Genese 35 - MUKANDA WA MYIDI MUKULU

Yakobe udi umuangala ku Shekeme, uya ku Betele

¹ Dituku dikuabu Mvidi Mukulu kuambila Yakobe ne: — Juka, uye kuasa ku Betele. Ungashileku tshilambuilu, bualu ke muaba umvua mukumuenekele pauvua unyema muanenu Esawu.

² Yakobe kuambila bena diku diende ne bantu bende ne: — Dilongololayi. Umushayi mvidie ya bisamba bikuabu idi munkatshi muenu. Dikobololayi, nuvuale bilamba bikuabu.

³ Dilongololayi, tuyayi ku Betele. Nengashileku Mvidi Mukulu tshilambuilu, bualu uvua mungambuluishe pamvua mu dikenga dikole. Uvua mundame miaba yonsu imvua nya.

⁴ Nanku bantu bonsu kumupesha mpingu yonsu ivua ileja mvidie ya bisamba bikuabu ivuabu nayi, kumupesha kabidi ne tukanu tua ku matshi tavuabu natu. Yakobe kubijika bionsu muinshi mua mutshi wa lusanga udi pabuipi ne tshimenga tshia Shekeme.

⁵ Yakobe ne bonsu bavuaye nabu, kumukabu muaba awu. Mvidi Mukulu kukuatshisha bantu bonsu ba mu bimenga bivua nabu mutumba bowa bukole. Kupangabu mua kulondakaja Yakobe ne bana bende.

⁶ Ke Yakobe ne bena diende bonsu kufika mu Luze, udibu babikila mpindiewu ne Betele, mu ditunga dia Kenaane.

⁷ Yakobe kuashilamu Mvidi Mukulu tshilambuilu. Kutshinyika dina ne: Mvidi Mukulu wa mu Betele, bualu muaba awu ke uvua Mvidi Mukulu mumumuenekele diba divuaye unyema muanabu Esawu.

⁸ Anu dituku adi Debora, ndeji wa Rebeka, kufua. Kumujikabu muinshi mua mutshi wa lusanga udi pabuipi ne Betele. Batshidi babikila lusanga alu ne: “Lusanga lua muadi.”

⁹ Yakobe ufuma ku Mezopotamiya, Mvidi Mukulu kumumuenekela tshiakabidi, kumuela lupemba.

¹⁰ Mvidi Mukulu kumuambila ne: — Kabena bakubikila kabidi ne: Yakobe to. Mpindiewu nebakubikile ne: Izrayele. Nanku Mvidi Mukulu kumuinyika ne: Izrayele.

¹¹ Kumuambila ne: — Ndi Mvidi Mukulu wa bukole buonsu. Utante, uvulangane, wikale nkambua wa bisamba bia bungi, bakalenga nebafume ku ndelanganyi yebe.

¹² Wewe ne ndelanganyi yebe, ndi nnupesha ditunga dimvua mulaye Abrahame ne Izake. Nenku nendipeshe kabidi ndelanganyi yebe.

¹³ Mvidi Mukulu kumuka muaba uvuaye uyukidila ne Yakobe.

¹⁴ Yakobe kuimanyika dibue muaba awu, kuela manyi ne maluvu a mulambu pa dibue adi bua kudijidila.

¹⁵ Yakobe kuinyika muaba awu ne: Betele, mmomumue ne: Nzubu wa Mvidi Mukulu (muaba uvua Mvidi Mukulu muyukile nende).

Diledibua dia Binyamine ne Lufu lua Rakele

¹⁶ Yakobe ne bena diende kumuangala ku Betele. Kabayi banji kufika ku Efrata, Rakele kulela muana. Kadi kulela aku kuvua kukole!

¹⁷ Nanku pavua Rakele ulela muana ukenga bikole, muleleshi kumuambila ne: — Kutshinyi to. Muana ngua balume kabidi.

¹⁸ Rakele ulela, kushala ukengakana ne lufu. Pa kukulaye muoyi, kuinyikaye muana awu ne: Benoni, mmumue ne: Makenga. Kadi Yakobe, tatuende kumuinyika ne: Binyamine, mmumue ne: Diboku dia bukole.

¹⁹ Rakele ufua, kumujikabu ku muelelu wa njila udi muye ku Efrata, muaba udibu binyika mpindiewu ne: Betleyeme.

²⁰ Yakobe kuimanyika dibue pa lukita luende alu. Dibue adi too ne lelu, batshidi badibikila ne: “Dibue dia pa lukita lua Rakele.”

²¹ Yakobe kumuangala muaba awu, kuya kuasa mitanda yende dishiya dia Migdale-Edere.

²² Pavua Yakobe musombe muaba awu, Rubene kubuelela Bila, mukaji mupika wa tatuende, mu nzubu. Yakobe kumanya bualu abu, kunyingalala bikole. Bana ba balume bonsu ba Yakobe bavua dikumi ne babidi.

²³ Leya uvua ne bana ba balume basambombu: Rubene, ke muanabute, bamulonda kudi Shimeyone, Levi, Yuda, Isakare ne Zebulone.

²⁴ Rakele uvua ne bana ba balume babidi: ke Yozefe ne Binyamine.

²⁵ Bila mukaji mupika wa Rakele uvua mulele bana ba balume babidi: ke Dane ne Naftali.

²⁶ Zilpa mukaji mupika wa Leya uvua mulele bana ba balume babidi: ke Ngade ne Ashere. Bana bonsu aba ba balume ke bavua Yakobe mulele mu Mezopotamiya.

²⁷ Yakobe kuya kudi tatuende Izake mu Mambre pabuipi ne Kiriyate-Arba, muaba udibu babikila lelu ne: Ebrone. Ke muaba uvua Abrahame ne Izake basombe kale.

²⁸ Izake uvua ne bidimu lukama ne makumi muanda mukulu,

²⁹ kufuaye, mumane kulala panu nuboboke. Kulondaye bankambua bende. Kumujikabu kudi bana bende Esawu ne Yakobe.