Genese 12 - MUKANDA WA MYIDI MUKULU

ABRAHAME Mvidi Mukulu udi ubikila Abrame

¹ Maweja-Nangila kuambila Abrame ne: — Umuke mu ditunga dienu, mu diku dienu ne ku nzubu kua batatuebe. Uye mu ditunga dindi nkuleja.

² Nenkuele lupemba, wikale tatu wa tshisamba tshinene tshia bantu. Dina diebe nedikale ne lumu lunene. Kabidi bantu bakuabu nebapete diakalenga kuudi.

³ Bonsu badi bakuela lupemba, nembele. Kadi bonsu badi bakutshipa, nembatshipe. Nengele bisamba bionsu bia pa buloba lupemba bualu buebe.

⁴ Abrame mumane kukumbaja bidimu makumi muanda mutekete ne bitanu, kumukaye mu Arane muvua Maweja-Nangila mumuambile.

⁵ Kuyaye ne mukajende Sarayi, ne Lote muana wa muanabu, kabidi ne bapika bavuaye musumbe mu Arane ne bintu bionsu. Kuyabu mu ditunga dia Kenaane. Bobu bamane kufika mu ditunga dia Kenaane,

Abrame udi ufika mu ditunga dia Kenaane

⁶ kupitshilabu mu ditunga adi too ne ku mutshi wa tshijila uvua mu Moreya pabuipi ne musoku wa Shekeme. — Bena Kenaane batshivua mu ditunga adi. —

⁷ Maweja-Nangila kumuenekela kabidi Abrame, umuambila ne: “Ditunga edi nendipeshe ndelanganyi yebe.” Abrame kuashila Maweja-Nangila tshilambuilu muaba mene uvua Maweja-Nangila mumumuenekele.

⁸ Abrame umbuka aku, kuyaye ku mikuna ivua ku dia balume dia tshimenga tshia Betele. Kuasaye mitanda yende pankatshi pa Betele ne Ayi. Betele uvua ku luseke ludi diba dibuelela, Ayi ku luseke ludi diba dipatukila. Muaba awu kuenzaye tshilambuilu tshikuabu, utendelela Mvidi Mukulu, utela dina dia Maweja-Nangila.

⁹ Pashishe kuyaye wenda utula mu bitupa bishilangane too ne kuinshi kua ditunga dia Kenaane.

¹⁰ Tshiyole tshia nzala kupatuka mu ditunga dia Kenaane. Ke muvua Abrame uya mu ditunga dia Ejipitu, bua kuanji kusombamu.

¹¹ Pawaye ubuela mu ditunga dia Ejipitu, Abrame kuambila mukajende Sarayi ne: — Wewe udi ne mpala muimpe.

¹² Pikala bena Ejipitu bakumona, nebatshinke ne udi mukajanyi. Nebanshipe bua kukuangata wewe.

¹³ Ndi nkusengelela ne: ubambile ne: Abrame mmuanetu. Nanku kabakunshipa to. Nempete diakalenga bualu buebe.

¹⁴ Nanku Abrame ufika mu ditunga dia Ejipitu, bena ditunga kumona Sarayi ne mpala muimpe mutambe.

¹⁵ Balombodi ba bena mvita ba mukalenga wa bena Ejipitu kumuanyishila bulenga bua mukaji awu. Mukalenga wa bena Ejipitu kumubanjija.

¹⁶ Pashishe mukalenga kupesha Abrame bintu bia bungi mu dina dia Sarayi: mikoku, mbuji, ngombe, tumelu, nyama ya mpunde milume ne mikaji, bapika balume ne bakaji.

¹⁷ Kadi, bu muvua mukalenga wa bena Ejipitu mubanjije Sarayi, mukaji wa Abrame, Maweja-Nangila kutumina mukalenga awu ne bonsu ba mu nzubu muende tshipupu tshikole tshia masama.

¹⁸ Mukalenga wa bena Ejipitu kubikidisha Abrame, kumukonka ne: — Tshiudi mungenzele ntshinyi? Bua tshinyi kuena mungambile ne: Sarayi mmukajebe?

¹⁹ Wakundinga ne: Sarayi mmuanetu wa bakaji bua meme kumuangata bu mukajanyi bua tshinyi? Mpindiewu angata mukajebe, umuke nende.

²⁰ Pashishe mukalenga wa bena Ejipitu kutuma diyi bua bantu bende bumushe Abrame mu ditunga pamue ne mukajende ne bionsu bivuaye nabi.