷ Dituku divua Tamare ulela, bantu kumona ne: nealele bana ba mapasa.

²⁸ Muana kupatula diboku, muleleshi kudikuata, kusuikaku kakaba kakunze, wamba ne: — Ewu ke Mbuyi.

²⁹ Mbuyi upingaja diboku, Kanku kupatuka. Muleleshi kukatshila bikole, wamba ne: — Mmudibambe mushindu kayi? Yuda kumuinyika dina ne: Perese, mmumue ne: Tshidibamba.

³⁰ Pashishe Tamare kulela Mbuyi uvua ne kakaba kakunze ku diboku. Yuda kumuinyika ne: Zera.