Estere 9 - MUKANDA WA MYIDI MUKULU

Bena Yuda badi badisombuela

¹ Bena lukuna ba bena Yuda, bavua batekemena kubutula bena Yuda, mu matuku dikumi ne asatu a ngondu wa dikumi ne muibidi, ngondu wa Adare, bilondeshile diyi divua mukalenga mutume! Kadi, kabiakenzeka nanku to. Bena Yuda kutshimuna bantu bavua babapepeja abu.

² Bena Yuda kudisangisha mu bimenga bionsu biwabu basombe bia mu bukalenga bua Ahashaveroshe. Kuluishabu bantu bonsu bavua babelela tshifufu tshibi tshia kubabutula. Bantu bonsu bavua babatshine, kabayi mua kubafuila nkanana

³ Bambuluishi ba mukalenga, bamienampala bende, balombodi ne bena mu mbulamatadi, bavua batua ku tshia bena Yuda, bualu bavua batshina Mordekayi.

⁴ Mordekayi uvua ne muanzu munene mu nzubu wa bukalenga. Lumu luende luvua lumanyike too ne mu matunga a ku mpenga. Bumfumu buende buvua buenda bukola.

⁵ Bena Yuda bavua benzela bena lukuna babu, muonsu muvuabu basue. Bavua bashipa bantu bavule ku muele!

⁶ Bena Yuda bavua bashipa bantu nkama itanu pa mukuna wa Shushane. Bavua bashipa kabidi ne bana ba balume dikumi ba Amane, muana wa Amedata, muluishi wa bena Yuda. Mena a bana abu avua nenku:

⁷ Parshanedata, Dalfone, Aspata,

⁸ Porata, Adaliya, Aridata,

⁹ Parmasheta, Arishayi, Aridayi ne Vayezata.

¹⁰ Kadi kabawa bapawula bintu biabu to.

¹¹ Amu dituku adi, bobu kumanyisha mukalenga Ahashaveroshe bungi bua bantu bavuabu bashipe pa mukuna wa Shushane.

¹² Nanku mukalenga Ahashaveroshe kuebeja mukalenga mukaji Estere ne: — Pa mukuna wa Shushane nkayapu, bena Yuda mbashipe bantu nkama itanu, kusakidila ne bana ba balume dikumi ba Amane. Nanku badi mua kuikala bashipe bantu mu matunga makuabu mu bukalenga, bungi munyi? Kadi, paudi ujinga kundomba tshintu tshikuabu, ndi nkupeshatshi, nkumbaja majinga ebe onsu.

¹³ Estere kuandamuna mukalenga ne: — Mukalenga paudi musue, anyisha bua bena Yuda badi mu Shushane, benze maloba bu mudibu benza lelu emu. Kabidi utume diyi bua bele bitalu bia bana ba Amane ku tshiowelu.

¹⁴ Mukalenga kuela mukenji bua kuenzabu nanku. Kuelabu mukenji mupiamupia mu Shushane, kulembelejabu bitalu bia bana ba balume ba Amane kulu.

¹⁵ Musangu awu bena Yuda bavua basangila kabidi mu tshimenga tshia Shushane mu matuku dikumi ne anayi a ngondu wa Adare. Bavua bashipa bantu nkama isatu mu tshimenga. Kadi kabavua bapawula bintu biabu to.

¹⁶ Nenku bena Yuda bakuabu bavua basomba mu bitupa bikuabu bia buloba, bavua badisangisha bua bena lukuna babu kababenzedi bualu bubi. Kushipabu baluishi babu binunu makumi muanda mutekete ne bitanu. Kadi, kabawa bapawula bintu biabu to.

¹⁷ Bionsu abi bivua bienzeka mu matuku dikumi ne asatu a ngondu wa Adare. Mu matuku dikumi ne anayi, mvita kujika, bena Yuda kuenza tshibilu tshia disanka.

¹⁸ Kadi bena Yuda ba mu Shushane bavua bashipa bena lukuna babu mu matuku dikumi ne asatu ne mu matuku dikumi ne anayi a ngondu awu. Bavua bikisha dituku dia dikumi ne ditanu. Ke divuabu benza tshibilu tshia disanka.

