Ekesode 35 - MUKANDA WA MYIDI MUKULU

DIBAKA DIA NZUBU WA MVIDI MUKULU Dituku dia Dikisha

¹ Moshe kubikila bena Izrayele bonsu, kubambila ne: — Telejayi mikenji idi Maweja-Nangila mutume bua nuenu kukumbaja:

² “Nuenze mudimu matuku asambombu. Kadi dituku dia muanda mutekete ndia Dikisha, bualu ndituku dia tshijila dia Maweja-Nangila. Muntu yonsu udi wenza mudimu dituku adi nebamushipe.

³ Kabidi kanuena mua kutemesha nansha kapia mu nzubu wenu nansha umue dituku adi to.”

Bena Izrayele badi bafila milambu yabu

⁴ Moshe uvua utungunuka ne dimanyisha bena Izrayele mikenji ya kudi Maweja-Nangila ne:

⁵ — Muntu yonsu afile mulambu bu mudiye musue. Milambu inudi mua kulambula Maweja-Nangila ikale ya mishindu mishilangane: ya tshiamu tshia mpawungi, ya tshiamu tshitoke tshia mushinga mukole, ne ya tshiamu tshikunze,

⁶ bilamba bia boya bua nyama bifikuluke, bikunzubile, ne bikunze kunzuu; bilamba bia ndanda, ne bia boya bua mbuji;

⁷ biseba bia mikoku ya bimpanga bilaba kakula, ne biseba bia nyama ya nkonga; mitshi ya ndunga;

⁸ mafuta a kuela mu muendu, manananshi a kusambakaja ne mafuta a kulaba, ne manananshi a mupuya mukole a kuosha;

⁹ mabue a onikse, ne mabue makuabu a mushinga mukole a kuteka mu tshilamba tshia mutuangaji munene tshia efode ne mu tshilamba tshiende tshia pa tshiadi.

¹⁰ Nanku bantu ba kunudi benji ba midimu ya bianza, bafike bua kuenzela Maweja-Nangila mudimu uvuaye muambe.

¹¹ Benze nzubu wa tshijila ne ntenta, tshilamba tshia kubuikila pa mutu pa ntenta, nkanu, mabaya, mitshi, makunji ne bitaku.

¹² Benze mushete wa ndondu ne mitshi ya kuelaku, ne tshibuikidiji tshiawu. Benze tshilamba tshidi tshijika mushete awu.

¹³ Benze mesa ne mitshi ya kuelaku, kabidi ne bintu bionsu bidi pa mesa too ne mampa a kulambula Mvidi Mukulu.

¹⁴ Benze tshitekelu tshia muendu ne bintu bionsu bidiku: miendu, ne mafuta a kutemesha nawu.

¹⁵ Benze tshilambuilu tshia manananshi, ne mitshi ya kuelaku; mafuta a kuela pa mutu, ne manananshi a kuosha; tshilamba tshia mu mushiku wa mbelu wa nzubu wa tshijila;

¹⁶ tshilambuilu tshia milambu ne tukanu tua tshiamu tshikunze, mitshi ya kuelaku, ne bintu bionsu bivua ku tshilambuilu; dilongu dinene ne tshitaku tshiadi.

¹⁷ Benze bilamba bia ku lupangu, ne makunji alu, ne bitaku biawu; tshilamba tshia mu mushiku wa mbelu wa lupangu;

¹⁸ milonda ya bitupa ya mu nzubu wa tshijila, ne ya ku lupangu, too ne mionji ya kuelaku.

¹⁹ Benze bilamba bia lumu bia kuenza nabi mudimu muaba wa tshijila; bilamba bia tshijila bia mutuangaji munene Arone, ne bia bana bende ba balume.

²⁰ Bena Izrayele kushiyangana ne Moshe.

²¹ Bantu ba muoyi muimpe kufila milambu yabu kudi Maweja-Nangila bua kuasa ntenta wa kusambakena, bua midimu ya kutendelela, ne bua kutela bilamba bia tshijila.

²² Bantu bonsu ba muoyi muimpe balume ne bakaji, kufila bilengejilu bia tshiamu tshia mpawungi bia mishindu mishilangane: tukanu tua pa bilamba, tua ku matshi, tua ku minu ne tua mu nshingu. Kadi muntu yonsu uvua wela bintu abi mulu, ubinyukule bua kubilambula Maweja-Nangila.

²³ Bantu bakuabu kulambula Maweja-Nangila milambu mikuabu: bilamba bia miosa ya nyama bifikuluke, bikunzubile, bikunze kunzuu, bia ndanda muine ne bia miosa ya mbuji, biseba bia mikoku ya tshimpanga bilaba kakula, ne bikuabu bia nyama ya nkonga ya mu mayi.

²⁴ Bantu bakuabu kulambula Maweja-Nangila biamu: bitoke bia mushinga mukole ne bikunze. Badipu kulambula mitshi ya ndunga ivuabu mua kuenza nayi mudimu awu.

²⁵ Bakaji bonsu bavua bamanye mua kutela ku bianza, kulambulabu bilamba bitela bimpe bia mishindu mishilangane: bia ndanda, bia miosa ya nyama bifikuluke, bikunzubile, nansha bikunze kunzuu.

²⁶ Bakaji bakuabu batalame kulambulabu bilamba bia boya bua mbuji.

²⁷ Bamfumu ba meku kulambula mabue a mushinga mukole a onikse ne mabue makuabu a kuteka mu tshilamba tshia efode tshia mutuangaji munene, ne mu tshilamba tshiende tshia pa tshiadi.

²⁸ Kulambulabu kabidi bintu bia mupuya mukole, mafuta a kuela mu miendu, a kuela mu mutu, ne a kusambakaja ne manananshi a kuosha.

²⁹ Bena Izrayele bonsu balume ne bakaji ba muoyi muimpe, kulambulabu bintu bia kuenza nabi mudimu uvua Maweja-Nangila muambile Moshe.

Beshalele ne Okoliyabe badi batuadija mudimu

³⁰ Moshe kuambila bena Izrayele ne: — Maweja-Nangila mmusungule Beshalele, muana wa Uri, udi kabidi muikulu wa Ure, wa mu tshisamba tshia Yuda.

³¹ Mueyelu wa Mvidi Mukulu udi nende, bua ikale muntu wa lungenyi ne meji, mumanye mua kuenza midimu ya bianza mishilangane:

³² mmumanye mua kulongolola midimu, kusonga bintu bia tshiamu tshia mpawungi, bia tshiamu tshitoke tshia mushinga mukole, ne bia tshiamu tshikunze;

³³ kusonga mabue a mushinga mukole, kuteka mu masosu; kusonga kabidi ne mitshi ya kuenza nayi midimu. Mu tshikosu, mmumanye mua kuenza midimu yonsu.

³⁴ Maweja-Nangila mmumupeshe kabidi yeye ne Okoliyabe, muana wa Akisamaka, wa mu tshisamba tshia Dane, lungenyi lua kulongesha bakuabu midimu ayi.

³⁵ Mmubapeshe bipedi bia kusonga mabue a mushinga mukole, kuzola bilamba bia miosa ya nyama, bifikuluke, bikunzubile, bikunze kunzuu, ne bia ndanda. Bobu aba ke bamanyi ba kalanda-musenga ba midimu yonsu ya bianza.