Genese 31 - MUKANDA WA MYIDI MUKULU

¹ Yakobe kumvua bana ba Labane bamujana, bamba ne: “Yakobe mmunyenge bubanji buonsu bua tatu. Bintu bionsu bidiye nabi mbifumine anu ku bubanji buonsu bua tatu budiye munyenge.”

² Yakobe kumona kabidi mpala wa Labane mubinduluke, katshiyi bu mu wabu nende diambedi.

³ Ke Maweja-Nangila kuambila Yakobe ne: — Pingana kuenu, mu diku dia baledi bebe. Meme nengikale nebe.

⁴ Yakobe kubikidisha Leya ne Rakele mu budimi muvuaye ne bimuna biende.

⁵ Kubambilaye ne; — Ndi mumone ne mpala wa tatuenu mmubinduluke. Katshiena bu mutuvua nende diambedi to. Kadi Mvidi Mukulu wa nkambua wanyi uvua nanyi.

⁶ Nudi bamanye mundi mukuatshile tatuenu mudimu ne bukole buanyi buonsu.

⁷ Tatuenu kunshima, kushintula difutu dianyi misangu dikumi. Kadi Mvidi Mukulu kavua musue bua tatuenu ankengeshe to.

⁸ Pavua tatuenu ungambila ne: “Bimuna bidi ne matoba nebikale difutu diebe,” bimuna bikaji bionsu bivua bilela bana ne matoba pambidi. Pawaye ungambila ne: “Bimuna bidi ne mipolu nebikale difutu diebe,” bimuna bikaji bionsu bivua bilela bana ne mipolu pambidi.

⁹ Nanku anu Mvidi Mukulu nkayende ngudi munnyengele bimuna kudi tatuenu.

¹⁰ Bualu pavua bimuna bia bimpanga ne bia mashina bikuatangane, mvua ndota tshilota, mmona mbuji nansha mikoku ya bimpanga, bivua bikuata mashina, bikale anu ne matoba, ne mipolu pambidi.

¹¹ Mu tshilota atshi Mutumibue wa Mvidi Mukulu kumbikila ne: “Yakobe!” Meme kuitaba ne: “Ke meme ewu.”

¹² Mutumibue awu kungambila ne: “Tangila: mikoku nansha mbuji yonsu ya mpumbu idi ne mipolu ne idi ne matoba idi ikuata mashina. Ndi muenze nanku, bualu ndi mumone malu onsu adi Labane mukuenzele.

¹³ Meme ndi Mvidi Mukulu uvua mukumuenekele ku Betele, pauvua mufite manyi pa mutu pa dibue diu-vua muimanyike bua dikale muaba wa tshijila. Muaba awu uvua mudifile kabidi kundi, mundaye bualu bunene. Juka, umuka apa, upingane mu ditunga dienu.”

¹⁴ Rakele ne Leya kuambila Yakobe ne: — Tuetu katuena kabidi batekemene bintu bia bumpianyi mu nzubu mua tatu to.

¹⁵ Tatu mmutuangate bu bantu benyi, bualu mmutusumbishe, mudie ne biuma bietu.

¹⁶ Nanku bubanji buonsu budi Mvidi Mukulu munyenge tatu, mukupeshe wewe, mbuetu tuetu ne bua bana betu batudi balele. Enza malu onsu adi Mvidi Mukulu mukuambile.

¹⁷ Yakobe kujuka, kubandisha bakaji bende ne bana pa nyama ya tumelu.

¹⁸ Kuangataye bimuna biende ne bintu biende bionsu bivuaye mupete mu tshitupa tshia Mezopotamiya tshia ku mutu kua misulu. Kupinganaye mu ditunga dia Kenaane, muaba uvua tatuende Izake musombe.

¹⁹ Kadi pavua Labane muye kukosa miosa ya mikoku yende, Rakele kuiba mpingu ileja mvidie ivua bena diku dia tatuende Labane batendelela.

²⁰ Yakobe kunyema mu musokoku, Labane, muena Arame, kayi mumanye to.