¹⁹ Ke padi bena Yuda badi basomba ku misoku ya ku mpenga basungula dituku dia dikumi ne dinayi dia ngondu wa Adare, bua kuikalabu benzenza bibilu ne batuminangana bintu bia masanka.

Tshibilu tshia mufikilu

²⁰ Mordekayi kufunda malu onsu awu. Pashishe kutuminaye bena Yuda bonsu bavua mu bukalenga bua Ahashaveroshe, nansha bavua basombe kule, nansha bavua pabuipi mikanda.

²¹ Kubambilaye bua bikale benza tshibilu ku tshidimu tshionsu, dituku dia dikumi ne dinayi, ne dia dikumi ne ditanu dia ngondu wa Adare.

²² Bualu matuku awu, bena Yuda bavua bapete dikisha, kabatshiwa ne muluishi kabidi to. Ngondu awu, dibungama diabu divua diandamuke disanka, dikenga divua diandamuke diakalenga. Nanku bavua ne bua kuenza bibilu ne disanka, batuminangana bintu bia kusankishangana nabi, kupesha bapele bintu.

²³ Bena Yuda bavua balonde mikenji yonsu ivua Mordekayi muele. Bavua banyisha kabidi bua tshibilu tshivuabu benza musangu wa kumpala, batshienza ku tshidimu ku tshidimu bua tshishale tshivulukilu tshia malu awa menzeke.

²⁴ Mordekayi uvua ubavuluija ne: Amane, muana wa Amedata, wa ku ndelanganyi ya Agaje, uvua muena lukuna wa bena Yuda, uvua mushindike bua kubutula bena Yuda, uvua mutshinke ne purime bua kujadika dituku divuabu ne bua kuenza bualu ebu.

²⁵ Kadi Estere kuya kumanyisha mukalenga bualu abu. Ke mukalenga kutuma diyi, kufunda mukanda bua bakengeshe Amane mushindu uvuaye musue kukengesha bena Yuda. Ke bantu kumowa ne bana bende ba balume.

²⁶ Ke padibu binyika matuku aa ne Purime, bu mudi dina dia “pure” dileja “kaamu” kavuabu batshinka naku bualu ebu. Bena Yuda kuvuluka bionsu bivua Mordekayi mubambile mu mukanda. Kuvulukabu kabidi ne bionsu biwabu bamone, ne dikenga divuabu bapete.

²⁷ Nanku bena Yuda kuanyisha diyi edi, bajadike buabu bobu ne bua ndelanganyi yabu, ne bua bonsu bavua mua kubuela mu tshisumbu tshia bena Yuda, balame diyi edi bimpe. Bavua ne bua kulama bimpe matuku aa abidi a tshibilu tshia ku tshidimu ku tshidimu, bilondeshile muvua Mordekayi mulongolole.

²⁸ Bavua ne bua kuvuluka ku ndelanganyi yonsu matuku a bibilu bia Purime aa, mu diku dionsu dia bena Yuda, dia mu ditunga dionsu ne mu tshimenga tshionsu tshia mu bukalenga. Bena Yuda bonsu ne ndelanganyi yabu bavua ne bua kushala kashidi ne tshibidilu etshi, bavuluka malu onsu avuabu babenzele kudi bantu aba.

²⁹ Mukalenga muadi Estere, muana wa Abikayile pamue ne Mordekayi, muena Yuda, bavua bafunde mukanda musangu muibidi, bajadikila bantu malu a kuenza dituku dia Purime.

³⁰ Mikanda eyi, bavua bayitumina bena Yuda ba mu matunga lukama ne makumi abidi ne muanda mutekete a bukalenga bua Ahashaveroshe, bavua babajingila bupole ne ditalala.

³¹ Mu mikanda eyi bavua bambila bena Yuda bua kuenzabu tshibilu tshia Purime dituku divua Estere ne Mordekayi bajadike. Mukenji ewu uvua bualu buabu ne bua ndelanganyi yabu amu bu muvua mukenji wa kujila biakudia, ne wa kudila miadi.

³² Mikenji ya Estere eyi ivua ijadika bimpe, malu avuabu ne bua kuenza mu tshibilu tshia Purime, kuyifundabu mu mukanda.