Genese 15 - MUKANDA WA MYIDI MUKULU

Mvidi Mukulu udi utua ndondu ne Abrame

¹ Malu onsu mamane kupita, Maweja-Nangila kumuenekela Abrame, umuambila ne: — Abrame, kutshinyi to! Ndi nebe, nenkulame ku njiwu yonsu, kabidi difutu diebe nedikale dinene.

² Abrame kumukonka ne: — Maweja-Nangila Mvidi Mukulu wanyi, neumfute tshinyi? Meme tshiena mulele muana.

³ Bianyi bionsu nebabipiane anu kudi Eliyezere, muena Damase, udi wenza mudimu mu nzubu muanyi.

⁴ Maweja-Nangila kukolesha Abrame ku muoyi, umuambila ne: — Bintu biebe kabena babipiana kudi muena mudimu webe to. Nebishale anu kudi muana wa munda muebe.

⁵ Maweja-Nangila kupatuka ne Abrame mu ntenta wende, umuambila ne: — Tangila mulu ne udi mua kubala mitotu idimu. Ke muikale bungi bua ndelanganyi yebe.

⁶ Abrame kuitaba bionsu bivua Maweja-Nangila mumuambile. Nanku Maweja-Nangila kujadika ne: Abrame mmuntu muakane.

⁷ Pashishe Maweja-Nangila kuambila Abrame ne: — Meme Maweja-Nangila ke uvua mukupatule mu Ure wa bena Babilone, bua kukupesha ditunga edi, dishale diebe.

⁸ Abrame kumukonka ne: — Maweja-Nangila Mvidi Mukulu wanyi, nemmanye ne: ditunga edi nedishale dianyi mushindu kaayi?

⁹ Maweja-Nangila kumuambila ne: — Ntuadile muana wa ngombe, mbuji ne mukoku wa tshimpanga bia bidimu bisatu. Pashishe ntuadile kamanda-nkutshi ne nkudimba.

¹⁰ Abrame kumutuadila nyama yonsu ayi, kuyipanda nseke, kuteka luseke ne luseke bitangilangane. Kadi kena mupande nyunyi to.

¹¹ Pashishe, nyunyi ya mikanku kupueka bua kuzokola minyinyi ya nyama ayi, kadi Abrame kuyipata.

¹² Ku dilolu Abrame kulala tulu tukole. Bowa ne luzakalu kumuenzabi bikole.

¹³ Maweja-Nangila kuambila Abrame ne: — Umanye bimpe ne: ndelanganyi yebe neyisombe mu ditunga dia bende. Nebayikengeshe, ishale ku bupika bidimu nkama inayi.

¹⁴ Kadi, meme nennyoke tshisamba tshikale tshiyikuata ku bupika atshi. Ndelanganyi yebe neyipatuke mu bupika ne biuma bia bungi.

¹⁵ Wewe neukole ukulakaja, ufua ne disanka ne ditalala, ulonda bankambua bebe.

¹⁶ Amu tunkanunuina tuebe tua tshikondu tshinayi netupingane mu ditunga edi kashidi. Bualu nengipate bena Amore anu pambamona ne bubi buabu budi bukengela dinyoka.

¹⁷ Butuku bumane kuila, midima kuenzeka. Tshikutu tshia kapia ne ndimi yaku kupitabi pankatshi pa bitupa bia nyama bivua Abrame mupande abi.

¹⁸ Dituku adi, Maweja-Nangila kutua ndondu ne Abrame muaba awu, kumulaya ne: — Matunga aa nengapeshe ndelanganyi yebe, biangatshile ku musulu wa Ejipitu ne ku musulu munene wa Perate.

¹⁹ Ke ditunga dia bena Keni, dia bena Kenizi, dia bena Kadmoni,

²⁰ dia bena Iti, dia bena Perizi, dia bena Refayime,

²¹ dia bena Amore, dia bena Kenaane, dia bena Ngirgashi ne dia bena Yebusa.