Ekesode 13 - MUKANDA WA MYIDI MUKULU

Mikenji mikuabu ya tshibilu tshia Dipita dia Maweja-Nangila

¹ Maweja-Nangila kuambila Moshe ne:

² — Muanabute yonsu wa balume wa bena Izrayele, udi mukaji ulela, nansha wa tshimuna, umujidile, ashale wanyi.

³ Moshe kuambila bena Izrayele ne: — Nuvuluke dituku edi. Kanudi mampa adibu bela buanga to. Bualu ke dituku divua Maweja-Nangila muleje bukole buende, munupatule ku bupika mu Ejipitu.

⁴ Nuvua bapatuke lelu, mu ngondu ewu wa Abibe.

⁵ Panuafika mu ditunga dia bena Kenaane, bena Iti, bena Amore, bena Ivi ne bena Yebusa, divua Maweja-Nangila mulaye bankambua benu, ditunga didi ne biakudia bipite bungi, nuikale nuenza tshibilu etshi, ku tshidimu ku tshidimu, mu ngondu wa Abibe.

⁶ Matuku malondangane muanda mutekete, nudie anu mampa adi kaayi mela buanga. Dituku dia muanda mutekete, nuenzele Maweja-Nangila tshibilu bua kumutendelela.

⁷ Matuku muanda mutekete awu, nudie anu mampa adi kaayi mela buanga. Kanulami kabidi mampa mela buanga, nansha buanga bua mampa mene, mu ditunga dienu dijima.

⁸ Pa kuenza tshibilu etshi, mmianyishe bana benu ba balume ne: Tudi tuenza nunku, bua kuvuluka muvua Maweja-Nangila mutupatule mu Ejipitu.

⁹ Tshibilu etshi netshikale bu tshimanyinu ku diboku nansha pa mpala yenu, bua kunuvuluija dipatuka dienu mu Ejipitu. Nanku, netshinuvuluije munudi ne bua kumanyisha bantu mikenji ya Maweja-Nangila, uvua munupatule mu ditunga dia Ejipitu.

¹⁰ Tshibilu etshi, nutshienze ku tshidimu tshionsu, dituku diatshi.

¹¹ Moshe kuamba kabidi ne: — Pikala Maweja-Nangila munufikishe mu ditunga dia bena Kenaane, divuaye munulaye nuenu ne bankambua benu,

¹² nujidile muanabute yonsu wa muntu nansha wa tshimuna, bua ashale wa Maweja-Nangila.

¹³ Kadi muanabute wa balume wa nyama wa mpunde, numupikule ku muana wa mukoku. Panuikala kanuyi mua kumupikula, numushipe nukoyobole nshingu. Nupikule kabidi muanabute yonsu wa balume wa muntu.

¹⁴ Dituku dikuabu pikala bana benu banukonka tshinudi nuenzela nanku, nubambile ne: “Tudi tuvuluka bukole bua Maweja-Nangila, uvua mutupatule ku bupika mu Ejipitu.

¹⁵ Bu muvua mukalenga wa bena Ejipitu ubenga mua kutulekela, Maweja-Nangila uvua mushipe bamuanabute bonsu ba mu ditunga dia Ejipitu, ba bantu ne ba bimuna. Ke patudi tushipela Maweja-Nangila bamuanabute ba bimuna. Kadi tudi tupikula bamuanabute ba balume ba bantu.”

¹⁶ Nanku, milambu eyi neinuvuluije bualu ebu, bu mudi tshimanyinu ku diboku nansha pa mpala. Neinuvuluije muvua Maweja-Nangila munupatule mu ditunga dia Ejipitu ku bukole buende.

Mvidi Mukulu udi ulombola bantu bende

¹⁷ Mukalenga wa bena Ejipitu mumane kulekela bena Izrayele, Mvidi Mukulu kena mubaleje njila wa tshikosu wa mu ditunga dia Peleshete to. Bualu Mvidi Mukulu uvua mumanye ne: pikale mvita mijuke, nebatshine, bapingane kabidi mu Ejipitu.

¹⁸ Nanku, Mvidi Mukulu kunyungulula bena Izrayele. Kulondabu njila wa mu tshipela bua kuya luseke ludi Mayi manene makunze. Bena Izrayele kupatuka mu Ejipitu, balondangane mu bisamba biabu.

¹⁹ Moshe kuambula mifuba ya Yozefe. Bualu Yozefe uvua mutshipeshe bana babu, mubalombe ne: “Pikala Mvidi Mukulu munupikule, nujule mifuba yanyi muaba ewu, nuye nayi.”

²⁰ Bena Izrayele bumuke ku Sukote, kuasabu mitanda yabu mu Etame ku muelelu wa tshipela.

²¹ Mu munya, Mvidi Mukulu uvua mu divuba kumpala kua bena Izrayele bua kubaleja njila. Kadi butuku uvua mu tshimunyi tshia kapia bua kutokeshila bena Izrayele njila. Ke muvuabu mua kuenda butuku ne munya.

²² Nanku, divuba divua kumpala kua bena Izrayele mu munya, ne tshimunyi tshia kapia tshivua kumpala kuabu butuku. Kabivua biumuka kumpala kuabu to. Bivua anu Ubalombola diba dionsu.