Ezela 7 - MUKANDA WA MYIDI MUKULU

Mutuangaji Ezra

¹ Pashishe, mu matuku a bukalenga bua Artashasta, mukalenga munene wa bena Persa, Ezra uvua utumina ku Babilone. Ezra uvua muana wa Seraya, Seraya uvua muana wa Azarya, Azarya uvua muana wa Ilkiya,

² Ilkiya uvua muana wa Shalume, Shalume uvua muana wa Sadoke, Sadoke uvua muana wa Akitube,

³ Akitube uvua muana wa Amarya, Amarya uvua muana wa Azarya, Azarya uvua muana wa Merayote,

⁴ Merayote uvua muana wa Zeraya, Zeraye uvua muana wa Uzi, Uzi uvua muana wa Buki,

⁵ Buki uvua muana wa Abishuwa, Abishuwa uvua muana wa Pinase, Pinase uvua muana wa Elazare, Elazare uvua muana wa kumpala wa Arone, mutuangaji munene.

⁶ Ezra uvua mumanye mikanda, uvua mumanye bikole meyi ne mikandu bivua Maweja-Nangila Mvidi Mukulu wa bena Izrayele muambile Moshe. Maweja-Nangila Mvidi Mukulu wende uvua mumupeteshe lumu. Ke pa wa Artashasta, mukalenga munene, mumupeshe bionsu biwaye ulomba.

⁷ Pavua bena Izrayele, batuangaji, bena Levi, bena misambu, balami ba ku biibi, ne bena mudimu bakuabu ba nzubu wa Mvidi Mukulu, bapingana mu Yerushalayime, Artashasta ukavua mumane kushala mu bukalenga bidimu muanda mutekete.

⁸ Ezra, kufika nabu mu ngondu muitanu wa tshidimu atshi.

⁹ Ezra kumuka mu Babilone dituku dia kumpala dia ngondu wa kumpala. Kufikaye nabu mu Yerushalayime dituku dia kumpala dia ngondu muitanu, bualu Mvidi Mukulu wende uvua mumulame.

¹⁰ Bualu Ezra uvua mudifile ne muoyi wende mujima bua kulonga mikenji ya Maweja-Nangila, kuyikumbaja, kuyilongesha bena Izrayele, bua balonde anu meyi ne mikandu bidibu bafunde mu mikenji.

Artashasta udi ufundila Ezra mudimu wende

¹¹ Artashasta, mukalenga munene wa bena Persa, uvua mupeshe mutuangaji Ezra mukanda. Ezra uvua mumanye bikole meyi ne mikandu bivua Maweja-Nangila mupeshe bena Izrayele. Mukalenga munene Artashasta uvua mufunde ne:

¹² “Meme Artashasta, mukalenga wa bakalenga, ndi ntumina mutuangaji Ezra mukanda. Yeye ewu udi mumanye bimpe mikenji ya Mvidi Mukulu wa mu diulu, a.n.

¹³ “Ndi ntuma diyi, bua bena Izrayele bonsu badi basomba mu bukalenga buanyi, nansha batuangaji nansha bena Levi, nansha bantu bakuabu badi bajinga kuya ku Yerushalayime, baye amu nebe.

¹⁴ Meme ne bafidi ba ngenyi banyi muanda mutekete, tudi tukutuma mu Yerushalayime, ne mu buloba bua bena Yuda, bua wewe kujadika ne: bantu badi bakumbaja tshidibu bafunde mu mukanda wa mikenji ya Mvidi Mukulu uudi uya nawu anyi?

¹⁵ Wangata tshiamu tshia mpawungi, ne tshiamu tshitoke tshia mushinga mukole, bitudi tuetu nabi, meme ne bafidi banyi ba ngenyi, bitudi basue kulambula Mvidi Mukulu wa bena Izrayele udi usomba muaba wende wa tshijila, mu Yerushalayime.

