Ezela 5 - MUKANDA WA MYIDI MUKULU

¹ Kadi dituku dikuabu, muambi Agayi ne muambi Zekarya, muana wa Ido, kumanyishabu bena Yuda ba mu Yerushalayime, ne ba mu ditunga dia Yuda, tshivua Mvidi Mukulu wa bena Izrayele, Mvidi Mukulu wabu, mubambile.

² Nanku, Zerubabele, muana wa Sheyaltiyele, ne Yeshuwa, muana wa Yoshadake, kutuadijabu kuibakulula nzubu wa Mvidi Mukulu mu Yerushalayime. Bavua babakolesha ku muoyi kudi bambi ba Mvidi Mukulu.

³ Diakamue, Tatenayi, mulombodi wa buloba buvua luseke ludi diba dibuelela lua musulu wa Perate, Shetare-Boznayi, ne balombodi nabu, kuya kuebeja bavua bibaka nzubu wa Mvidi Mukulu ne: — Udi munutumine diyi dia kuibakulula nzubu wa Mvidi Mukulu, ne kubandisha bimana biende nnganyi?

⁴ Tudi basue bua nutuambile mena a bantu badi benza mudimu ewu.

⁵ Kadi Mvidi Mukulu uvua mutabalele balombodi ba bena Yuda, bua kababapumbishi mua kutungunuka ne midimu to, too ne ku diba divua bantu bavuabu batume bua kumanyisha Daryaveshe bualu ebu, bapingane ne diandamuna diende.

Baluishi badi bafunda bena Yuda kudi Daryaveshe, mukalenga munene

⁶ Tatenayi, mulombodi wa ditunga, Shetare-Boznayi, ne balombodi nabu, bavua benza mudimu mu buloba buvua luseke ludi diba dibuelela lua musulu wa Perate, bavua batumine Daryaveshe, mukalenga munene, mukanda.

⁷ Mu mukanda awu, bavua bafundamu ne: “Tudi tujingila mukalenga munene Daryaveshe diakalenga mu midimu yende yonsu!

⁸ “Mukalenga munene, tudi tukumanyisha ne: tuvua baye mu buloba bua Yuda. Tuvua bamone muvuabu bibakulula nzubu wa Mvidi Mukulu munene ne mabue masonga, ne makunji a mabaya masa ku bimana. Badi bakuata mudimu bimpe, kabidi lukasa.

⁹ Tuvua bakonke balombodi ba midimu, bua batuambile uvua mubatumine diyi dia kuibakulula nzubu wa Mvidi Mukulu ne dia kubandisha bimana.

¹⁰ Tuvua babakonke kabidi bua batuambile mena abu, bua tukufundile mena a badi balombola midimu eyi.

¹¹ Bavua batuandamuna ne: ‘Tudi bena mudimu ba Mvidi Mukulu wa diulu ne buloba. Tudi tuibakulula nzubu wa Mvidi Mukulu, uvua mukalenga munene wa bena Izrayele muibake mujikije, kukadi mpindiewu bidimu bia bungi.

¹² Kadi bankambua betu bavua bafikisha Mvidi Mukulu wa mu diulu munda. Mvidi Mukulu kubafikisha mu bianza bia Nebukadnesare, muena Kesede, mukalenga wa Babilone. Mukalenga ewu ke uvua munyange nzubu wa Mvidi Mukulu, mukuate ne bantu, muye nabu ku bupika mu Babilone.

¹³ Kadi, Koreshe, mukalenga munene mumane kushala mu bukalenga mu Babilone tshidimu tshimue, kutumaye diyi bua bibakulule nzubu wa Mvidi Mukulu.

¹⁴ Mukalenga Nebukadnesare uvua muangate bintu bia tshiamu tshia mpawungi, ne bia tshiamu tshitoke tshia mushinga mukole, bivua mu nzubu wa Mvidi Mukulu wa mu Yerushalayime, muye kubiteka mu nzubu wa mvidie wende mu Babilone. Koreshe, mukalenga munene, kuangata bintu abi mu nzubu wa mvidie mu Babilone, kubipesha Sheshebashare, uvuaye muteke mulombodi wa buloba bua bena Yuda.

¹⁵ Mukalenga Koreshe uvua muambile Sheshebashare ne: uye ne bintu ebi. Pikalabu bamane kuasulula nzubu wa Mvidi Mukulu mu Yerushalayime muaba wende wa kale, uye kubiteka mu nzubu amu.

¹⁶ Nanku, Sheshebashare uvua mufike munemu mu Yerushalayime, muenze bitaku bipiabipia bia nzubu wa Mvidi Mukulu. Bituadija tshikondu atshi, midimu idi amu itungunuka, kadi kayena mianji kujika to.’

¹⁷ Mpindiewu, mukalenga, bu wewe musue, bakebulule mu mikanda yonsu ya bukalenga idi mu Babilone, bua bamanye ne: Koreshe, mukalenga munene, uvua mutume diyi bua bibakulule nzubu wa Mvidi Mukulu mu Yerushalayime. Pashishe utuambile meji audi muele bua kulongolola bualu ebu.”