²¹ Uvua munyeme ne bintu bionsu bivuaye mupete. Kusabukaye lukasa musulu wa Perate. Pashishe kuyaye ku mikuna ya Ngilaade.

²² Matuku asatu mamane kupita, muntu kampande kumanyisha Labane ne: “Yakobe mmunyeme.”

²³ Labane kubikila bena diende. Kulondakajabu Yakobe mu njila matuku muanda mutekete. Kumusanganabu ku mikuna ya Ngilaade.

²⁴ Butuku abu Mvidi Mukulu kumuenekela Labane muena Arame mu tshilota, umukandika ne: — Udimuke, kukengeshi Yakobe ku bualu nansha bumue.

²⁵ Labane kusangana Yakobe mumane kuasa ntenta yende mu mikuna ya Ngilaade. Labane ne bena diende kuasa kabidi yabu mitanda ku mikuna aku.

²⁶ Labane kukonka Yakobe ne: — Tshiudi mungenzele nunku ntshinyi? Udi mundinge bualu kayi? Bua tshinyi udi munyeme ne bana banyi ba bakaji bu bapika banyenga mu mvita?

²⁷ Bua tshinyi udi munshime, munyeme mu musokoku, katuyi balayangane nebe. Bu wewe mudianze kungambila, mvua nkushindikija ne misambu ya disanka, tuimbe bisanji ne ngoma.

²⁸ Kuvua nansha musue bua meme kulayangana ne bana banyi ba bakaji, kabidi ne bikulu banyi? Udi muenze anu bu muntu mutatakane.

²⁹ Meme ndi mua kukuenzela bibi. Kadi Mvidi Mukulu wa tatuebe Izake mmunkandike butuku bua lelu ne: “Udimuke, kukengeshi Yakobe ku bualu nansha bumue.”

³⁰ Nanku uvua musue kupingana kuenu bua kumonangana ne baledi bebe. Mbimpe! Kadi udi muibe mpingu ya mvidie indi ntendelela bua tshinyi?

³¹ Yakobe kuandamuna Labane ne: — Ndi mukunyeme, bualu mvua ntshina ne: udi mua kunnyenga bana bebe ba bakaji ku bukole.

³² Kadi wewe musangane muntu ne mpingu ya mvidie yebe, muntu awu neafue. Ukebe bimpe mu bintu bianyi bionsu, bena diku diebe bonsu batangile. Wewe musangane bintu biebe bikuabu, ubiangate, uye nabi. Yakobe uvua wamba nanku, bualu kavua mumanye ne: Rakele muibe mpingu ya mvidie ivua bena diku dia tatuende batendelela.

³³ Labane kukalula ntenta ya Yakobe ne ya Leya ne ya bakaji bapika babidi. Kadi kena mupete tshintu to. Kupatukaye mu ntenta wa Leya, kubuela mu ntenta wa Rakele.

³⁴ Rakele uvua muangate mpingu ayi, muyisokoke muinshi mua biseba bivua bitenteka pa kamelu, musombapu. Labane kukala mu nzubu muonsu. Kena mupete mpingu mu ntenta wa Rakele to.

³⁵ Rakele kuambila tatuende Labane ne: — Tatu, umfuile luse, tshiena ne mushindu wa kuimana kulu kumpala kuebe, bualu ndi ku tshijila tshia bakaji. Labane kukebulula mpingu bikole. Kadi kena muyipete to.

³⁶ Yakobe kufika munda, kutandisha Labane wamba ne: — Tshivua mukuenzele bualu bubi, nansha mubunde tshilumbu bua wewe kundondakaja mushindu ewu to.

³⁷ Udi musasule ntenta yanyi, kuyi musangane tshintu tshiebe nansha tshimue to. Wewe musangane tshintu tshiebe mu bintu bianyi, mbimpe! Utshiteke patoke bua bantu bebe ne banyi bakose tshilumbu atshi.

