Genese 27 - MUKANDA WA MYIDI MUKULU

Izake udi wela Yakobe lupemba

¹ Izake mumane kukola mukalakaje, mesu ende kaavua amona kabidi bimpe to. Kubikilaye Esawu muanende muanabute ne: — Muananyi! Esawu kuitaba ne: — Ke meme ewu, tatu!

² Izake kumuambila ne: — Udi mumone ne: nkadi mununu, nkadi mikolu ku tshiina. Tshiena mumanye dituku dia lufu luanyi.

³ Angata bintu biebe bia bulembi, buta ne miketa. Uye mu dikeba, unshipele nyama.

⁴ Undambile nyama mushindu undi munange. Umpeshe bua meme kudia. Pashishe nenkuele lupemba, tshiyi muanji kukushiya.

⁵ Rebeka uvua muteleje muvua Izake uyukila ne muanende Esawu amu. Esawu mumane kuya mu tshisuku bua kukebela tatuende nyama,

⁶ Rebeka kuambila muanende Yakobe ne: — Ngumvu tatuebe wambila Esawu ne:

⁷ “Uye mu dikeba, unshipele nyama. Undambile mushindu undi munange. Umpeshe bua meme kudia. Pashishe nenkuele lupemba kumpala kua Maweja-Nangila, tshiyi muanji kunushiya.”

⁸ Nanku muananyi, teleja tshindi nkuambila, utshienze.

⁹ Ntuadile mbuji ibidi mimpe ya nkungulu, bua ndambile tatuebe munyinyi mushindu udiye musue.

¹⁰ Umupeshe munyinyi awu. Padiaye, neakuele lupemba, kayi muanji kutushiya.

¹¹ Yakobe kuandamuna mamuende Rebeka ne: — Esawu udi ne miosa ya bungi pambidi. Kadi meme tshiena nayi to.

¹² Misangu mikuabu tatu udi mua kumbabata pambidi, kunsangana ne: ndi muena dishima. Udi mua kungela mulawu pa mutu pa kungela lupemba.

¹³ Mamuende Rebeka kumuandamuna ne: — Muananyi, mulawu awu unkuate meme. Wewe enza anu tshindi mukuambile. Ntuadile mbuji ibidi mimpe ya nkungulu.

¹⁴ Yakobe kutuadila mamuende mbuji ayi. Rebeka kulambila Izake tshiakudia tshimpe tshivuaye musue.

¹⁵ Rebeka kuangata kabidi bilamba bia Esawu muanabute bivua mu nzubu, kubivuadika Yakobe, muana muakunyi.

¹⁶ Kumusuikaye kabidi biseba bia nkungulu ya mbuji abi pa maboku ne pa dikoshi.

¹⁷ Pashishe Rebeka kupesha Yakobe mampa ne munyinyi uvuaye mulambe.

¹⁸ Yakobe ufika ne biakudia abi kudi tatuende Izake, kumuamba ne: — Tatu. Awu pende kuitaba ne: — Eyowa! Kadi wewe udi nganyi? Udimanyishe!

¹⁹ Yakobe kuandamuna tatuende ne: — Ndi muanebe muanabute. Mbakumbaji tshiuvua mundombe. Ndi nkusengelela ne: juka, sombela apa. Udie munyinyi undi mukulambile. Ungele lupemba.

²⁰ Izake kumukonka ne: — Muananyi, wapetshi bimvua mukulombe anu lukasa lukasa nanku mushindu kayi? Yakobe kuandamuna ne: — Maweja-Nangila Mvidi Mukulu webe uvua muntutshishe dikasa dimpe mu njila.

²¹ Izake kumukonka ne: — Udi Esawu muanabute wanyi menemene anyi? Ndi nkusengelela ne: usemene apa, nkubabate.

²² Yakobe kusemena kudi tatuende Izake. Awu kubabata muanende, wamba ne: — Diyi ndimvuika bu dia Yakobe. Kadi bianza mbia Esawu.

²³ Izake kavua mua kujingulula kabidi Yakobe bimpe to, bualu maboku ende avua ne miosa bu a Esawu. Kadi Izake kayi muanji kuela Yakobe lupemba,

²⁴ kumukonkaye tshiakabidi ne: — Wewe udi Esawu muanabute wanyi menemene anyi? Yakobe kuitaba ne: — Eyowa, mmeme.

²⁵ Nanku Izake kuambila Yakobe ne: — Mpesha biakudia, ndia, nkuela lupemba. Yakobe kumupesha biakudia, kudiaye. Kumupesha kabidi ne maluvu kunuaye.

²⁶ Ke Izake kuambila Yakobe ne: — Muananyi, semena apa, ungupukile!

