Ezela 8 - MUKANDA WA MYIDI MUKULU

Mena a bavua bapingana ne Ezra

¹ Bilondeshile mikanda idi ne mena a bankambua, ke mena a bamfumu ba meku bandi meme Ezra mufume nabu ku Babilone, mufike nabu mu Yerushalayime mu matuku a bukalenga bua mukalenga munene Artashasta.

² Mu diku dia Pinase muvua Ngershone; mu diku dia Itamare muvua Daniyele; mu diku dia Davide muvua Atushe;

³ muana wa balume umue wa Shekanya; mu diku dia Paroshe muvua Zekarya ne bantu 150 ba mu diku diabu;

⁴ mu diku dia Pakate-Mowabe, muvua Eliyo-kenayi, muana wa Seraya, ne bantu 200;

⁵ mu diku dia Zatu, muvua Shekanya, muana wa Yaziyele, ne bantu 300;

⁶ mu diku dia Adine, muvua Ebere, muana wa Yonatane, ne bantu 50;

⁷ mu diku dia Elame, muvua Yeshaya, muana wa Ataliya, ne bantu 70;

⁸ mu diku dia Shefatya, muvua Zebadya, muana wa Mikayele, ne bantu 80;

⁹ mu diku dia Yowabe, muvua Obadya, muana wa Yakiyele, ne bantu 218;

¹⁰ mu diku dia Bani, muvua Shelomite, muana wa Yoshifiya, ne bantu 160;

¹¹ mu diku dia Bebayi, muvua Zekarya, muana wa Bebayi, ne bantu 28;

¹² mu diku dia Azgade, muvua Yowanane, muana wa Akatane, ne bantu 110;

¹³ mu diku dia Adonikame, muvua Elifelete, Yeyiyele ne Shemaya, bantu basatu ba ndekelu ba ku ndelanganyi ayi. Bavua ne bantu 60;

¹⁴ mu diku dia Bigvayi, muvua Utayi ne Zakure, bavua ne bantu 70.

Ezra udi udilongolola bua kuya ku Yerushalayime

¹⁵ Meme kusangisha bantu bonsu aba pabuipi ne mukidi udi mupitshile pabuipi ne musoku wa Akava, Tuetu kushala muaba awu mu mitanda matuku asatu. Pamvua mutangile bimpe, meme kumona munkatshi muabu, muvua batuangaji ne bantu bakuabu, kadi kamuvua bena Levi to.

¹⁶ Nanku, meme kubikila bamfumu balombodi aba bua kubapesha mudimu wa kuenza: ke Eliyezere, Ariyele, Shemaya, Elnatane, Yaribe, Elnatane, Natane, Zekarya, Meshulame ne balongeshi babidi ba mikenji: Yoyaribe ne Elnatane.

¹⁷ Meme kubatuma kudi Ido, mfumu wa musoku wa Kashifiya. Meme kubumvuija tshiyuabu ne bua kuambila Ido ne bamuambuluishi bende, bavua bakuata mudimu mu nzubu wa Mvidi Mukulu, basombela mu Kashifiya, bua batupeshe bantu bavua mua kuya netu, bua kukuata mudimu mu nzubu wa Mvidi Mukulu wetu.

¹⁸ Bu muvua Mvidi Mukulu wetu mutalame, kutapeshabu Sherebiya muntu wa lubatshi wa mu diku dia Mali, wa ku ndelanganyi ya Levi, muana wa Yakobe. Sherebiya uvua ne bana bende ba balume, ne bana babu. Bonsu pamue bavua bantu 18.

¹⁹ Mu diku dia Merari muvua Ashabiya ne Yeshaya, ne bana babu ba balume, ne bikulu babu. Bonsu bavua bantu 20.

²⁰ Kufikabu kabidi ne bantu nkama ibidi ne makumi abidi, basungula ku bantu bavua benza mudimu mu nzubu wa Mvidi Mukulu. Bantu aba mba ku tshisumbu tshia bantu bavua Davide ne bavuaye nabu, bapeshe bena Levi kale bua babambuluishe.

²¹ Ku muelelu wa mukidi wa Akaya, meme kuamba bua tuetu bonsu tajile biakudia. Ke mutavua ne bua kudipuekesha, kusengelela Maweja-Nangila bua atuendeshe mu ditalala ne meku etu, kabidi ne binta bietu.

²² Tshivua musue kulomba mukalenga munene, bua atupeshe bena mvita ne babandi ba pa nyama ya tubalu, bua batalame mu njila, bua baluishi betu kabatatatshishi. Bualu tavua bamujadikile ne: Mvidi Mukulu udi ulama bonsu badi bamuitaba. Kadi bonsu badi bamubenga, udi ubafikila munda bikole.

