Genese 3 - MUKANDA WA MYIDI MUKULU

Badi bipata bantu mu lupangu

¹ Nyoka uvua mudimuke mupite nyama yonsu ivua Maweja-Nangila Mvidi Mukulu mufuke. Nyoka kukonka mukaji ne: — Mbulelela menemene Mvidi Mukulu mmunukandike ne: kanudi bimuma bia mitshi yonsu idi mu lupangu anyi?

² Mukaji kuandamuna ne: — Tudi mua kudia bimuma bia mitshi yonsu idi mu lupangu.

³ Kadi bua bimuma bia mutshi udi munkatshi mua lupangu, Mvidi Mukulu mmutukandike ne: kanudi, kanulengi bua kanuvu kufua.

⁴ Nyoka kubenga wamba ne: — To, kanuena nufua nansha.

⁵ Mvidi Mukulu mmumanye ne: dituku dinuadia bimuma abi, mesu enu neatabale, mifuanangane nende, nujingulule malu mimpe ne mabi.

⁶ Mukaji umona ne: mutshi uvua muimpe kumona, bimuma biawu bimpe bua kudia, bifuana kupa muntu lungenyi, kupolaye tshimuma, kudia. Tshikuabu kupeshaye bayende, awu pende kudia.

⁷ Pashishe mesu abu bonsu babidi kutabala. Kujingululabu ne: tudi butaka. Kukuatakajabu mabeji a mutshi wa tshinyi bua kuvuala bu bilamba.

⁸ Dilolu kumvuabu Maweja-Nangila Mvidi Mukulu wendakana mu lupangu, mulume ne mukaji kubutama munkatshi mua mitshi ivua mu lupangu.

⁹ Maweja-Nangila Mvidi Mukulu kubikila mulume, kumukonka ne: — Udi penyi?

¹⁰ Mulume kuandamuna ne: — Pangumvu mikuma yebe mu lupangu, buowa kungenza, meme kubutama, bualu ndi butaka.

¹¹ Maweja-Nangila Mvidi Mukulu kumukonka kabidi ne: — Wakujinguluidi ne udi butaka nnganyi? Udi mumane kudia tshimuma tshia mutshi umvua mukukandike anyi?

¹² Mulume kuandamuna ne: — Anu mukaji uuvua mumpeshe ke udi muntuadile tshimuma, meme panyi kutshidia.

¹³ Maweja-Nangila Mvidi Mukulu kuebeja mukaji ne: — Tshiwenzedi nanku ntshinyi? Mukaji kuandamuna ne: — Nyoka mmundinge, meme panyi kudia tshimuma.

¹⁴ Maweja-Nangila Mvidi Mukulu umvua nanku, kuambilaye nyoka ne: — Wewe newenji nenku, ndi nkutshipa. Ku nyama yonsu anu wewe newikale ukoka difu panshi, kabidi neudie buloba matuku onsu audi ne muoyi.

¹⁵ Nenteke lukuna pankatshi pebe ne mukaji, pankatshi pa ndelanganyi yebe ne yende. Kabidi muana wa ku ndelanganyi ya mukaji neaboze mutu webe, wewe pebe neumusume ku tshikankanya.

¹⁶ Maweja-Nangila Mvidi Mukulu kuambila mukaji ne: — Pawimita difu nenkuvudijile makenga. Neulele bana anu mu dikenga. Kabidi, newikale utuma mwoyi webe anu kudi bayebe, yeye neikale mfumuebe.

¹⁷ Pashishe Maweja-Nangila Mvidi Mukulu kuambila mulume ne: — Bua pawitabi diyi dia mukajebe, wewe kudia tshimuma tshimvua mukukandike, ndi ntshipa buloba bua tshilema tshiuvua muenze. Tshiakudia tshiebe neutshipete anu pawenza mudimu mukole matuku onsu audi ne muoyi pa buloba.

¹⁸ Buloba nebukumenene meba ne mingonga. Neudie bisekiseki bia mu lupangu.

¹⁹ Neupete tshiakudia tshiebe anu ku tshisululu tshia mu mpala muebe, too ne pawapingana mu buloba bundi mukufuke nabu. Udi lupuishi, newandamuke kabidi lupuishi.

²⁰ Mulume kuinyika mukajende dina ne: Eva. Mmumue ne: “Mua-bana”, bualu yeye udi mamu wa bonsu badi ne muoyi.

²¹ Maweja-Nangila Mvidi Mukulu kuenzela mulume ne mukajende bilamba bia biseba bia nyama, kubavuadika.

²² Pashishe Maweja-Nangila Mvidi Mukulu kuamba ne: “Monayi, muntu wenji bu umue wa ku tuetu, watufuanyi ku dijingulula dia malu mimpe ne mabi. Mbimpe kumukandika bua kuolodi tshianza tshiende ku mutshi wa muoyi. Yeye mupole tshimuma, mutshidie neashale ne muoyi kashidi.”

²³ Maweja-Nangila Mvidi Mukulu kuipata muntu mu lupangu lua Edene bua aye kudima buloba, bualu buloba ke buvuaye mumufuke nabu.

²⁴ Maweja-Nangila Mvidi Mukulu mumane kuipata muntu mu lupangu lua Edene, kutekaye Bakerubine mu lupangu amu ne muela utema kapia. Bavua bimane ku tshibuelelu tshia lupangu luseke ludi diba dipatukila, bakandika bua muntu kafiki muaba uvua njila wa ku mutshi wa muoyi.