Genese 22 - MUKANDA WA MYIDI MUKULU

Abrahame udi witaba bua kulambula Mvidi Mukulu Izake

¹ Izake mumane kukola, Mvidi Mukulu kuteta Abrahame. Kumubikilaye ne: — Abrahame. Yeye kuitaba ne: — Ke meme ewu.

² Mvidi Mukulu kumuambila ne: — Angata muanebe umuepele Izake uudi mupite kunanga awu, uye nende mu ditunga dia Moriya pa mukuna umbakuleja, umungoshile pa tshilambuilu.

³ Butshia Abrahame kujuka ne dinda dionsu, kuangata muanende Izake, bena mudimu bende babidi, mpunde wende ne nkunyi. Kuyaye muaba uvua Mvidi Mukulu mumuambile bua kulambula mulambu.

⁴ Bamane kuenda matuku asatu, Abrahame ukenzakana kumona mukuna awu umueneka pa bule.

⁵ Abrahame kuambila bena mudimu bende babidi ne: — Nuenu nushale apa ne nyama wa mpunde ewu. Meme ne muananyi tuyaya kulu kuaka bua kutendelela Mvidi Mukulu. Pashishe netupingane apa.

⁶ Abrahame kuambika muanende Izake tshisumbu tshia nkunyi, kukuata kela, kuambula mbabula ne makala a kapia. Pavuabu benda pamue,

⁷ Izake kukonka Abrahame ne: — Tatu! Awu ne: — Muananyi. Izake ne: — Tudi ne nkunyi ne kapia, kadi muana wa mukoku wa kulambula udi penyi?

⁸ Abrahame kuandamuna muanende ne: — Muananyi, Mvidi Mukulu nkayende neatupe muana wa mukoku. Bonsu babidi kutungunuka ne luendu.

⁹ Bafika muaba uvua Mvidi Mukulu mumuambile, Abrahame kuenza tshilambuilu, kutekapu nkunyi. Pashishe kusuikaye muanende Izake, kumuteka pa tshilambuilu pamutu pa nkunyi.

¹⁰ Kuambulaye kela bua kumukosa mutu.

¹¹ Kadi kumvuaye diyi dia mutumibue wa Mvidi Mukulu difumina mu diulu dimubikila ne: — Abrahame, Abrahame! Yeye kuitaba ne: — Ke meme ewu.

¹² Maweja-Nangila kumukandika ne: — Kulengi muana, kumuenzedi bibi. Mpindiewu ngajadiki ne: udi untshina meme Mvidi Mukulu, bualu kuena mumpale muanebe umuepele umvua mukupeshe.

¹³ Abrahame ukenzakana, kumonaye mukoku wa tshimpanga, nsengu yatshi mipatame mu mutshi. Kuangataye mukoku wa tshimpanga awu, kulambula Mvidi Mukulu pa muaba wa muanende Izake.

¹⁴ Nanku Abrahame kuinyika muaba awu ne: “Mukuna wa Maweja-Nangila udi utupesha!” Mukuna awu batshidi baubikila too ne mpindiewu ne: “Pa mukuna ewu Maweja-Nangila neatupeshe.”

¹⁵ Mutumibue wa Mvidi Mukulu kubikila Abrahame tshiakabidi,

¹⁶ umuambila ne: — Maweja-Nangila udi ujadika ne: Bu muudi muenze nanku kuyi mumpale muanebe umuepele, bu mundi meme Mvidi Mukulu, ndi nditshipa ne:

¹⁷ Nenkuele lupemba; nemvudije ndelanganyi yebe bungi bua mitotu ya mulu, nansha bu lusenga lua ku muelelu wa mayi manene. Ndelanganyi yebe neyinyenge misoku ya bena lukuna bayi.

¹⁸ Bisamba bionsu bia pa buloba nebipetele diakalenga ku ndelanganyi yebe, bualu witabi mikenji yanyi.

¹⁹ Pashishe Abrahame kupingana kuvua bena mudimu bende bashale, kuya nabu bonsu mu Bersheba mu ditunga divuaye usomba.

²⁰ Malu awu mamane kupita, kuambilabu Abrahame ne: “Bana ba balume badi Milka, mukaji wa muanenu Nahore, mulele badi muanda mukulu:

²¹ muanabute udi Use, pashishe Buze, Kemuyele, tatuende wa Arame,

²² Keshede, Azo, Pildashe, Idlafe ne Betuyele,

²³ tatuende wa Rebeka.” Ke bana muanda mukulu bavua Milka mulelele Nahore, muanabu ne Abrahame.

²⁴ Reyuma mukaji mukuabu wa Nahore, uvua mulele bana ba balume aba banayi: Teba, Ngahame, Tahashe ne Maaka.