Ezela 9 - MUKANDA WA MYIDI MUKULU

Bena Izrayele bavule bavua basele bakaji benyi

¹ Malu awu mamane kupita, bamfumu bakuabu ba bena Izrayele kufika, bangambila ne: — Nansha bantu ba patupu, nansha batuangaji ne bena Levi, kabena bashiyangane ne bena ditunga to. Badi batendelela mvidie ya tshianana, badi balonda bibidilu bibi bia bena Kenaane, bena Iti, bena Perizi, bena Yebusa, bena Amone, bena Mowabe, bena Ejipitu ne bena Amore.

² Bavua basele bakaji ba mu ditunga edi, baselele babu bana ba balume bakaji ba bena bisamba abi. Nanku bantu ba tshijila mbamane kubuelakana ne bena ditunga. Bamfumu ne balombodi ba bantu ke bavua ba kumpala ku dienza bualu bubi bua mushindu ewu.

³ Pangumvu miaku ayi, meme kupanda tshinkutu tshianyi ne bilamba bianyi. Meme kuditula nsuki ne miedi. Meme kusomba mubungame bikole.

⁴ Meme kushala nanku too ne diba divuabu balambule mulambu wa dilolu. Bantu bonsu bavua batshina dinyoka, divua Mvidi Mukulu mua kunyoka bena Izrayele bafume ku bupika bavua benza bualu bubi abu, kusemenabu kundi.

Ezra udi utendelela Mvidi Mukulu

⁵ Dilolu, diba dia kulambula milambu dikumbana, meme kumuka muaba umvua nsomba mubungame. Ntshivua ne tshinkutu tshianyi ne bilamba bianyi bimvua mupande. Meme kutua binu panshi, kuela bianza mulu kudi Maweja-Nangila Mvidi Mukulu wanyi,

⁶ kumutendelela ne: — Mvidi Mukulu wanyi, ndi ne bundu mesu tente! Mvidi Mukulu wanyi, tshiena mua kukuleja mpala wanyi. Mibi yetu idi ya bungi, mmibande too, mipite mitu yetu. Idi bu mikuna, mmiye too ne mu diulu.

⁷ Tshikondu tshia bankambua betu too ne mpindiewu, tshisamba tshietu tshivua tshienza bibi bitambe. Ke pavuabu batukengesha, bakengesha bakalenga betu ne batuangaji betu, kudi bakalenga ba bisamba bikuabu. Bavua batuluisha, baya netu ku bupika, banyanga bintu bietu, babakuatshisha bundu, bu mudibu benza ne lelu mene ewu.

⁸ Kadi Maweja-Nangila Mvidi Mukulu wetu, matuku makese aa, udi mutuleje muudi mutunange. Uvua muanyishe bua bana betu bavua bashale ne muoyi, bapingane mu buloba buebe bua tshijila. Nanku, bua luse luebe, Mvidi Mukulu wetu, mesu etu adi aleja tshiakabidi disanka. Tudi Nsanguluka kakese mu dikenga ditudi nadi.

⁹ Eyowa, Mvidi Mukulu wetu, tuvua bapika, kadi kuena mutulekele mu bupika to. Uvua muambuluishe bakalenga banene ba bena Persa bua batuenzele bimpe. Bavua babambuluisha bua tusanguluke, basulule nzubu webe, bakaje bivua binyanguke, tupete muaba wa kusomba mu Yerushalayime ne mu Yuda.

¹⁰ “Kadi mpindiewu, Mvidi Mukulu wetu, bambe tshinyi bua bidi bibenzekela ebi? Kabena bitabe meyi ebe,

¹¹ avuabu babambile kudi bambi bebe badi bakuenzela mudimu! Uvua mudianze kubambila ne: ‘Ditunga dinudi nuya kukuata bua kusomba didi ne mikiya, bualu bisamba bidi biasamu bidi ne mikiya, binyangakaja ditunga dijima ne ditendelela diabu dia mvidie ya tshianana.

¹² Nanku, nsongakaji yenu, kabena mua kuyisela kudi nsongalume ya banb benyi abu to. Kabidi kanuena mua kubangila bana babu ba bakaji bua kubaselabu kudi bana benu ba balume to. Kanuena mua kuvudija diakalenga ne biuma bia bantu benyi aba to. Nanku nenuikale bantu ba bukole. Nenusanke ne bintu bimpe bia mu ditunga amu. Nenubishile ndelanganyi yenu kashidi!’

¹³ Eyi! Mvidi Mukulu wetu, makenga onsu aa adi atukuata bua malu mabi etu, ne bua bilema bietu. Kadi kuena mutunyoke bilondeshile muvua bilema bietu. Uvua musue bua bikale ne muoyi. Ke patudi bafike munemu.

¹⁴ Kadi mutudi mua kukutombokela kabidi, kusela bakaji ba bisamba bidi bitendelela mvidie ya tshianana mbishi? Ke muudi mua kubfikila munda, kutubutula bonsu, kuyi ushiya muntu!

¹⁵ Lelu, Maweja-Nangila Mvidi Mukulu wa Izrayele, bu muudi ne luse, udi muanyishe bua bamue ba kutudi bashale ne muoyi. Tudi bimane kumpala kuebe, tuetu bena mibi. Kadi bu wewe kuyi ne luse, muntu nansha umue kavua mua kuimana kumpala kuebe ne bubi bua mushindu ewu.”