Genese 37 - MUKANDA WA MYIDI MUKULU

YOZEFE Yozefe udi ulota bilota

¹ Yakobe uvua muye kusomba mu ditunga dia Kenaane, muaba uvua tatuende Izake musombe ku kale.

² Malu a bana ba Yakobe adi nunku: Yozefe ukumbaja bidimu dikumi ne muanda mutekete, kuyaye kudisha bimuna bia tatuende, pamue ne bakulu bende, kabidi ne bana ba Bila ne ba Zilpa, bakaji bapika ba tatuende. Kadi Yozefe uvua wambila tatuende malu mabi onsu a bana babu.

³ Ku bana bende bonsu, Yakobe uvua mupite kunanga Yozefe, bualu mmuana uvuaye mulele ku bukunda. Nanku uvua mumuteleshile tshinkutu tshia mushinga mukole.

⁴ Bana babu bamone muvua tatuabu mutambe kunanga Yozefe, kujilabu muanabu, kabayi mua kuyukila nende kakuyi matandu.

⁵ Dituku dikuabu, Yozefe uvua mulote tshilota, kutshiawila bana babu. Bumvue tshilota atshi, kupitabu kumukina.

⁶ Yozefe kubambila ne: — Telejayi tshilota tshindi mulote.

⁷ Tuvua baye bonsu kunowa bia mu madimi. Tuvua tusuika bisumbu bia bikunyibua bivua ne ntete ya kuenza bukula. Diakamue tshisumbu tshianyi kubanduluka kuimana. Bisumbu bienu bionsu kutshiela munkatshi, bitshikukuila.

⁸ Bakulu bende kumukonka ne: — Udi musue kushala mukalenga wetu, ututumina diyi anyi? Ke kupitabu kumufikila munda bikole bua tshilota atshi ne bua bivuaye wamba abi.

⁹ Yozefe kulota tshilota tshikuabu, kutshiawila bana babu, ubambila ne: — Mvua mulote: diba, ngondu ne mitotu dikumi ne umue bilua kunkukuila.

¹⁰ Yozefe kuawila kabidi tatuende tshilota atshi. Awu kumutandisha, wamba ne: — Atshi ntshilota kayi? Udi musue ne: meme, mamuebe ne bana benu bonsu tukutuile binu anyi?

¹¹ Bana babu ne Yozefe kumunwuila lubabu. Kadi tatuende uvua anu uvuluka misangu mivule bilota abi.

Bana babu ne Yozefe badi bamupana

¹² Bana babu ne Yozefe bavua baye kudisha bimuna bia tatuabu pabuipi ne Shekeme.

¹³ Yakobe kuambila Yozefe ne: — Ndi musue kukutuma ku Shekeme, kudi bana benu badisha bimuna. Yozefe kuitaba ne: — Eyowa. Untume.

¹⁴ Tatuende kumuambila ne: — Uye kumona bana benu ne bimuna: ne badi ne bukole bua mubidi. Pashishe upingane bua kungambila. Ke muvua tatuende umutuma ku luendu lule lua kumuka mu tshibandabanda tshia Ebrone, kuya mu Shekeme.

¹⁵ Yozefe ufika mu mpata, kupambukaye mu njila. Muntu kampande kumukonka ne: — Udi ukeba tshinyi?

¹⁶ Yozefe kuandamuna ne: — Ndi nkeba bana betu. Udi mua kundeja muaba udibu badishila bimuna anyi?

¹⁷ Muntu awu kuambila Yozefe ne: — Kabatshiena apa to. Mvua mumvue muvuabu bambilangana bua kuya luseke lua Dotane. Yozefe kulonda bana babu, kubasangana ku Dotane.

¹⁸ Bana babu ne Yozefe kumumuena utshidi ku bule, kayi muanji kufika padibu nansha. Kumuelelebu tshifufu tshibi bua kumushipesha.

¹⁹ Kuambilanganabu ne: — Muena ndota wafiki,

²⁰ tumushipe, tuimanshe tshitalu tshiende mu tshiina. Nefushime ne: mbamudie kudi nyama wa lonji. Nanku netumone tshidi bilota biende bimuenzela.

²¹ Rubene umvua nanku, kukebaye muyilaye mua kupandisha Yozefe. Kuambilaye bana babu ne: — Katumushipi to.

²² Katuedi mashi panshi to. Tumuelayi mu tshiina tshidi mu tshipela emu. Kadi katumushipi nansha. Rubene uvua wamba bionsu ebi, bualu uvua musue kupandisha Yozefe bua kumufikisha ne muoyi kudi tatuende.

²³ Yozefe ufika muaba uvua bana babu, kumukuatabu, kumukopolabu tshinkutu tshiende tshimpe.

²⁴ Kumuelabu mu tshiina tshivua katshiyi ne mayi.

²⁵ Pashishe kusombabu bua kudia. Bakenzakana, kumonabu tshisumbu tshia bena Ismayele, bafuma ku ditunga dia Ngilaade baya ku Ejipitu. Tumelu tuabu tuvua tuambule manananshi a mupuya muimpe a mishindu mishilangane.

²⁶ Yuda kukonka bana babu ne: — Tuetu bashipe muanetu ewu, basokoke bualu ebu, netupete tshinyi?

²⁷ Katumushipi nansha, bualu mmuanetu. Tudi bantu bamue. Kadi tumusumbishe kudi bena Ismayele aba. Bana babu kuitaba.

²⁸ Pamonubu bangenda mushinga ba bena Madiyane bapita, kupatulabu Yozefe mu tshiina, kumusumbishabu kudi bena Ismayele ku nkanu ya tshiamu tshitoke tshia mushinga mukole makumi abidi. Bena Ismayele kuya nende mu Ejipitu.

²⁹ Rubene uya kutangila mu tshiina, kena musangane Yozefe to. Kupampakanaye bikole, kupanda bilamba biende.

³⁰ Kuyaye kudi bana babu, ubambila ne: — Yozefe kena mu tshiina to. Kadi meme nengenze tshinyi mpindiewu?

³¹ Bana babu ne Yozefe kutua tshinkutu tshia Yozefe mu mashi a mbuji wa mpumbu uvuabu bakose muminu.

³² Kutshitumabu kudi tatuabu ne mukenji, bamba ne: “Kenketa tshilamba tshitudi bangule etshi. Ntshifuanangane ne tshinkutu tshia muanebe Yozefe anyi?”

³³ Tatuende umona tshilamba atshi, kujadika ne: — Bushuwa, ntshilamba tshia muananyi Yozefe. Nyama wa lonji mmumudie, mumusunsule.

³⁴ Yakobe kudipanda bilamba, kuvuala bilamba bikayabale, kuenza madilu a muanende matuku mavule.

³⁵ Bana bende ba balume ne bakaji kufika bua kumusamba. Yakobe kubenga, wamba ne: “Ndi ndila amu Yozefe too ne mungafua.” Ke muvua Yakobe mutungunuke ne madilu a muanende Yozefe nanku.

³⁶ Bena Madiyane kusumbisha Yozefe mu Ejipitu kudi Potifare, muntu uvuabu batekemena bikole kudi Mukalenga wa bena Ejipitu. Uvua kabidi mulombodi wa bena mvita bende.