Ekesode 15 - MUKANDA WA MYIDI MUKULU

Musambu wa Moshe ne wa bena Izrayele

¹ Pashishe, Moshe ne bena Izrayele kuimbila Maweja-Nangila musambu, bamba ne: Nengimbile Maweja-Nangila musambu: mmuleje bukole budiye nabu! Mmubutule mu mayi tubalu ne bavua babandapu.

² Maweja-Nangila udi bukole buanyi. Anu yeye ke Musungidi wanyi. Udi Mvidi Mukulu wanyi. Ndi tumutumbisha. Udi Mvidi Mukulu wa tatu wanyi. Ndi mmanyisha bantu bunene buende.

³ Maweja-Nangila udi tshilobu tshia mvita. Dina diende mMaweja-Nangila.

⁴ Udi mubutule mu mayi manene, matempu ne biluilu bia mukalenga wa bena Ejipitu. Kubutulaye bilobu bia mukalenga wa bena Ejipitu, bajimine mu Mayi manene makunze.

⁵ Mayi kubabuikila. Kudinabu too ne panshi pa mayi, bu mudi dibue dia bujitu.

⁶ Maweja-Nangila, tshianza tshiebe tshia balume tshidi ne bukole, tshidi tshibutula baluishi bebe.

⁷ Bukole buebe mbupite. Budi butshimuna badi bakubenga. Tshiji tshiebe tshidi tshibosha, bu mudi kapia kosha bisosa.

⁸ Ku bukole bua tshiji tshiebe, mayi kudisanga muaba umue. Mavuala onsu kukuatakana bu tshimana, mayi menza dibue munkatshi mua mayi manene.

⁹ Bena lukuna betu kuamba ne: “Netubalonde, tubapete. Nebabanyangane bintu biabu, netubidie tuukute. Netutule muele wa mvita, tubabunde bonsu.”

¹⁰ Kadi, Maweja-Nangila, wewe kutuma lupepele. Mayi manene kubuikila bena Ejipitu. Kudinabu too ne panshi pa mayi, bu tshiamu tshia bujitu.

¹¹ Maweja-Nangila, ku mvidie idibu batendelela, udi ukufuana nnganyi? Kakuena udi wa tshijila, amu wewe! Kakuena mukuabu udi mua kuenza malu a kukema! Kakuena mukuabu utudi ne bua kutshina. Kakuena mukuabu utudi tutumbisha.

¹² Wewe kuolola diboku diebe dia bukole, buloba kumina baluishi betu!

¹³ Wewe kupikula bantu bebe! Wewe kubananga, kubalombola ne bukole! Wewe kubafikisha mu ditunga dia tshijila!

¹⁴ Bantu kumvua lumu alu, kuzakala! Bena Peleshete kukuatshika bowa.

¹⁵ Bamfumu ba bena Edome kutshina! Bilobu bia bena Mowabe kuzakala! Bena Kenaane kupanga tshia kuenza.

¹⁶ Bowa ne dipampakana kubakuata bonsu. Baluishi kumona bukole buebe. Kuimanabu bu mabue, kabayi banyunga. Bantu baudi musungule, mubenze bebe, kupita talalaa, kamuyi bualu.

¹⁷ Maweja-Nangila, wewe kubafikisha, kubasombesha, pa mukuna uudi mudisunguile, pa muaba uudi musue kusomba, mu nzubu wa tshijila uudi mudiashile.

¹⁸ Maweja-Nangila, udi mfumu wa kashidi ne kashidi tshiendelele!

¹⁹ Pavua tubalu tua mvita, matempu ne badi babandapu bia mukalenga wa bena Ejipitu bibuele mu mayi manene, Maweja-Nangila kubibuikila ne mayi. Kadi bena Izrayele kusabuka mayi ku makasa kume.

²⁰ Diba adi muambi mukaji Miriyame, muanabu ne Arone, kuangata ngoma wende mukese. Bamamu bonsu ba bena Izrayele kumulonda, kuimba ngoma, kuja ne maja.

²¹ Miriyame kuambila bena Izrayele ne: Imbilayi Maweja-Nangila musambu: mmuleje bukole budiye nabu, mmubutule tubalu ne bavua babandapu!

LUENDU LUA BENA IZRAYELE MU TSHIPELA Mayi a bululu

²² Moshe kumuka ne bena Izrayele ku Mayi manene makunze, kuya mu tshipela tshia Shure. Kuendabu mu tshipela matuku asatu, kabayi bapeta mayi a kunua.

²³ Kufikabu ku Mara. Kabavua mua kunua mayi avua muaba awu, bualu avua ne bululu. Ke pavuabu babikila muaba awu ne: Mara (mmumue ne: a bululu).

²⁴ Bena Izrayele kunungana, bakonka Moshe ne: “Netunue tshinyi?”

²⁵ Moshe kusengelela Maweja-Nangila. Maweja-Nangila kumuleja tshitupa tshia mutshi. Moshe kutshiela mu mayi. Bululu mu mayi kujika. Ke muaba uvua Maweja-Nangila mupeshe bena Izrayele meyi ne mikenji biende, mubatete kabidi.

²⁶ Maweja-Nangila kubambila ne: “Nuenu bateleje diyi dianyi meme, Maweja-Nangila, Mvidi Mukulu wenu, bakumbaje bilenga bindi nnuambila, batumikile mikenji yanyi, tshiakunutumina dikenga nansha dimue, bu mumvua mutumine bena Ejipitu. Bualu meme ndi Maweja-Nangila, udi unondapa.”

²⁷ Pashishe, bena Izrayele kufika ku Elime. Muaba awu, uvua mpokolu ya mayi dikumi ne ibidi ne mabue a ngaji makumi muanda mutekete. Kuasabu pabuipi ne mayi awu.