³⁸ Ndi mukukuatshile mudimu bidimu makumi abidi. Mbuji yebe nansha mikoku yebe kabivua bitula mafu to. Tshivua mudie bimpanga bia ku bimuna biebe.

³⁹ Tshimuna tshiebe tshionsu tshivuabu bashipe kudi nyama ya lonji, tshivua nkutuadilatshi to. Mvua mukufute tshikuabu. Tshimuna tshiebe tshivuabu bibe butuku nansha munda munya, uvua utshimfutshisha.

⁴⁰ Mvua nkenga bikole, munya ungosha matuku onsu. Butuku mashika avua ambuela ku muoyi, tshitabela tshingenza.

⁴¹ Tudi nebe kukadi bidimu makumi abidi. Ndi mukuenzele mudimu bidimu dikumi ne binayi, bua kusela bana bebe ba bakaji babidi, pashishe bidimu bisambombu bikuabu bua kupeta bimuna. Kadi wakashintulula difutu dianyi misangu dikumi.

⁴² Mvidi Mukulu wa nkambua wanyi Abrahame, ne Mvidi Mukulu uvua mukuatshishe tatu wanyi Izake bowa, kayi mungambuluishe, uvua mua kumpingaja kuetu bianza bitupu. Kadi Mvidi Mukulu uvua mumone mumvua mudipuekeshe, mumone kabidi mudimu mukole undi mukuenzele. Ke padi Mvidi Mukulu mumbingishe butuku buudi wamba abu.

⁴³ Labane kuambila Yakobe ne: — Bakaji bebe ne bana badibu balele mbanyi meme. Bimuna bionsu biudi mumone ebi ne bintu bionsu biudi nabi mbianyi meme. Kadi bu mundi tshiyi mua kuambuluisha kabidi bana banyi ne bikulu banyi biangatshile ku lelu,

⁴⁴ nanku tuetu nebe tutue ndondu. Muntu ajadike bitudi tuenza ebi.

⁴⁵ Nanku Yakobe kuimanyika dibue bu tshivulukilu tshia ndondu wabu.

⁴⁶ Pashishe Yakobe kuambila bena mudimu bende ne: “Unguijayi mushiki wa mabue muaba awu.” Kuenzabu nanku. Kutekabu biakudia pa mushiki wa mabue awu. Kudiabu bonsu pinapu.

⁴⁷ Labane kuinyika muaba awu ne: Yegare Sahaduta. Kadi Yakobe kuwinyika ne: Ngalede.

⁴⁸ Labane kuamba ne: — Biangatshile ku lelu, mushiki wa mabue ewu udi ujadika ndondu udi pankatshi petu nebe. Ke padibu babikila muaba awu ne: Ngalede. Mmumue ne: mushiki wa mujadiki.

⁴⁹ Labane kuambila kabidi Yakobe ne: — Maweja-Nangila atutentekele patuikala bamane kushiyangana nebe. (Ke kuinyikabu muaba awu dina ne: Mispa, mmomumue ne: kaleya ka mutentekedi.)

⁵⁰ Wewe mutatshishe bana banyi ba bakaji, musele bakaji bakuabu, wamanya ne: udi mujadike mutudi benzelangane nebe, ki muntu to, anu Mvidi Mukulu nkayende.

⁵¹ Pashishe Labane kuambila Yakobe ne: — Mona mushiki wa mabue undi ngunguija pankatshi petu, ne dibue edi dindi muimanyike.

⁵² Mushiki wa mabue ne dibue edi bidi bijadika ne: Meme ne wewe katuena mua kusambuka mabue aa ne meji a kuenzelangana bibi to.

⁵³ Mvidi Mukulu wa Abrahame ne wa Nahore akose nsambu yetu nebe. Pashishe Yakobe kuditshipa mu dina dia Mvidi Mukulu uvua mukuatshisha tatuende Izake bowa.

⁵⁴ Yakobe kulambula Mvidi Mukulu mulambu ku mukuna aku, kubikila bana babu bua kudiabu kaba kamue. Pashishe kulalabu ku mukuna aku.