Genese 33 - MUKANDA WA MYIDI MUKULU

Yakobe udi usambakena ne Esawu

¹ Yakobe ukenzakana, kumona Esawu umutantshila, muikale ne bantu nkama inayi. Yakobe kuteka Leya ne bana bende pa nkayabu, Rakele ne muanende Yozefe pa nkayabu, bakaji bende babidi bapika pa nkayabu ne bana babu.

² Yakobe kuimanyika bakaji bende bapika abu ne bana bavuabu balele kumpala kua mulongu. Kulondabu kudi Leya ne bana bende, pashishe kudi Rakele ne muanende Yozefe.

³ Yakobe kupita kumpala kuabu bonsu, kudiela panshi misangu muanda mutekete, usemena kudi mukuluende Esawu.

⁴ Ke Esawu kunyema lubilu kumupukila. Bonsu babidi kudila muadi.

⁵ Esawu ubanduluka, kumona bakaji ne bana. Kukonka Yakobe ne: — Baudi muende nabu mbanganyi? Yakobe kuandamuna ne: — Mbana bandi mupete ku luse lua Mvidi Mukulu.

⁶ Bakaji bapika ba Yakobe kufika muaba awu ne bana, kudiela panshi.

⁷ Leya ne bana bende kufika, kudielabu panshi. Pashishe Yozefe ne Rakele kudiela panshi.

⁸ Esawu kukonka Yakobe ne: — Bimuna bionsu bindi musambakene nabi, tshiudi musue kuenza nabi ntshinyi? Yakobe kuandamuna ne: — Ndi mukutuminabi bua umfuile luse.

⁹ Esawu kuambila Yakobe ne: — Muakunyanyi, ndi ne bintu bikumbane. Shala ne biebe ebi.

¹⁰ Yakobe kutendakena Esawu ne: — Bu wewe musue, umfuile luse. Angata mulambu undi mukutuadile ewu, bua kujadika muudi mumane kumfuila luse. Kabidi pandi nkutangila, ndi bu mumone Mvidi Mukulu wanyi bua luse lunene luudi mumfuile.

¹¹ Ndi nkusengelela ne: angata mulambu undi mukutuadile ewu, bualu Mvidi Mukulu wanyi mmumpe bintu bia bungi. Yakobe kunanukila bikole. Esawu kuitaba.

¹² Esawu kuambila Yakobe ne: — Jukayi tuye. Netuende nebe.

¹³ Yakobe kuandamuna ne: — Udi mumanye ne: ndi ne bana bapuekele. Mikoku ne ngombe kabidi bidi ne bana batshidi bamua mabele. Kabiena mua kuenda lukasa lukasa to. Patupu, mu luendu lukole, nansha lua dituku dimue, bidi mua kufua bionsu.

¹⁴ Nanku ndi nkutendakena ne: Udianjile kumpala. Meme ndi nkulonda bitekete bitekete, bilondeshile luendu lua bana ne lua bimuna bindi nabi, too ne patuapetangana mu ditunga dia Seyire.

¹⁵ Esawu kuandamuna Yakobe ne: — Nanku ndi nkushila bantu banyi bakuabu. Yakobe kubenga ne: — Kabena ne tshidibu bangenzela to. Muudi mumane kumfuila luse mbikumbane.

¹⁶ Esawu kuya ku Seyire.

¹⁷ Kadi Yakobe kuya ku Sukote. Kuasayemu nzubu, kuibakilamu kabidi bimuna bikumbi. Ke padibu babikila muaba awu ne: Sukote, mbuena kuamba ne: bikumbi.

Yakobe udi uya kusomba pabuipi ne Shekeme

¹⁸ Yakobe ufumina ku tshitupa tshia Mezopotamiya tshia ku mutu kua misulu, kufikaye anu bimpe mu ditunga dia Kenaane mu tshimenga tshia Shekeme. Kuasaye mitanda pabuipi ne tshimenga atshi.

¹⁹ Yakobe kusumba muaba uvuaye muase ntenta wende, kudi bana ba Amore, muashi wa tshimenga atshi, ku mushinga wa nkanu lukama ya tshiamu tshitoke tshia mushinga mukole.

²⁰ Kuasaye tshilambuilu muaba awu, kutshinyika ne: Ele, mmomumue ne Mvidi Mukulu wa bena Izrayele.