Ezela 6 - MUKANDA WA MYIDI MUKULU

Diandamuna dia mukalenga munene Daryaveshe

¹ Daryaveshe, mukalenga munene, kutuma diyi, bua bakebulule mu Babilone, mu bibambalu muvuabu bateke mikanda ya kale ne bintu bia mushinga mukole.

² Mu Ekbatane, tshimenga tshivuabu bakolesha ne bimana mu buloba bua Madayi, ke muvuabu basangana muvungu wa mabeji. Bavua bafundamu nenku: “Mulubu.

³ “Koreshe, mukalenga munene, mumane kushala mu bukalenga tshidimu tshijima, uvua muele diyi ne: Nzubu wa Mvidi Mukulu wa mu Yerushalayime badi ne bua kumuasulula, bua ikale muaba udibu balambula milambu. Nebamuase pa bitaku bia nzubu wa Mvidi Mukulu wa kale. Nzubu awu neikale metre makumi asatu mu butumbuke, ne metre makumi asatu mu butshiama.

⁴ Nebateke milongu isatu ya mabue masonga, batenteka ku mulongu onsu wa mabue mulongu wa mabaya. Bintu bionsu abi nebabifute ne makuta a mu mushete wa mu bukalenga.

⁵ Bintu bionsu bienza ne tshiamu tshitoke tshia mushinga mukole, nansha ne mpawungi, bivua mu nzubu wa Mvidi Mukulu mu Yerushalayime, bivua mukalenga munene Nebukadnesare muteke mu Babilone, babipingaje mu nzubu wa Mvidi Mukulu mu Yerushalayime. Tshintu tshionsu tshipingane anu pa muaba watshi.”

⁶ Ke muvua Daryaveshe mutumine Tatenayi, mulombodi wa buloba buvua luseke ludi diba dibuelela lua musulu wa Perate, Shetare-Boznayi, ne balombodi nabu, mukanda, ubambila ne: “Kanubuelakanyi kabidi mu bualu ebu to!

⁷ Nuanyishe bua bena Yuda benzulule nzubu wa Mvidi Mukulu mudibu basue. Mulombodi wa bena Yuda ne bakulu babu, badi mua kuibakulula nzubu wa Mvidi Mukulu muaba wende wa kale.

⁸ Ndi nnuambila bua nuambuluishe bakulu ba bena Yuda bua kuenzulula nzubu wa Mvidi Mukulu. Nuikale nubafuta makuta onsu, pa bionsu bidibu batula bua nzubu ewu, bua mudimu uye anu kumpala. Makuta awu nga mu mushete wa bubanji bua mukalenga, anudi nupeta ku bitadi bidi bantu balambula mu buloba buenu.

⁹ Ku dituku dionsu, nuikale nupesha batuangaji ba mu Yerushalayime bionsu bidibu bajinga, mudibu balomba, nyama ya ngombe milume, mbuji ya mikoku ya bimpanga, ne bana ba mbuji ya mikoku, bua milambu ya kuosha, ya kulambula Mvidi Mukulu wa mu diulu. Nubapeshe kabidi ne ntete ya kuenza bukula, luepu, mabu a mvinyo, ne mafuta.

¹⁰ Nanku, nebalambule Mvidi Mukulu wa mu diulu milambu idiye mua kuanyisha. Nebamutendelele bua mukalenga munene ne bana bende bakuate ku mundundu.

¹¹ Padi muntu ubenga mundi muambe emu, ndi ngamba ne: nutule dikunji dia ku nzubu kuende, numoweleku. Nzubu wende ashale tshisasa.

¹² Mvidi Mukulu udi musombe mu Yerushalayime, bua bantu bamutendelelemu, anyoke mukalenga yonsu nansha tshisamba tshionsu tshidi tshikeba mua kunyanga nzubu wa Mvidi Mukulu, tshibenga meyi anyi aa. Meme Daryaveshe ke udi utuma diyi awu. Batumikile diyi edi, anu mundi muambe amu!”

¹³ Tatenayi, mulombodi wa buloba buvua luseke ludi diba dibuelela lua musulu wa Perate, Shetare-Boznayi, ne balombodi nabu, kuenza amu muvua Daryaveshe mukalenga munene muambe. Badi bajidila nzubu wa Mvidi Mukulu

¹⁴ Malu avua muambi Agayi ne muambi Zekarya, muana wa Ido, bambe, kukolesha balombodi ba bena Yuda ku muoyi. Nanku, kutungunukabu amu bimpe ne mudimu wabu wa kuenzulula nzubu wa Mvidi Mukulu. Kujikijabu kuibakulula nzubu awu, bilondeshile muvua Mvidi Mukulu wa Izrayele muambe, ne muvuabu bafunde kudi bakalenga banene ba bena Persa, Koreshe, Daryaveshe ne Artashasta.

¹⁵ Bavua bajikija kuibaka nzubu wa Mvidi Mukulu dituku disatu dia ngondu wa Adare, pavua Daryaveshe, mukalenga munene mumane kulala mu bukalenga bidimu bisambombu.

¹⁶ Bena Yuda, batuangaji, bena Levi ne bantu bakuabu bavua bafume ku bupika, kubandabu nzubu wa Mvidi Mukulu ne disanka, kumujidila.

¹⁷ Mu tshibilu atshi, bavua balambula nyama ya ngombe milume lukama, mbuji ya mikoku ya bimpanga nkama ibidi, bana ba mikoku nkama inayi, kabidi ne mbuji ya mpumbu dikumi ne ibidi, mbuji umue uvua mufume ku tshisamba tshionsu tshia bena Yuda, bua Mvidi Mukulu afuile bena Izrayele bonsu luse.

¹⁸ Kusungulabu kabidi batuangaji ne bena Levi, bua benzele Mvidi Mukulu mudimu mu Yerushalayime, ku tshisumbu ku tshisumbu, bu mudibu bafunde mu mukanda wa Moshe.

Bena Yuda badi benza tshibilu tshia Dipita dia Maweja-Nangila

¹⁹ Bantu bonsu bavua bapingane ku bupika kuenzabu tshibilu tshia Dipita dia Maweja-Nangila, mu matuku dikumi ne anayi a ngondu wa kumpala wa tshidimu tshivua tshilonda dipingana diabu.

²⁰ Batuangaji ne bena Levi kudikobolola bonsu pamue, kushalabu kabayi mikiya. Ke pavua bena Levi mua kushipa bana ba mikoku, bilondeshile meyi ne mikandu bia tshibilu tshia Dipita dia Maweja-Nangila, mu dina dia bena Izrayele bonsu, kabidi ne dia bana babu batuangaji ne diabu bobu mene.

²¹ Bena Izrayele bonsu kudia didia dia Dipita dia Maweja-Nangila, ne bavua bafume ku bupika, ne bakuabu bavua babenga bibidilu bia bantu benyi bavua mu ditunga, bena mikiya. Bobu kabidi kudisanga ne bana babu bua kutendelela Maweja-Nangila Mvidi Mukulu wa Izrayele.

²² Pashishe kuenzabu ne disanka tshibilu tshia mampa kaayi mela buanga matuku muanda mutekete malondangane. Disanka adi bavua badipeta kudi Maweja-Nangila, bualu ke yeye uvua mupeshe mukalenga munene wa bena Ashure muoyi wa kalolu, wa kuenzela bena Izrayele bidibu bajinga. Ke bivua bibakolesha ku muoyi, bua batungunuka ne mudimu wa kuenzulula nzubu wa Mvidi Mukulu wa bena Izrayele.