Efeze 6 - MUKANDA WA MYIDI MUKULU

Bana ne baledi

¹ Bana, nudi ne bua kutumikila baledi benu. Ke munudi nuleja munudi nutumikila Mfumu.

² “Nemeka tatuebe ne mamuebe” ke mukenji wakumpala udibu bela, balaya bualu. Udi uukumbaja, badi bamulaya ne:

³ “Neikale ne diakalenga. Neashale matuku a bungi pa buloba.”

⁴ Baledi, kanufikishi bana benu munda. Kadi nubakoleshe, nubakele, nubabele mushindu udi Mfumu musue.

Bapika ne bamfumu babu

⁵ Bapika, tumikilayi bamfumu benu ba panu, batshinayi, banemekayi. Enzayi nanku ne muoyi umue, bu munudi mua kuenzela Kristu.

⁶ Kanubenzedi nanku, amu bua kubasankisha padibu banutangila. Kadi enzayi nanku bu bapika ba Kristu, badi bakeba kukumbaja ne muoyi wabu mujima bidi Mvidi Mukulu musue.

⁷ Mudimu wenu wa bupika, nuukuate ne muoyi mulenga, bu badi benzela Mfumu mene, kanuyi nuwenzela amu bantu nkayabu to.

⁸ Nuvuluke ne: muntu yonsu, nansha yeye mupika, nansha yeye muntu udi udienzela mudiye musue, nebamufute kudi Mfumu, bilondeshile malu mimpe avuaye muenze.

⁹ Kadi nuenu bamfumu ba bapika, nunemeke bapika benu amu mushindu wa momumue. Kanubakanyinyi nansha. Nuvuluke ne: nuenu ne bapika benu, nudi amu ne Mfumu umue mu diulu, udi kayi ne kansungasunga.

Bia mvita bia kudi Mvidi Mukulu

¹⁰ Nanku, kebayi bukole pa kudisanga ne Mfumu, bualu buende mbupite!

¹¹ Ambulayi bia mvita bionsu bidi Mvidi Mukulu unupa, bua numone mua kutuila diabolu, udi unuluisha ne budimu, nkanana.

¹² Bualu katuena tuluangana mvita ne bantu, kadi amu ne makole mabi a mulu adi kaayi amueneka, kabidi ne mamfumu makuabu mashilangane, adi alama buloba mu midima.

¹³ Nanku ambulayi bia mvita bionsu bia kudi Mvidi Mukulu. Pafika dituku dibi, nenumone mua kutuila muluishi wenu nkanana. Nenushale bimane kulu, too ne munuamutshimuna.

¹⁴ Nanku, dilongololayi: suikayi bulelela bu mukaba mu tshimonu. Vualayi buakane bu kazaku ka mvita kela pambidi.

¹⁵ Bu muntu udi uvuala bisabata bua kuya ku luendu, ikalayi ne disuminyina bua kuya kulongesha Lumu lua Disanka, ludi lufila bupole.

¹⁶ Ikalayi ne ditaba, bu mudi muena mvita ne ngabu mu bianza, bua kuakidila mikete misuika kapia ya kudi diabolu, kuyela panshi.

¹⁷ Tshienu tshifulu tshinudi nuasa, ke dijadika dia ne: netupande. Muaku wa Mvidi Mukulu, ke muele wa mvita udi Mueyelu wa Tshijila unuteka mu bianza.

¹⁸ Kanupu muoyi bua kutendelela Mvidi Mukulu. Nulombe bua anuambuluishe. Tendelelayi diba dionsu mudi Mueyelu wa Tshijila unusaka. Tabalayi, lombelayi bantu bonsu ba Mvidi Mukulu, kanuyi nulekela.

¹⁹ Nundombele ne meme kabidi, bua Mvidi Mukulu ampeshe miaku mimpe mukana, misangu yonsu indi ne bua kuakula. Nanku nemmanyishe bualu busokome bua Lumu lua Disanka ne muoyi mushindame.

²⁰ Nansha mundi mu lukanu amu mpindiewu, mbantume amu bua kumanyisha Lumu lua Disanka alu. Nanku lombayi bua ndongeshe Lumu elu ne muoyi umue, amu mudibu bamfundile bua kuenza.

Diela dia muoyi

²¹ Tishike muanetu munanga, udi ukuatshila netu Mfumu mudimu ne muoyi umue, neanuambile malu onsu adi antangila, bua numanye munkadi mpindiewu.

²² Ke pandi nnutuminaye lukasa, nangananga bua anumanyishe mutudi, kabidi bua anukoleshe ku muoyi.

²³ Mvidi Mukulu Tatu ne Mfumu Yezu Kristu bapeshe bana hetu bonsu bupole, dinanga, ne ditaba.

²⁴ Dinanga dia Mvidi Mukulu dikale munda mua bonsu badi bananga Mfumu wetu Yezu Kristu, dibafikisha ku muoyi wa kashidi.