Efeze 5 - MUKANDA WA MYIDI MUKULU

Kuenda mu butoke bua Kristu

¹ Nudi bana badi Mvidi Mukulu munange. Nanku nudibambe bua kuikala bu Yeye.

² Nulonde njila wa dinanga. Vulukayi muvua Kristu mutunange, mudifile bualu buetu, bu mulambu wa dipembu dimpe, uvua usankisha Mvidi Mukulu.

³ Nuenu nudi bena tshisamba tshia Mvidi Mukulu. Nanku munkatshi muenu kabatedi, nansha amu kutela mene, buendenda, buenzavi, nansha lukuka lua biuma.

⁴ Buakulavi, miaku ya bupale, nansha bilele bibi, kabiumvuiki kunudi. Mukana muenu mupatuke amu miaku ya kuela nayi Mvidi Mukulu tuasakidila.

⁵ Numanye bimpe ne: bena buendenda, bena buenzavi, nansha bena bukonkotu, kabena mua kubuela mu Bukalenga bua Kristu, ne bua Mvidi Mukulu. (Nansha muena bukonkotu udi amu muntu udi utendelela mvidie).

⁶ Muntu kanudingi ne miaku ya bupote. Mvidi Mukulu neanyoke bantu badi benza malu mabi a nenku, babenga kumutumikila.

⁷ Kanubuelakanyi ne bantu ba nanku nansha.

⁸ Kale nuvua mu midima. Mpindiewu nudi mu butoke, bualu nudi badisange ne Mfumu. Enzayi malu adi bantu badi benda mu butoke ne bua kuenza.

⁹ Bualu amu ku butoke, ke kudi kupatuka bulenga, buakane, ne bulelela, bua mishindu yonsu.

¹⁰ Nuenze muenu muonsu bua kujingulula bidi bisankisha Mfumu.

¹¹ Kanubuelakanyi ne bantu badi benza malu mabi a patupu a mu midima. Kadi nuabenge patoke.

¹² (Bidi bienza bundu mene bua kuamba malu adi bantu abu benza mu musokoku.)

¹³ Diba dialejabu malu onsu aa patoke, adi amueneka amu mudiwu.

¹⁴ Bualu bidibu basokolola patoke, bidi bienza butoke. Ke mudibu bamba ne: “Wewe udi mulale, tabala, juka ku bafue. Kristu neakuludike mu butoke buende.

¹⁵ Kanuenji malu bu bantu batatakane. Nuikale bantu ba meji.

¹⁶ Enzayi bimpe mu malu onsu adi anuenzekela. Bualu matuku atudi mmabi.

¹⁷ Nanku kanuikadi bantu bapote. Kadi nukebe mua kujingulula tshidi Mfumu musue bua nuenze.

¹⁸ Kanukuatshiki maluvu. Bualu bunuavi budi bunufikisha anu ku buenzavi. Kadi ikalayi ne Mueyelu wa Tshijila munda muenu tente.

¹⁹ Nukoleshangane ku muoyi, nuimbilangane misambu, miyenga ne tusala, mudi Mueyelu unusaka bua kuimba. Imbayi, elayi Mfumu tuasakidila ne muoyi wenu mujima.

²⁰ Mu dina dia Mfumu wetu Yezu Kristu, elayi Mvidi Mukulu Tatu tuasakidila diba dionsu, ne bua malu onsu.

Bena dibaka bumvuangane

²¹ Bu munudi nunemeka Mfumu, nutumikilangane.

²² Bakaji, nutumikile babayenu. Ke munudi nuleja munudi nutumikila Mfumu.

²³ Bualu mulume udi mfumu wa mukajende, mudi Kristu Mfumu wa Tshisumbu tshia bena ditaba. Kristu udi Musungidi wa Tshisumbu etshi, tshidi mubidi wende.

²⁴ Nanku bakaji batumikile babayabu mu malu onsu, anu bu mudi Tshisumbu tshia bena ditaba tshitumikila Kristu.

²⁵ Balume, nangayi bakaji benu, muvua Kristu munange Tshisumbu tshia bena ditaba, mudifile bualu buatshi.

²⁶ Uvua muenze nanku bua tshikale Tshisumbu tshia bantu menemene ba Mvidi Mukulu. Uvua mutshisukule, mutshitue mu mayi, muambe muaku.

²⁷ Bualu uvua musue kudiangatshila Tshisumbu etshi ne bulenga buonsu. Kavua musue bua tshikale ne dinyanu, nansha ne kalema, nansha ne mutudi. Uvua mujinge bua tshikale tshia tshijila, tshiakane tshipuangane.

²⁸ Nanku balume badi ne bua kunanga bakaji babu, bu mudibu bananga mubidi wabu. Muntu udi munange mukajende, mmudinange yeye mene.

²⁹ Bualu muntu kena mua kukina mubidi wende. Kadi udi uudisha, uulama bimpe. Ke mudi Kristu wenzela Tshisumbu tshia bena ditaba,

³⁰ bualu tudi bidimba bia mubidi wende.

³¹ Mukanda wa tshijila udi wamba ne: “Ke mudi mulume ne bua kushiya tatuende ne mamuende, bua kulamata mukajende. Bubidi buabu nebenze tshintu tshimue.”

³² Miaku eyi idi itumanyisha bualu busokome bupite bunene. Ndi mumone ne: bualu ebu budi butangila Kristu ne Tshisumbu tshia bena ditaba.

³³ Kadi budi bunutangila ne nuenu kabidi. Nanku mulume yonsu anange mukajende bu mudiye mudinange. Mukaji yonsu anemeke bayende.