Genese 26 - MUKANDA WA MYIDI MUKULU

Izake ne Abimeleke

¹ Tshiyole tshikuabu tshia nzala kupatuka mu ditunga, tshishilangane ne tshia kumpala tshia mu tshikondu tshia Abrahame. Izake kuya mu Ngerare kua Abimeleke, mukalenga wa bena Peleshete.

² Maweja-Nangila kumuenekela Izake, umukandika ne: — Dikasa diebe kadidiatshi mu Ejipitu to. Kadi usombe anu mu ditunga edi dindi nkuleja.

³ Pawasomba mu ditunga edi, meme nengikale nebe, nkuela lupemba. Ditunga dijima edi nedishale diebe ne dia ndelanganyi yebe. Ke mundi nkumbaja bionsu bimvua mulaye tatuebe Abrahame.

⁴ Meme nemvudije ndelanganyi yebe bu mitotu ya kulu. Nempeshe ndelanganyi yebe ditunga dionsu edi. Kabidi mu dina dia ndelanganyi yebe, nengele bisamba bionsu bia pa buloba lupemba.

⁵ Bualu Abrahame uvua muitabe diyi dianyi, mukumbaje miaku ne mikenji bimvua mumuambile.

⁶ Izake kusomba mu Ngerare.

⁷ Bena ditunga kumona ne Rebeka uvua ne mpala muimpe. Kukonkabu Izake bua kujadika ne: Rebeka udi ku dibaka anyi mmudisombele. Bu muvua Izake utshina ne: bena ditunga badi mua kunshipa, kubadingaye ne: mmuanetu wa bakaji.

⁸ Izake mumane kushala mu ditunga adi matuku a bungi, dituku dikuabu Abimeleke, mukalenga wa bena Peleshete, uvua mutangile pa dididishi. Kumonaye Izake banaya ne mukajende Rebeka.

⁹ Abimeleke kubikidisha Izake, kumukonka ne: — Wewe mumanye bimpe ne: Rebeka mmukajanyi, uvua unshima ne: mmuanetu wa bakaji, bua tshinyi? Izake kuandamuna mukalenga Abimeleke ne: — Mvua ntshina ne: meme muambe ne: Rebeka mmukajanyi, badi mua kunshipa.

¹⁰ Abimeleke kuandamuna Izake ne: — Tshiudi mutuenzele nunku ntshinyi? Kadi bu muntu wa mu ditunga dietu emu muangate mukajebe, uvua mua kutubueja mu tshilumbu tshikole.

¹¹ Mukalenga Abimeleke kuelela bantu bende mukenji ne: — Muntu mukengeshe Izake nansha mukajende, neapete dinyoka dia lufu.

¹² Tshidimu atshi, Izake kukuna biakudia mu ditunga adi. Maweja-Nangila kumusankisha. Izake kupeta bintu bipite bungi. Pa tshintu tshimue tshivuaye mukune, kupetaye lukama.

¹³ Izake kushala mubanji,

¹⁴ kumuna bimuna, ngombe, mikoku ne mbuji. Uvua kabidi ne bena mudimu ba bungi. Bua bungi bua bintu biende, bena Peleshete kumvuila Izake lubabu.

Izake udi utua ndondu ne Abimeleke

¹⁵ Kujibikilabu ne buloba biina bia mayi bionsu, bivua bena mudimu ba tatuende Abrahame bumbule, patshivua Abrahame ne muoyi.

¹⁶ Ke Abimeleke kuipata Izake wamba ne: — Umuke mu ditunga dietu, bualu udi mutupite makanda.

¹⁷ Izake kuya kusomba mu tshibandabanda tshia Ngerare.

¹⁸ Izake kumbulula kabidi biina bia mayi, bivua tatuende Abrahame mumbule, patshivuaye ne muoyi, bivuabu bajibikile kudi bena Peleshete kunyima kua lufu luende. Izake kubinyika mena abi a kale, avua Abrahame mubinyike.

¹⁹ Dimue dituku, bena mudimu ba Izake kumbula tshiina mu tshibandabanda. Kupetabu mayi a mpokolu.

²⁰ Balami ba mikoku ba mu Ngerare, kubunda balami ba mikoku ba Izake, bamba ne: — Mpokolu wa mayi ewu nguetu. Izake kuinyika mpokolu ewu dina ne: “Matandu” (Esheke), bualu bavua bamukeba matandu.

²¹ Bena mudimu ba Izake kumbula tshiina tshikuabu. Matandu kujuka kabidi bua tshiina atshi. Izake kutshinyika dina ne: “Lukuna” (Sitna).

²² Kumukaye muaba awu. Kumbulaye tshiina tshia mayi tshisatu muaba mukuabu. Kadi kabena batandangana kabidi bua tshiina atshi to. Izake kutshinyika dina ne: “Ditanta” (Rehobote). Kuambaye kabidi ne: “Mpindiewu Maweja-Nangila wanyishi bua tutante, tuwlangane mu ditunga emu.”

²³ Izake kumuka kabidi muaba awu, kuya ku Bersheba.

²⁴ Butuku abu Maweja-Nangila kumumuenekela, umuambila ne: — Kutshinyi! Ndi Mvidi Mukulu wa tatuebe Abrahame. Ndi nebe. Nenkuele lupemba. Nemvudije ndelanganyi yebe, bualu mvua munange muntu wanyi Abrahame.

²⁵ Izake kuenza tshilambuilu, kutendelela Mvidi Mukulu, utela dina dia Maweja-Nangila. Kuibakaye ntenta yende. Bena mudimu bende kumbula tshiina tshia mayi tshikuabu.

²⁶ Abimeleke kuangata mulunda wende Ahuzate ne Pikole, mulombodi wa bena mvita bende. Kumukabu mu Ngerare bua kuya kumonangana ne Izake.

²⁷ Izake kubakonka ne: — Nuenu nuvua bambenge, bangipate mu ditunga dienu. Nudi bandonde kabidi muaba ewu bua tshinyi?

²⁸ Abimeleke ne bavuaye nabu kuandamuna ne: — Tudi tukulonda bualu tudi bajadika ne: Maweja-Nangila udi nebe. Ke patuedi meji ne: mbimpe tumvuangane nebe, tutue ndondu.

²⁹ Tudi tukusengelela ne: uditshipe bua kutuenzedi bibi nansha. Tuetu kabidi katuvua bakukengeshe to. Tuvua bakuenzele bimpe. Wewe kumuka mu ditunga dietu ne ditalala. Mpindiewu Maweja-Nangila mmukututshishe dikasa dimpe.

³⁰ Izake kubalongoluela biakudia. Kudiabu, kunuabu.

³¹ Butshia dinda, kuditshipabu ku muntu ku muntu. Izake kulayangana nabu, kakuyi kadiwu.

³² Anu dituku adi, bena mudimu ba Izake kumuambila ne: — Tudi bumbula tshiina tshipiatshipia, tuapetshi mayi.

³³ Izake kuinyika tshiina atshi dina ne: “Mutshipu.” Ke padibu babikila tshimenga atshi too ne ku lelu ne: Bersheba. Mmumue ne: tshina tshidi muaba utudi baditshipila.

Esawu udi uselangana

³⁴ Esawu mumane kukumbaja bidimu makumi anayi, kuselaye bakaji babidi: Yehudite, muana wa Beri, muena Iti, ne Basmate, muana wa Elone, muena Iti kabidi.

³⁵ Bakaji aba kukengesha Izake ne Rebeka bikole.