Estere 6 - MUKANDA WA MYIDI MUKULU

Badi benzeja Amane ku bukole bua anemeke Mordekayi

¹ Butuku abu, mukalenga kawa mumone tulu kuisu to. Kutumaye diyi bua bamutuadile mukanda udi ulondolola malu avua menzeke mu bukalenga. Bobu kumutuadilawu, kuubalabu.

² Bavua babala nangananga bualu bua Mordekayi, muvuaye mujandule mukalenga tshifufu tshibi tshivuabu bamuelele kudi batungu bende babidi Bigtane ne Tereshe bua kumushipa. Bobu ke bavua ne mudimu wa kulama tshiibi tshia ku nzubu wa mukalenga.

³ Nenku mukalenga kubakonka ne: — Tuvua bapeshe Mordekayi tshinganyi tshia lumbandi? Tuvua bamuele tuasakidila bishi? Bena mudimu bende kuandamuna ne: — Kawa mupete kantu nansha kamue ka lumbandi to.

⁴ Mukalenga kukonka kabidi ne: — Udi mu lupangu lua bukalenga emu nnganyi? Diba adi Amane utshivua ubuelelaku mu lupangu. Uvua mufike bua kulomba mukalenga, bua kuovuabu Mordekayi ku tshiowelu tshimulongoluela.

⁵ Bena mudimu kuandamuna ne: — Amane ke udimu. Mukalenga kuamba ne: — Abuele!

⁶ Amane ubuela, mukalenga kumukonka ne: — Tshindi mua kuenzela muntu undi musue kuela menemene ka lumbandi ntshinyi? Amane uvua wela meji ne: “Udi mukalenga musue kuela ka lumbandi awu nnganyi? Udi mua kuikala amu meme!” Amane kuandamuna ne:

⁷ — Mukalenga, paudi musue kunemeka muntu,

⁸ umuvuadike tshimue tshia ku bivualu biebe menemene, umupe nyama webe wa kabalu, umuase tshifulu tshia bukalenga ku mutu wende.

⁹ Sungula umue wa ku balombodi banene ba mu bukalenga buebe, avuadike muntu awu bilamba bia bukalenga, amubandishe pa nyama wa kabalu, aye nende mu bisalu ne mu masangu a njila, ele mbila kumpala kuende ne: “Monayi mudi mukalenga unemeka muntu udiye musue kuela ka lumbandi.”

¹⁰ Mukalenga kuambila Amane ne: — Uye lukasa, wangata bilamba ne nyama wa kabalu. Wenzele Mordekayi, muena Yuda, udi musombe ku tshiibi tshia nzubu wa bukalenga muwambi amu. Kulekedi bualu nansha bumue bua mu malu auvua muambe awu to!

¹¹ Amane kuya kuangata bivualu ne kabalu. Kujadikaye Mordekayi bilamba, kumubandisha pa kabalu, kuya nende mu bisalu ne mu masangu a njila, wenda wela mbila ne: “Monayi mudi mukalenga unemeka muntu udiye musue kuela ka lumbandi!”

¹² Pashishe Mordekayi kupingana ku tshiibi tshia lupangu lua bukalenga. Amane kupingana lukasa kuende, mudibuikile tshilamba ku mesu bua bundu buvuaye nabu.

¹³ Amane kulondela Zereshe muena kuende, ne balunda bende, bionsu bivua bienzeka abi. Ke balunda bende kumuambila ne: — Mordekayi udibu bakufuishe nende bundu awu mmuena Yuda. Nanku kuena mua kumupita. Neupete amu dikasa dibi.

¹⁴ Patshivuabu bakula, bantu bavua mukalenga mutume kufika, bambila Amane mua kuya mu didia divua Estere mulongolole.