²³ Nanku, tavua bajile biakudia, balombe kudi Mvidi Mukulu wetu bua atulame. Yeye kutuenzela bitavua bamulombe.

²⁴ Pashishe, meme kusungula kabidi munkatshi mua batuangaji, bantu dikumi ne babidi, kabidi ne Sherebiya, Ashabiya ne bantu dikumi ba ku tshisumbu tshiabu.

²⁵ Meme kupima tshiamu tshia mpawungi, tshiamu tshitoke tshia mushinga mukole, ne binta bikuabu bionsu bia mushinga mukole, bantu abu batangile. Binta abi, ke biwabu balambule kudi Artashasta, mukalenga munene, kudi bafidi bende ba ngenyi, kudi balombodi ba mu bukalenga buende, ne kudi bena Izrayele bavua mu ditunga, bua tumone mua kulongolola nzubu wa Mvidi Mukulu.

²⁶ Nanku, meme kubapesha kilo binunu makumi abidi ya tshiamu tshitoke tshia mushinga mukole, kilo binunu bisatu ya binta bia mushinga mukole bienza ne tshiamu tshitoke tshia mushinga mukole, kilo binunu bisatu ya tshiamu tshia mpawungi,

²⁷ malongu makumi abidi menza ne tshiamu tshia mpawungi, mikale a mushinga wa nkanu tshinunu ya tshiamu tshia mpawungi, ne ngesu ibidi mimpe yengelela ya tshiamu tshifike ya mushinga mukole, anu bu mushinga wa ngesu ya tshiamu tshia mpawungi.

²⁸ Meme kubambila ne: — Bu mudibu bamane kunujidila bua kuenzela Maweja-Nangila mudimu, ke mudi kabidi binta ebi bijidile, bua bikale biende yeye. Tshiamu tshia mpawungi, ne tshiamu tshitoke tshia mushinga mukole, mmilambu ya budisuile idi bantu balambule Maweja-Nangila Mvidi Mukulu wa bankambua benu.

²⁹ Nulame bintu ebi bimpe, nubifikishe mu Yerushalayime. Padibi bifika, nubipimine mu tshibambalu tshidi tshilamakaja ku nzubu wa Mvidi Mukulu, batuangaji, balombodi, bena Levi ne bamfumu ba meku batangile.

³⁰ Nanku, batuangaji ne bena Levi bavua bangate bintu biwabu bapime, tshiamu tshia mpawungi, tshiamu tshitoke tshia mushinga mukole, ne bintu bikuabu bua kuya nabi mu Yerushalayime, mu nzubu wa Mvidi Mukulu wetu.

Bena Izrayele mu Yerushalayime

³¹ Mu matuku dikumi ne abidi a ngondu wa kumpala, tuetu kumuka ku mukidi wa Akava, bua kuya mu Yerushalayime. Mu luendu alu, Mvidi Mukulu wetu uvua molole tshianza tshiende, bua kutulama ku baluishi ne bena buivi, bua kabatutatshishi.

³² Tufika mu Yerushalayime, tuetu kuikisha matuku asatu.

³³ Dituku dinayi, tuetu kupimina mu nzubu wa Mvidi Mukulu wetu, tshiamu tshitoke tshia mushinga mukole, tshiamu tshia mpawungi, ne bintu bia mushinga mukole. Tuetu bamane kubipima, tuvua babipeshe mutuangaji Meremote, muana wa Uriya, ne Elazare, muana wa Pinase. Bena Levi bakuabu bavuaku: ke Yozabade, muana wa Yeshuwa, ne Nowadya, muana wa Binuwi.

³⁴ Bamane kubala bintu bionsu, bapima bujitu buabi, kufundabu mu mukanda bujitu bua bintu bionsu abi.

³⁵ Bonsu, bavuabu baye nabu mu bupika, bamane kupingana, bavua balambula Mvidi Mukulu wa Izrayele milambu ya kuosha mu dina dia bena Izrayele bonsu: nyama ya ngombe milume dikumi ne ibidi, mbuji ya mikoku ya bimpanga makumi tshitema ne isambombu, ne bana ba mikoku makumi muanda mutekete ne muanda mutekete. Bavua balambula kabidi mbuji ya mpumbu dikumi ne ibidi bu mulambu wa kukobolola nawu bantu. Bavua boshila Maweja-Nangila nyama yonsu ayi.

³⁶ Pashishe kuambilabu bamienampala ba mukalenga, ne balombodi ba buloba buvua luseke ludi diba dibuelela lua musulu wa Perate, mikenji ya kudi mukalenga munene. Ke bantu abu kupesha bena Izrayele bintu biwabu nabi bua mudimu wa ku nzubu wa Mvidi Mukulu.