¹⁶ Newangate kabidi bintu bionsu bia tshiamu tshia mpawungi, ne bia tshiamu tshitoke tshia mushinga mukole, biwapeta mu buloba bua Babilone, bintu bidi bena ditunga dienu bafile ku budisuile buabu, nansha batuangaji nansha bantu bakuabu, bua nzubu wa Mvidi Mukulu wabu udi mu Yerushalayime.

¹⁷ Mu Yerushalayime, makuta audi upeta, usumbe nawu nyama ya ngombe milume, mbuji ya bimpanga, bana ba mikoku, ne bintu bionsu biudi ukengela bua kulambula milambu ya bintu bia mu madimi ne milambu ya maluvu a mvinyo. Bintu bionsu abi, ubilambuile pa tshilambuilu tshidi mu nzubu wa Mvidi Mukulu webe wa mu Yerushalayime.

¹⁸ Pashishe, wewe ne baudi wenda nabu, padi tshiamu tshia mpawungi ne tshiamu tshitoke tshia mushinga mukole bishale, nuenze nabi munudi basue. Kadi amu bilondeshile mudi Mvidi Mukulu wenu munuambile.

¹⁹ Bintu bionsu bia kutendelela nabi biwabu bakupeshe, ubiteke mu nzubu wa Mvidi Mukulu webe mu Yerushalayime.

²⁰ Paudi musue kufila bintu bikuabu mu nzubu wa Mvidi Mukulu, ubisumbe ku makuta a mu mushete wa bukalenga.

²¹ “Meme, Artashasta, mukalenga munene, ndi ngambila balami ba bibutshilu bionsu bidi mu buloba budi luseke ludi diba dibuelela lua musulu wa Perate ne: bakumbaje bidi mutuangaji Ezra wamba, bualu yeye udi mumanye bimpe mikenji ya Mvidi Mukulu wa mu diulu.

²² Nebamupeshe kilo binunu bisatu bia tshiamu tshitoke tshia mushinga mukole, kilo binunu makumi asatu ya ntete ya kuenza bukula, litre binunu binayi ya maluvu a mvinyo, litre binunu binayi ya mafuta, ne luepu bungi budibu basue.

²³ Benze lukasa malu onsu avuabu balombe kudi Mvidi Mukulu wa mu diulu bua nzubu wende, bua Mvidi Mukulu ewu kafikidi bukalenga bunene munda, kamfikidi meme, nansha ndelanganyi yanyi munda.

²⁴ Tudi tumanyisha kabidi balami ba bibutshilu ne: kabena mua kulambuisha batuangaji, bena Levi, bena misambu, balami ba ku biibi, bena midimu mikuabu ba mu nzubu wa Mvidi Mukulu bitadi nansha milambu mikuabu to.

²⁵ “Kadi wewe Ezra, bilondeshile mikenji mimpe ya Mvidi Mukulu iudi nayi mu mukanda, usungule balumbuluishi ne balombodi, bua bikale bakosa nsambu ya bantu badi mu buloba ebu, kabidi badi bamanye mikenji ya Mvidi Mukulu webe. Badi kabayi bayimanye, neubalongesheyi.

²⁶ Pashishe, padi muntu kayi ukumbaja mikenji ya Mvidi Mukulu, nansha ya mukalenga munene, bamufundile dinyoka didi dimukumbanyine, nansha dia kumushipa, nansha dia kumuipata mu ditunga, nansha dia kumunyenga bintu biende, nansha dia kumuela mu lukanu.”

Ezra udi wela Mvidi Mukulu tuasakidila

²⁷ Ezra kuamba ne: “Tuele Maweja-Nangila Mvidi Mukulu wa bankambua betu tuasakidila. Uvua mupeshe mukalenga munene dijinga dia kunemeka nzubu wa Mvidi Mukulu wa mu Yerushalayime.

²⁸ Mvidi Mukulu kungenzela bimpe kumpala kua Artashasta, mukalenga munene, kumpala kua bafidi bende ba ngenyi ne kua bantu banene bonsu ba mu bukalenga buende. Meme ndi mukole muoyi bua padi Maweja-Nangila mundame. Nanku, ndi musangishe bamfumu ba bena Izrayele bua tupingane nabu kuetu.”