Estere 3 - MUKANDA WA MYIDI MUKULU

Amane ne Mordekayi badi bapangangana

¹ Matuku makese mamane kupita, mukalenga Ahashaveroshe kubandisha Amane, muana wa Amedata, wa ku ndelanganyi ya Agaje, muanzu wa mulombodi wa kumpala mu ditunga.

² Bena mudimu bonsu ba mu nzubu wa bukalenga bavua batua binu, binyika ne mitu kumpala kua Amane, bu muvua diyi dia mukalenga. Kadi amu Mordekayi nkayende ke uvua ubenga kuenza nanku.

³ Bena mudimu bakuabu ba mukalenga kukonka Mordekayi tshidiye ubengela diyi dia mukalenga adi.

⁴ Mordekayi uvua ubandamuna ne: “Bualu ndi muena Yuda”. Ku dituku ku dituku bavua babela Mordekayi bua angate diyi adi ne mushinga! Kadi Mordekayi kubenga. Nenku bobu kuya kumusonguela kudi Amane, bua bamone ne: udi utungunuka ne kuenza nanku anyi?

⁵ Amane mumane kujadika muvua Mordekayi mubengelemu bua kumutuila binu ne kuinyika mutu kumpala kuende, kufikaye munda bikole.

⁶ Bantu kumuambila kabidi ne: Mordekayi mmuena Yuda. Nanku kumonaye ne: ki mbimpe kunyoka amu Mordekayi nkayende, kadi mbimpe kubutula bena Yuda, bena tshisamba tshiabu bonsu badi basombela mu bukalenga bua Ahashaveroshe.

⁷ Mu ntuadijilu wa tshidimu tshia dikumi ne tshibidi tshivua Ahashaveroshe mulale mu bukalenga, ngondu wa kumpala wa Nisane, Amane kutshinkisha ne Purime, bua kumanya dituku dia ngondu divuaye ne bua kukumbaja meji avuaye muele. Ditshinka kuleja dituku dia dikumi ne dibidi dia ngondu wa Adare.

Amane udi ulongolola kubutula bena Yuda

⁸ Amane kuambila mukalenga Ahashaveroshe ne: — Mukalenga, mu bukalenga buebe, mudi tshisamba tshia bantu ba mushindu mukuabu, bamuangalaka mu bitupa bionsu bia bukalenga buebe. Bibidilu biabu mbishilangane ne bia bantu ba bisamba bikuabu bionsu. Kabena banemeka meyi ne mikandu bia mu bukalenga to. Kadi tshiudi mulekele bantu aba basomba talalaa mu ditunga ntshinyi?

⁹ Paudi musue, funda mukanda, ele diyi bua babutule bantu aba. Nanku meme nempeshe bena mudimu badi balongolola malu a bukalenga kilo binunu nkama isatu ya tshiamu tshitoke tshia mushinga mukole, bua babiteke mu tshibutshilu tshia bukalenga.

¹⁰ Ke mukalenga kukopola kakanu ka ku munu, kukapesha Amane muluishi wa bena Yuda, muana wa Amedata, wa ku ndelanganyi ya Agaje.

¹¹ Mukalenga kumuandamuna ne: — Tshiena nkengela lupetu luebe. Kadi bantu aba, ndi nkulekelabu, wenza nabu muudi musue.

¹² Kubikidishabu bafundi ba malu a mukalenga, matuku dikumi ne asatu a ngondu wa kumpala. Bilondeshile muvua Amane mubambile, bafundi kufunda mikanda, kuyitumina bamienampala ba mukalenga, balombodi ba mu ditunga, ne bamfumu ba bisamba bishilangane. Mikanda ayi, bavua bayifunde mu mfundilu mishilangane ne mu miakulu mishilangane ivuabu bakula mu ditunga. Kufundabu dina dia mukalenga ne: ke udi muyifunde. Kutuabu tshitampi tshia kakanu ka mukalenga Ahashaveroshe.

¹³ Pashishe kutumabu bantu bua bafile mikanda ayi mu ditunga dionsu dia mu bukalenga. Mu mikanda eyi bavua bela diyi dia kushipa ne kubutula bena Yuda bonsu, kakuyi luse nansha lukese: bansongalume, bantu bakole, bakaji ne bana. Bavua mua kupawula kabidi bintu biabu bionsu. Bavua ne bua kushipa bantu dituku anu dimue, mu ngondu wa dikumi ne muibidi, dituku dia dikumi ne disatu dia ngondu awu.

¹⁴ Mu ditunga dionsu divuabu bapete mukanda ewu, bantu bavua bautangila bu diyi disuika kudi mukalenga. Nanku bavua ne bua kuubadila bantu bonsu, bua muntu yonsu adilongolole, amone mua kukumbaja dituku adi tshidibu bambe.

¹⁵ Bantu bavua mukalenga mutume kuya lukasa. Pashishe kumanyishabu bantu bonsu bavua basomba pa mukuna wa Shushane bualu. Diba adi, mukalenga ne Amane kuya kunua maluvu, kadi bena mu tshimenga tshia Shushane bavua ne kanyinganyinga kakole.