Genese 25 - MUKANDA WA MYIDI MUKULU

Lufu lua Abrahame. Ndelanganyi yende mikuabu

¹ Abrahame kusela mukaji mukuabu, dina diende Ketura.

² Mukaji awu kumulelela bana basambombu: Zimrane, Yokshane, Medane, Madiyane, Ishebake ne Shuwa.

³ Yokshane ke tatuende wa Saba ne wa Dedane. Ndelanganyi ya Dedane ivua nunku: Bena Ashure, bena Letushe, ne bena Leyume.

⁴ Madiyane uvua mulele bana ba balume batanu: Efa, Efere, Anoke, Abida ne Elda. Bana aba ke ndelanganyi yonsu ya Ketura.

⁵ Abrahame kupesha Izake bia bumpianyi bionsu bivuaye nabi.

⁶ Patshivuaye ne muoyi, kupeshaye bana bavuaye mulele ne bakaji bakuabu, biabu bintu bia bumpianyi. Kadi kubumushaye mu ditunga divua Izake. Kubatumaye mu ditunga dia ku luseke ludi diba dipatukila.

⁷ Abrahame mumane kukulakaja, mukumbaje bidimu lukama makumi muanda mutekete ne bitanu,

⁸ kutuilaye mu diakalenga, kulonda bankambua bende.

⁹ Bana bende Izake ne Ismayele kumujika mu lubuebue lua Makpela luvua pabuipi ne Mambre, mu budimi bua Efrone, muana wa Sohare, muena Iti.

¹⁰ Ke budimi buvua Abrahame musumbe kudi bena Iti. Ke mu wabu bamujike pabuipi ne muena kuende Sara.

¹¹ Abrahame mumane kufua, Izake kuya kusomba pabuipi ne tshiina tshia mayi tshia Lahayi-Royi. Mvidi Mukulu kumuela lupemba mu malu onsu.

¹² Eyi ke ndelanganyi ya Ismayele, muana wa Abrahame, uvuaye mulele ne Agare, muena Ejipitu, uvua ukuatshila Sara mudimu.

¹³ Muanabute uvua Nebayote, balonda kudi Kedare, bamutua mu nyima kudi Adbeyele ne Mibsame,

¹⁴ Mishema, Duma, Masa,

¹⁵ Adade, Tema, Yeture, Nafishe, uvua mushile Kedma dibela.

¹⁶ Ke muvua mena a bana ba balume dikumi ne babidi ba Ismayele nanku. Bobu aba ke bankambua ba bisamba. Bantu binyikile misoku ne miaba ya kusomba mu mitanda mena abu.

¹⁷ Ismayele mumane kukumbaja bidimu lukama makumi asatu ne muanda mutekete, kulondaye bankambua bende mu lufu.

¹⁸ Ndelanganyi ya Ismayele ivua miase pankatshi pa Avila ne Shure. Shure udi pabuipi ne Ejipitu, mu njila wa ku Ashure. Ndelanganyi ayi kayivua misombe muaba umue ne ndelanganyi mikuabu ya Abrahame to.

YAKOBE Diledibua dia Esawu ne Yakobe

¹⁹ Malu a Izake, muana wa Abrahame, adi nunku:

²⁰ Izake mumane kukumbaja bidimu makumi anayi, kuselaye Rebeka, muana wa Betuyele, muena Arame, mufumine ku tshitupa tshia Mezopotamiya tshia ku mutu kua misulu. Rebeka uvua ne muanabu wa balume, dina diende Labane.

²¹ Kadi bu muvua Rebeka muikale nkumba, Izake kutendelela Maweja-Nangila bua mukajende awu alele muana. Maweja-Nangila kuitaba dilomba adi. Rebeka kuimita difu dia bana ba mapasa.

²² Bana abu bavua baluangana bikole munda mua mamuabu. Rebeka kudiebeja ne: — Malu a mushindu ewu adi angenzekela, meme ne difu, bua tshinyi? Pashishe kuyaye kuebeja Maweja-Nangila.

²³ Maweja-Nangila kumuandamuna ne: Bisamba bia bantu bibidi bidi munda muebe, neulele bisamba bibidi bishilangane. Kadi tshisamba tshimue netshipite tshikuabu ku bukole. Muanabute neikale mupika wa muakunyende.

²⁴ Diba dia kulela dikumbana, kamuvua kabidi mpata to. Rebeka kulela bana ba mapasa babidi ba balume.

²⁵ Mbuyi uvua mukunze, muikale ne boya pambidi, buenza bu tshinkutu. Kumuinyikabu ne: Esawu.

²⁶ Kadi Kabanga kulua, mukuate muanabu Esawu ku tshikankanya. Kumuinyikabu ne: Yakobe. Diba divuabu balele bana abu, Izake uvua ne bidimu makumi asambombu.

²⁷ Bana ba mapasa abu kukola. Esawu uvua tshilembi wa kalanda-musenga, musue kukeba nyama mu tshisuku. Kadi Yakobe uvua muntu wa lutulu, musue kulama ku mbelu.

²⁸ Izake uvua mutambe kunanga Esawu, bualu uvua munange bikole munyinyi wa nyama ya mu tshisuku. Kadi Rebeka uvua mupite kunemenena anu kudi Yakobe.

²⁹ Dituku dikuabu, Esawu ufuma ku dipata nyama mu tshisuku, mupungile ne nzala, kusanganaye Yakobe mulamba nsupu wa nkunde.

³⁰ Esawu kumulomba ne: — Mpeshaku nsupu wa nkunde mukunze uudi mulamba, ndia, bualu mukana mmungume. (Ke padibu babikila Esawu ne: Edome, mmomumue ne: mukunzubile.)

³¹ Yakobe kuandamuna ne: — Bua meme kukupesha nsupu wa nkunde ewu, bangabanga unsumbishe bumuanabute buebe.

³² Esawu kuandamuna ne: — Bumuanabute kabuena bungambuluisha kabidi to. Nzala idi mua kunshipa.

³³ Yakobe kuandamuna Esawu ne: — Nanku anji kuditshipa ne: Ndi mpesha Yakobe bumuanabute buanyi. Esawu kuditshipa, kusumbisha bumuanabute buende kudi muakunyende.

³⁴ Pashishe Yakobe kupesha mukuluende mampa ne nsupu ya nkunde. Esawu kudia, kunua, kutungunuka ne luendu. Ke muvua Esawu kayi muangate bumuanabute buende abu ne mushinga nansha.