Ekesode 21 - MUKANDA WA MYIDI MUKULU

Mikenji bua bapika bikale bena Ebrewu

¹ — Mikenji mikuabu iudi mua kuambila bena Izrayele idi nunku:

² “Nuenu basumbe muena Ebrewu, anuenzele mudimu wa mupika anu bidimu bisambombu. Kadi tshidimu tshia muanda mutekete, numulekele tshianana, kayi unufuta to.

³ Panuikala bamusumbe nkayende, numutekela kabidi anu nkayende. Kadi panuikala bamusumbe ne mukajende, nubalekele bonsu babidi.

⁴ Panuikala baselela mupika mukaji, mukaji awu munulelele bana ba balume nansha ba bakaji, nulekele mupika awu anu nkayende. Mukaji ne bana bishale bia mfumu uvua mumusumbe awu.

⁵ Pikala muntu awu wamba ne: ndi munange mfumuanyi, ndi musue kushala ku bupika bua kusombela mukajanyi ne bana banyi,

⁶ nanku mfumuende nealombe Mvidi Mukulu bua ajadike bualu ebu. Nebimanyike muntu awu ku tshiibi nansha ku tshipanda tshia ku nzubu kuende. Nebamutubule ditshi muaba awu, bua ashale mupika too ne ku lulu luende.

⁷ “Muntu musumbishe muanende wa bakaji ku bupika, kabena batekela mukaji awu bu mudibu batekela muntu mulume to.

⁸ Pikala mukaji awu kayi ulengelela kabidi mfumuende uvua mumusumbe bua ikale mukajende, nanku nebamupikule kudi tatuende. Kadi mfumuende uvua mumusumbe kena mua kumupana kudi muntu udi kayi muena Izrayele to, bualu ke kuenzela mupika awu bibi.

⁹ Pikala muntu musumbile muanende wa balume mupika bua ikale mukajende, alame mupika mukaji awu bilondeshile mikenji ya kulama bana ba bakaji.

¹⁰ Nansha mfumu awu musela mukaji mukuabu, kena mua kupepeja mukaji wa kumpala awu, nansha ku biakudia, nansha ku bilamba ne ku dimubuelela dia mu nzubu.

¹¹ Nanku, pikala mulume awu kayi muenzele mukaji wa kumpala malu awu asatu, mukaji udi mua kumuka, kayi ufuta to.

Mikenji idi ikebela muntu lufu

¹² “Muntu udi ushipa mukuabu ku mituutu, nebamushipe pende ku mituutu.

¹³ Pikala muntu mushipe mukuabu mu mpukapuka, kayi ne muoyi wa kumuenzela bibi, mushipianganyi neabutame muaba unganuleja.

¹⁴ Pikala muntu mutekete mukuende tshiji, mumushipe ku bukole ne budimu, nansha yeye ku tshilambuilu tshianyi, numukuate numushipe.

¹⁵ “Muntu udi utuuta tatuende nansha mamuende, numushipe.

¹⁶ “Muntu udi wiba muntu, numushipe, nansha basangane muntu awu ku nzubu kua muivi, nansha yeye mumane kumupana.

¹⁷ “Muntu udi wela tatuende nansha mamuende milawu, numushipe.

Mituutu ne mputa

¹⁸ “Pikala bantu babidi batandangane, umue utuuta mukuabu bikole ne bisusu, nansha mumuase dibue, pikala uvuabu batuuta mushale mu bulalu usama, kayi mufue,

¹⁹ nansha mushale utebuka ne mutshi, wendakana pambelu, mututshianganyi awu neafute amu tshibawu, bua matuku avua mubedi mushale mu bulalu ne bua kumondapisha too ne pumvuaye bimpe.

²⁰ “Muntu mutuute mupika wende mulume nansha mukaji ne mutshi, mumushipe musangu umue, numunyoke.

²¹ Kadi pikala mupika awu mufue kunyima kua dituku dimue nansha kua matuku abidi, nebalekele mututshianganyi, bualu mbintu biende.

²² “Pikala bantu balume batandangane, mukuabu kusakila mukaji muikale ne difu, mukaji kutula difu adi, kayi mushale usama, uvua mumusakile neafute tshibawu tshionsu tshikala bayende wa mukaji mulombe kudi balumbuluishi.

²³ Kadi pikala mukaji mupete njiwu, mbimpe kusombuela. Mushipi wa muntu, bamushipe.

²⁴ Mushipianganyi wa disu, bamushipe diende. Mupodianganyi wa dinu, bamupole diende. Mukoshanganyi wa tshianza, bamukose tshiende. Mukoshanganyi wa dikasa, bamukose diende.

²⁵ Moshanganyi wa kapia, bamoshe kende. Mutapianganyi wa mputa, bamutape pende. Mututshianganyi, bamufute pende.

²⁶ “Pikala muntu mutuute mupika wende mulume nansha mukaji mumushipe disu, amumushe ku bupika bua kufuta disu diende adi.

²⁷ Pikala muntu mupole dinu dia mupika wende mulume nansha mukaji, amumushe ku bupika bua kufuta dinu diende adi.

²⁸ “Pikala ngombe mulume mushipe muntu mulume nansha muntu mukaji ku nsengu yende, ngombe awu bamuase mabue, bamushipe. Kadi kabena mua kudia munyinyi wende to. Nanku muena ngombe awu kena yeye ne bualu to.

²⁹ Kadi pikala ngombe ne tshibidilu tshia kutua bantu nsengu, bamanyisha mfumuende, kayi utangila bu bualu, kayi umulama, nanku ngombe awu yeye mushipe muntu mulume nansha mukaji, bamuase mabue, bamushipe. Pashishe bashipe kabidi muena ngombe awu.

³⁰ Kadi pikalabu balombe muena ngombe tshibawu bua adipikule pa mutu pa kufuaye, nanku neafile bintu bionsu bidibu bamulombe.

³¹ Pikala ngombe mutue nsongalume nansha nsongakaji nsengu mumushipe, muena ngombe neapete dinyoka dia momumue.

³² Pikala ngombe mulume mutuute mupika mulume nansha mukaji ku nsengu, nebafute mfumu wa mupika awu nkanu ya tshiamu tshitoke tshia mushinga mukole makumi asatu. Kadi ngombe nebamushipe ku mabue.

³³ “Pikala ngombe nansha mpunde wa bende mufuile mu tshiina tshia mayi tshishale buashi, nansha tshiumbula katshiyi tshibuikila,

³⁴ muena tshiina neafute tshibawu. Kadi nyama udi mufue neashale mu dina dia muena tshiina.

³⁵ “Pikala ngombe milume ibidi mituangane, umue mushipe mukuabu, mbasumbishe ngombe uvua mushale ne muoyi. Bena ngombe nebabanyangane makuta ne munyinyi wa ngombe uvua mufue.

³⁶ Kadi pikala ngombe ne tshibidilu tshia kusangana nsengu, bamanyisha mfumuende, kayi musue kumulama, neapingaje ngombe wa muoyi, angate ngombe uvua mufue awu.

Kuiba bimuna

³⁷ “Pikala muntu muibe ngombe, mukoku nansha mbuji, yeye mushipe tshimuna atshi, nansha mutshisumbishe, neafute ngombe itanu bua ngombe umue awu, ne mikoku nansha mbuji inayi bua mukoku nansha mbuji umue awu.