²⁷ Yakobe kupukila tatuende Izake. Izake, umvua mupuya wa bilamba bia muanende, kumuelaye lupemba, wamba ne “Mupuya wa muananyi wa balume, mmufuanangane ne mupuya wa budimi budi Maweja-Nangila mujingile diakalenga.

²⁸ Mvidi Mukulu akulokeshile dibungi dia mu diulu, akupeshe biakudia bia bungi mu madimi. Akupeshe ntete ya kuenza bukula ne maluvu bivule.

²⁹ Bisamba bia bantu bikukuatshile mudimu. Bantu bonsu bakukukuile. Wikale mfumu wa bana benu, bana benu ba mamuebe bakukukuile. Muntu udi ukuela lupemba, nebamuele lupemba. Muntu udi ukukebela diakabi, neikale muena diakabi.”

³⁰ Izake wela Yakobe lupemba kujika. Anu Yakobe ulayangana ne tatuende, mukuluende Esawu ufika ufumina mu tshisuku ku dikebela tatuende nyama.

³¹ Esawu kulambila tatuende biakudia, kumutuadila, wamba ne: — Tatu, ndi nkusengelela ne: juka, somba, udie munyinyi undi mukulambile, bua ungele lupemba.

³² Izake kumuebeja ne: — Udi nganyi? Wadimanyisha! Esawu kuandamuna ne: — Ndi Esawu, muanebe muanabute.

³³ Izake mukana kumukuata kapia, kukonkaye ne: — Uvua muntuadile munyinyi wa nyama wa mu bulembi, wewe kuyi muanji kufika nnganyi? Ndi mumane kudia bivuaye mundambile. Mbamuedi lupemba. Neashale nalu kashidi.

³⁴ Esawu umvua bivua tatuende wakula abi, kudilaye muadi mukole ne kanyinganyinga, wamba ne: — Tatu, ungele panyi lupemba.

³⁵ Izake kuambila Esawu ne: — Muakunyebe Yakobe mmufike kundi ne budimu bua bungi. Mbamujingidi diakalenga divua diebe wewe.

³⁶ Esawu kuandamuna ne: — Dina dia Yakobe ndimukumbane: “Bualu mmundimukile be,” mmundinge misangu ibidi. Musangu wa kumpala uvua mundinge. Kuangataye ku bukole bumuanabute buanyi. Lelu wandingi kabidi, wanyengi lupemba luwabu ne bua kungela meme. Kadi Esawu kukonka tatuende ne: — Kuena mua kungela panyi lupemba nansha lukese anyi?

³⁷ Izake kuandamuna Esawu ne: — Yakobe mmumane kushala mfumuebe. Bana benu bonsu nebikale bapika bende. Kabidi nkadi mumane kumupesha ntete ya kuenza bukula ne ya maluvu. Tshiena ne tshindi mua kukuenzela kabidi mpindiewu, muananyi.

³⁸ Esawu ukonka amu kukonka tatuende ne: — Udi mua kuela amu muntu umue lupemba anyi? Tatu wanyi, ungele ne meme panyi! Esawu uvua udila amu kudila.

³⁹ Nanku Izake kumuambila ne: “Wewe kuakusomba mu ditunga didi ne biakudia bia bungi, nansha mu buloba budi dibungi dipite kubolesha.

⁴⁰ Neupete biakudia, amu wewe muluangana mvita, newikale mupika wa muakunyebe Yakobe. Kadi neudipikule amu nkayebe. Neutshibule mutshi wa mujuwu, uvuaye mukuambuishe ku bukole, neuwumushe pa nshingu.”

Yakobe udi unyemena kua mansebende Labane

⁴¹ Esawu kufika munda bikole bua lupemba luvua Yakobe mumunyenge. Kuambaye ne: “Tatu mumane kufua, tuetu batangalaje madilu ende, nenshipe muakunyanyi Yakobe.”

⁴² Rebeka mumane kumvua meji avua Esawu nawu, kubikilaye Yakobe, umuambila ne: — Udimuke, mukuluebe Esawu mmukuelele meji a kukushipa bua kujikija tshiji tshiende.

⁴³ Nanku mpindiewu muananyi, itaba tshindi nkuambila. Umuke munu, uye kusomba mu Arane kua muanetu Labane.

⁴⁴ Ushaleku too ne pajika tshiji tshia mukuluebe Esawu.

⁴⁵ Pikala Esawu katshiyi uvuluka kabidi biuvua mumuenzele, nenkutumine muntu bua upingane muetu munu. Tshiena musue kunujimija bonsu babidi dituku dimue to.

⁴⁶ Ke Rebeka kuambila Izake ne: — Panu mpantonde, bualu bua bakaji ba bena Iti, badi muananyi Esawu musele. Kadi bu Yakobe mua kusela kabidi mukaji wa bena Iti, ndi mua kufua.