Genese 21 - MUKANDA WA MYIDI MUKULU

Diledibua dia Izake

¹ Maweja-Nangila kusankisha Sara, kumukumbaja bionsu bivuaye mumulaye.

² Sara kuimita, kulelela Abrahame muana wa ku bukunda, mu tshikondu tshivua Mvidi Mukulu mujadike.

³ Abrahame kuinyika muana, uvua Sara mumulelele ne: Izake.

⁴ Matuku muanda mukulu akumbana, Abrahame kuteka Izake panshi bu muvua Mvidi Mukulu mumuambile.

⁵ Tshikondu tshivuabu balele Izake, Abrahame uvua mumane kukumbaja bidimu lukama.

⁶ Sara kusanka wamba ne: — Mvidi Mukulu mmunsekeshe. Nanku bonsu bumvue batela Izake nebaseke pamue nanyi.

⁷ Kuambaye kabidi ne: — Muntu kaayi uvua mua kuambila Abrahame ne: Dimue dituku Sara neamushe bana mabele? Mpindiewu ngaleledi Abrahame muana wa ku bukunda buende.

Abrahame udi wipata Agare ne Ismayele

⁸ Muana awu kukola, kulekela diamua mabele. Abrahame kulongolola masanka dituku adi.

⁹ Dituku dikuabu, Ismayele, muana wa Abrahame uvuaye mulele ne Agare muena Ejipitu, uvua unaya ne Izake. Sara umona nanku,

¹⁰ kuambilaye Abrahame ne: — Ipata mukaji mupika ewu ne muanende, bualu muana wa mukaji ewu kena mua kufuilakana bintu bia bupianyi ne muananyi Izake to.

¹¹ Miaku eyi kutonda Abrahame bikole, bualu Ismayele uvua kabidi anu muanende.

¹² Kadi Mvidi Mukulu kuambila Abrahame ne: — Kufiki munda bua muana ewu ne bua mukajebe mupika to. Itaba bionsu bidi Sara mukuambile. Uvuluke ne: ndelanganyi yebe yonsu imvua mukulaye neyifumine anu kudi Izake.

¹³ Kadi bua muana uudi mulele ne mukaji mupika ewu, nealele pende bana ba bungi. Neikale tshisamba tshinene, bualu udi muanebe.

¹⁴ Abrahame, kujuka dinda dionsu, kupesha Agare diampa ne kabulubulu tente ne mayi. Kumusuikaye muana panyima, umuambe ne: Ndaku. Agare uvua wenda ulalakana mu tshipela tshia Bersheba.

¹⁵ Kadi mayi avuabu nawu mu kabulubulu kujika. Agare kushiya muana muinshi mua mutshi.

¹⁶ Kuyaye kusomba pa nkayende mutantshi muipi udibu mua kuela muketa ufika. Uvua wamba ne: “Tshiena musue kumona mudi muananyi ufua to”. Agare kusomba ku mpenga, udila muadi.

¹⁷ Mvidi Mukulu kumvua muadi wa muana. Mutumibue wa Mvidi Mukulu kuela diyi difumine mu diulu, kuebeja Agare ne: — Tshidi tshikutonda nanku ntshinyi? Kutshinyi to. Mvidi Mukulu umvu muadi wa muana.

¹⁸ Juka, ubishe muana, umukuate bikole ku tshianza. Ndelanganyi yende neyenze tshisamba tshinene.

¹⁹ Mvidi Mukulu kutabeja mesu a Agare. Kumonaye tshiina tshia mayi muaba awu. Kusunaye mayi kabulubulu tente, kunuisha muana.

²⁰ Mvidi Mukulu kulama muana awu bimpe. Kukolaye, kushalaye tshilembi tshia buta bua mbale tshia kalanda musenga. Kusombaye mu tshipela tshia Parane.

²¹ Mamuende kumuselesha mukaji wa bena Ejipitu.

Abrahame ne Abimeleke badi batua ndondu

²² Matuku awu, Abimeleke ne Pikole, mulombodi wa bena mvita bende, kufika kudi Abrahame, bamuambila ne: — Mvidi Mukulu udi ukuambuluisha mu bionsu biudi wenza.

²³ Nanku, uditshipe mpindiewu kumpala kua Mvidi Mukulu ne: tshiakuenzela Abimeleke, bana bende ne ndelanganyi yende bibi to. Kadi ungenzele meme, ne bena ditunga dianyi diudi usomba, bimpe mumvua mukuenzele.

²⁴ Abrahame kuitaba ne: — Eyowa, ndi nditshipa nanku.

²⁵ Kadi, Abrahame kuela Abimeleke lusanzu bua tshiina tshia mayi tshivua bena mudimu bende bakandamana natshi.

²⁶ Abimeleke kukema wamba ne: — Tshiena mumanye udi muenze nanku to! Kuvua mungambile bualu ebu kuonsu eku! Nkadi mbumanya anu lelu.

²⁷ Abrahame kupesha Abimeleke mikoku, mbuji ne ngomba. Bonsu babidi kutua ndondu.

²⁸ Kadi, Abrahame kuteka bana ba mikoku muanda mutekete pa nkayabu.

²⁹ Abimeleke kumukonka ne: — Wenji nanku bua tshinyi?

³⁰ Abrahame kuandamuna ne: — Ndi nkupa bana ba mikoku aba muanda mutekete bua bakuvuluije ne: uvua mumbule tshiina tshia mayi etshi ngAbrahame!

³¹ Nanku kuinyikabu muaba awu ne: Bersheba, bualu bonsu babidi bavua batuilapu ndondu ne mutshipu.

³² Bobu bamane kutua ndondu nanku, Abimeleke ne Pikole, mulombodi wa bena mvita bende, kupingana mu ditunga dia bena Peleshete.

³³ Abrahame kuya mu Bersheba, kukunamu mutshi wa kampanga-nzevu. Ke muvuaye utendelela Mvidi Mukulu wa kashidi, utela dina dia Maweja-Nangila.

³⁴ Abrahame kushala mu ditunga dia bena Peleshete matuku mulongulongu.