Genese 23 - MUKANDA WA MYIDI MUKULU

Abrahame udi usumba lukita bua kujika Sara

¹ Sara mumane kukumbaja bidimu lukama makumi abidi ne muanda mutekete,

² kufuaye mu Kiriyate-Arba, momumue ne Ebrone, mu ditunga dia Kenaane. Abrahame kuenza madilu a mukajende, kumudila.

³ Patshivua tshitalu tshia Sara katshiyi tshianji kujika, Abrahame kuya kudi ndelanganyi ya Ete, kubambila ne:

⁴ — Meme ndi muenyi munkatshi muenu. Numpeshe muaba, muenu munu, wa kujika muena kuanyi.

⁵ Bena Ete kuandamuna ne:

⁶ — Mukalenga, Mvidi Mukulu mmukuele lupemba, suaku ututeleje. Ujike mukajebe mu lukita luakane lua ku nkita yetu. Muntu wa kutudi nansha umue kena mua kukupala lukita luende bua ujike muena kuebe to.

⁷ Abrahame kujuka, kuinyika mutu panshi, wambila ndelanganyi ya Ete bavua base mu buloba abu,

⁸ ne: — Panuikala basue bua meme kujika muena kuanyi apa, ndombelayi kudi Efrone, muana wa Sohare.

⁹ Ampeshe lubuebue luende ludi ku mpenga kua budimi buende. Alunsumbishe ku mushinga walu, nuenu batangile, bua lushale muaba wanyi.

¹⁰ Efrone, muena Iti, uvua musombe munkatshi mua bana babu amu. Kuandamunaye Abrahame ne bena Iti bavua basombe ku tshibuelelu tshia tshimenga bonsu bateleja ne:

¹¹ — Ndi nkusengelela ne: tshiena nkusumbisha budimi ne lubuebue to. Ndi nkupeshabi, bana betu bonsu batangile, bua ujikemu muena kuebe.

¹² Abrahame kuinama panshi kumpala kua bonsu bavua muaba awu,

¹³ wambila Efrone, bua bonsu bumvue, ne: — Ndi nkusengelela ne: unteleje! Ndi mfila mushinga wa budimi, uwangate, bua njike muena kuanyi.

¹⁴ Efrone kuandamuna Abrahame ne:

¹⁵ — Ndi nkusengelela ne: unteleje: muaba ewu udi mua kuikala wa mushinga wa nkanu ya tshiamu tshitoke tshia mushinga mukole nkama inayi. Kadi mine ayi idi mua kutuenzela wewe ne meme tshinyi? Nanku, jika muena kuebe.

¹⁶ Abrahame kuitaba bivua Efrone muakule, kumubadilaye nkanu bungi buvuaye utela, bana babu bumvue. Nanku kumupeshaye nkanu ya tshiamu tshitoke tshia mushinga mukole nkama inayi, bilondeshile mishinga ya basumbishi ba bintu.

¹⁷ Anu dituku adi, lubuebue lua Makpela luvua mu budimi bua Efrone, luseke ludi diba dipatukila lua Mambre, kushala mu dina dia Abrahame, kabidi ne mitshi yonsu ivua mikuna mu budimi amu.

¹⁸ Bena Iti kujadikilabu bantu bonsu bavua ku tshibuelelu tshia tshimenga ne: muaba udi Abrahame musumbe washadi mu dina diende.

¹⁹ Pashishe, Abrahame kujika muena kuende mu lubuebue alu luvua mu budimi bua Makpela pabuipi ne Mambre, udibu babikila ne: Ebrone, mu ditunga dia Kenaane.

²⁰ Budimi abu ne lubuebue luvuamu, Abrahame kubiangata kashidi, bena Iti bonsu bamone. Kushalabi muaba wa kujika bena diende bonsu.