Ekesode 24 - MUKANDA WA MYIDI MUKULU

Mvidi Mukulu udi utua ndondu ne bena Izrayele

¹ Maweja-Nangila kuambila Moshe ne: — Bikila Arone, Nadabe, Abihu ne bakulu ba bena Izrayele makumi muanda mutekete. Ubande ku mukuna kundi eku bua kutendelela. Kadi, batuile binu pa bule.

² Anu wewe nkayebe usemena pabuipi nanyi. Bena Izrayele bonsu kabena mua kubanda ku mukuna eku to.

³ Moshe kupueka bua kumanyisha bantu meyi ne mikenji bivua Maweja-Nangila mumuambile. Bantu bonsu kuitaba ne: — Netuenze bionsu bidi Maweja-Nangila muambe.

⁴ Moshe kufunda meyi onsu a Maweja-Nangila mu mukanda. Kujukaye dinda dionsu, kuasaye tshilambuilu kuinshi kua mukuna. Kujulaye kabidi makunji a mabue manene dikumi ne abidi. Tshisamba tshionsu tshia bena Izrayele tshivua ne dikunji diatshi.

⁵ Pashishe, Moshe kutuma nsongalume ya bena Izrayele, bua kuoshila Maweja-Nangila nyama mijima, ne bua kumulambula ngombe milume, bua mulambu wa ditua ndondu.

⁶ Moshe kuangata mashi a nyama ayi kuela mu dilongu. Makuabu kuamiaminaye ku tshilambuilu.

⁷ Pashishe, kubalaye ne diyi dikole mukanda wa meyi a ndondu uvua Maweja-Nangila mutue ne bantu. Bantu bonsu kuitaba ne: — Netuenze bionsu bidi Maweja-Nangila muambe.

⁸ Moshe kuangata kabidi mashi avua mashale mu dilongu, kuamiamina bena Izrayele pambidi, wamba ne: — Mashi aa, adi ajadika ndondu uvua Maweja-Nangila mutue nenu pavuaye nnumanyisha meyi ende.

⁹ Pashishe, Moshe, Arone, Nadabe, Abihu ne bakulu ba bena Izrayele makumi muanda mutekete kubanda ku mukuna.

¹⁰ Kumonabu Mvidi Mukulu wa Izrayele, muimane pa mabue matoke a mushinga mukole, engelela. Mabue awu avua mafuanangane ne mubidi wa tshibuashibuashi.

¹¹ Bakulu ba bena Izrayele bamane kumona Mvidi Mukulu nanku, kudiabu, kunuabu pamue. Kadi Mvidi Mukulu kena muenzele bakulu ba bena Izrayele abu bibi to.

Moshe udi umonangana ne Mvidi Mukulu ku mukuna

¹² Maweja-Nangila kuambila Moshe ne: — Banda ku mukuna kundi eku usombaku. Nenkupeshe mabue adi ne mikenji indi mufunde bua uyilongeshe bantu.

¹³ Moshe kujuka ne Yoshuwa uvua umuambuluisha, kuambilaye bakulu ne:

¹⁴ “Nushale batuindile muaba ewu too ne pawapingana. Padi muntu ne bualu, aye kudi Arone ne Ure, banudi nushala nabu.”

¹⁵ Moshe kubanda ku mukuna. Mukuna awu uvua mubuikile kudi divuba.

^16-17 Butumbi bua Maweja-Nangila buvua ku mukuna wa Sinayi. Kumuenekabu ku mesu a bena Izrayele bu kapia kakole ku lusongu lua mukuna. Divuba kushala dibuikila mukuna awu matuku asambombu. Dituku dia muanda mutekete, Maweja-Nangila kubikila Moshe mu divuba.

¹⁸ Moshe kubuela munda mua divuba, kubanda kabidi pa mukuna, kushalaku matuku makumi anayi a munya ne a butuku.