Efeze 3 - MUKANDA WA MYIDI MUKULU

Mudimu udi Polu ukuatshila bantu ba bisamba bikuabu

¹ Ke pandi meme Polu ntendelela Mvidi Mukulu bualu buenu. mBankuate mu lukanu, bualu ndi nkuatshila Yezu Kristu mudimu. Makenga onsu aa ndi ngumvua bualu buenu.

² Bushuwa, nukadi bumvue bamba bua mudimu uvua Mvidi Mukulu mungimikile ku luse luende, bua meme kunuenzela.

³ Malu masokome andi munufundile mu tshikosu kulu eku, amu Mvidi Mukulu nkayende ke uvua muammanyishe.

⁴ Nuenu baabale, nudi mua kujingulula mundi mupete lungenyi lua kumvua nalu bualu busokome budi butangila Kristu.

⁵ Bualu busokome ebu, Mvidi Mukulu kavua mubumanyishe bantu ba bikondu bia kale to. Kadi mpindiewu kudi Mueyelu wende mmubumanyishe patoke bapostolu ba tshijila, ne bambi bende.

⁶ Bualu busokome ebu budi nenku: ku bukole bua Lumu lua Disanka, bantu ba bisamba bikuabu nebapete pamue ne bena Yuda bilenga bidi Mvidi Mukulu mulamine bantu bende. Bonsu badi bidimba bia mubidi umue. Nebapete bonsu pamue bidi Mvidi Mukulu utulaya munda mua Yezu Kristu.

⁷ Ndi nkuata mudimu bua kutantshisha Lumu lua Disanka, anu ku luse lua Mvidi Mukulu patupu, ne ku bukole budiye mumpeshe.

⁸ Meme ndi mushadile ku bantu bonsu badi bitaba Mvidi Mukulu. Kadi Mvidi Mukulu uvua muntutshishe diakalenga edi: bua mmanyishe bantu ba bisamba bikuabu Lumu lua Disanka lua bubanji bupite butudi tupeta kudi Kristu.

⁹ Ndi mua kuambuluisha bantu bonsu, bua bajingulule mudi meji masokome a Mvidi Mukulu mua kukumbana. Kuonsu eku Mvidi Mukulu, Mufuki wa bionsu, uvua musokoke meji ende.

¹⁰ Kadi mpindiewu, Tshisumbu tshia bena ditaba tshidi tshimanyisha mamfumu ne makole a mulu, meji a mishindu ne mishindu adi Mvidi Mukulu nawu.

¹¹ Mvidi Mukulu uvua muenze nanku, bilondeshile meji ende a kashidi, avuaye mukumbajile kudi Yezu Kristu Mfumu wetu.

¹² Pamue ne Kristu, utudi tuitaba, tudi mua kusemena kudi Mvidi Mukulu, kumutekemena muetu muonsu.

¹³ Ke pandi nnulomba bua kanuteketshi mu maboku, bua mabika ne mala andi mmona bualu buenu. Neanupeteshe diakalenga ne lumu.

Kristu udi utunanga

¹⁴ Ke pandi ntuila Mvidi Mukulu Tatu binu.

¹⁵ Diku dionsu didi mu diulu ne didi pa buloba didi dipetela muoyi kudiye.

¹⁶ Ndi mmulomba se: anukankamike, bilondeshile buneme bua butumbi buende, anukoleshilemu munda muenu kudi Mueyelu wende.

¹⁷ Ndi mmulomba kabidi bua Kristu ikale mu mioyi yenu ku ditaba, bua nuase miji mu dinanga, nushindamemu.

¹⁸ Nanku nenumone mua kujingulula, pamue ne bantu bonsu ba Mvidi Mukulu, bule ne butshiama, butumbuke ne bondoke bua dinanga dia Kristu.

¹⁹ Bushuwa, muntu nansha umue kena mua kujingulula dinanga didi Kristu utunanga nadi mu bujima buadi. Kadi ndi njinga bua numanye dinanga adi, bua bukole bua Mvidi Mukulu buwule tente munda muenu.

²⁰ Mvidi Mukulu udi ne bukole bua kuenza bipite ne bitudi tulomba, nansha ne bitudi tuelela meji. Bualu, bukole budiye ukuata nabu mudimu munda muetu mbupite.

²¹ Atumbe mu Tshisumbu tshia bena ditaba, ne mu Yezu Kristu, mu bikondu bionsu, kashidi ne kashidi! Amene.