Efeze 1 - MUKANDA WA MYIDI MUKULU

Diela dia muoyi

¹ Meme Polu, uvua Mvidi Mukulu mubikile, bua ngikale mupostolu, ndi mfundila bantu ba Mvidi Mukulu badi mu Efeze, bavua badisange ne Yezu Kristu mu ditaba, mukanda ewu.

² Dinanga ne bupole bia kudi Mvidi Mukulu, Tatu wetu, ne bia kudi Yezu Kristu, Mfumu wetu, bishindame munda muenu.

Malu mimpe adi Mvidi Mukulu utuenzela mu Yezu Kristu

³ Tutumbishayi Mvidi Mukulu, Tatu wa Mfumu wetu Yezu Kristu, tumuele tuasakidila! Bualu mmutuele lupemba mu Yezu Kristu, mmutupeshe kudiye mapa onsu a mu diulu.

⁴ Mvidi Mukulu ukavua mutunange, kayi muanji kufuka buloba. Ukavua mutusungule bua tuikale bende mu Kristu, tuikale ba tshijila, katuyi ne kalema kumpala kuende. Bu muvua Mvidi Mukulu mutunange,

⁵ uvua mudianze kujadika nkayende bua kutuenza bana bende mu Yezu Kristu. Ke tshivuaye musue, kabidi ke bivua bimulengelela.

⁶ Nanku tutumbishayi Mvidi Mukulu bua ditunanga diende dia dikema, divuaye mutulejile bimpe bitambe mu Muanende munanga.

⁷ Mvidi Mukulu mmutupikule ku bubi, mmutujimijile mibi yetu yonsu ku mulambu wa lufu lua Yezu Kristu. Ke muvuaye mutuleje ditunanga diende dia dikema.

⁸ Uvua mutunange bikole. Ke muvuaye mutupeshe lungenyi ne meji, bua tujingulule bidiye wenza.

⁹ Bivuaye wipatshila bitshivua bisokome. Kadi mmutumanyishebi, mumane kujadika nkayende bua kubikumbaja mu Kristu.

¹⁰ Neabikumbaje ku nshikidilu wa bidimu. Neasangishe bionsu bidi mu diulu ne bidi pa buloba. Neabiteke ku bukalenga bua Mfumu umue epele, Kristu.

¹¹ Munda mua Kristu, tudi bafike muaba wa lupandu. Mvidi Mukulu mmudianze kutusungula muvuaye musue. Bualu Mvidi Mukulu udi ukumbaja bionsu, amu muvuaye mubijadike, mujinge kabidi ne: bikale nanku.

¹² Nanku tutumbishayi Mvidi Mukulu bua buneme buende, bualu tuetu ke bavua badianza kutekemena kudi Kristu!

¹³ Nuenu kabidi diba dinuvua bumvue muaku mulelela, Lumu lua Disanka ludi lunupetesha lupandu, nuvua bitabe Kristu. Diba adi Mvidi Mukulu uvua munupe Mueyelu wende uvuaye mulaye, munutue tshitampi tshiende, bua kunuleja munudi bantu bende menemene.

¹⁴ Mueyelu wa Tshijila udi utujadikila ne: netupete bionsu bidi Mvidi Mukulu mulaye bantu badi bende. Udi utushindikila kabidi ne: Mvidi Mukulu neatupikule, bua tuikale bende menemene. Nanku tutumbishayi Mvidi Mukulu bua buneme buende.

Polu udi utendelela Mvidi Mukulu

¹⁵ Bua bionsu ebi, nangananga kabidi bua pandi ngumvua batela munudi bitabe Mfumu Yezu, munudi banange kabidi bantu bonsu ba Mvidi Mukulu,

¹⁶ ndi ngela Mvidi Mukulu tuasakidila diba dionsu bualu buenu. Ndi nnuvuluka misangu yonsu indi ntendelela.

¹⁷ Ndi ndomba kudi Mvidi Mukulu wa Mfumu wetu Yezu Kristu, Tatu wa butumbi, bua anupe Mueyelu wende. Wowu neunuenze bantu ba meji, unumanyishe Mvidi Mukulu, bua numujingulule bimpe.

¹⁸ Ndi ndomba Mvidi Mukulu bua atokeshe lungenyi luenu, bua numanye tshinudi mua kutekemena kudi Mvidi Mukulu, bu mudiye munubikidile. Nanku nenumanye biuma bilenga bidiye mulamine bantu bende.

¹⁹ Nenumanye kabidi bukole busunguluke budiye utuambuluisha nabu, tuetu badi bamuitaba. Bobu mene ke buvuaye muleje muende muonsu,

²⁰ pavuaye mubishe Kristu ku lufu, mumuzangike mu nkuasa wa bumfumu mu diulu ku dia bukole diende.

²¹ Muamua Kristu udi ku mutu kua makole onsu adi kaayi amueneka, kabidi ku mutu kua mamfumu onsu mashilangane. Nansha lelu, nansha matuku adi kumpala, kakuena bumfumu nansha bumue budi kabuyi ku diyi diende.

²² Mvidi Mukulu mmuteke bionsu ku makasa a Kristu. mMumuteke kabidi Mfumu munene wa Tshisumbu tshia bena ditaba.

²³ Tshisumbu tshia bena ditaba, ke mubidi wa Kristu. Kristu, udi munda mua bionsu, udi ukuata kabidi mudimu munda mua Tshisumbu atshi ne bukole buende buonsu.