Ebrewu 9 - MUKANDA WA MYIDI MUKULU

Kutendelela pa buloba ne kutendelela mu diulu

¹ Ndondu wa kumpala uvua ne mikenji milongolola bua kutendelela Mvidi Mukulu, uvua kabidi ne nzubu wa Mvidi Mukulu wa pa buloba.

² Bavua base ntenta. Ntenta awu uvua wa kumpala, uvuabu babikila ne: mmuaba wa tshijila. Munda muende muvua tshitekelu tshia miendu, mesa avua ne mampa avuabu balambula Mvidi Mukulu.

³ Pashishe kunyima kua tshilamba tshibidi tshivua tshilembeleja, kuvua ntenta mukuabu uvuabu babikila ne: mmuaba wa tshijila menemene.

⁴ Muaba awu uvua tshilambuilu tshienza ne tshiamu tshia mpawungi tshivuabu boshela musenga wa manananshi. Muvua kabidi mushete wa ndondu mulamika mpawungi mubidi mujima. Munda mua mushete muvua dibungu dia mpawungi dikale ne mana, dikombu dia Arone disase bilongu, ne mabue avuabu bafundile mikenji ya ndondu.

⁵ Pa mutu pa mushete pavua Basherubine ba lumu, bavua baleja mpala wa Mvidi Mukulu. Mapuapua abu avua mabuikile muaba udibu bajimijila bantu mibi yabu. Kadi edi ki ndiba dia tuetu kuakula malu aa onsu ku bumue ku bumue nansha.

⁶ Bamane kulongolola bintu bionsu ebi, batuangaji badi babuela ku dituku ku dituku mu ntenta wa kumpala bua kuenza mudimu wabu.

⁷ Kadi amu mutuangaji munene nkayende ke udi ubuela mu ntenta muibidi. Udi ubuelamu amu musangu umue ku tshidimu. Udi uyamu ne mashi a nyama udiye ulambula Mvidi Mukulu bua mibi yende ne bua mibi idi bantu benze mu mpukapuka.

⁸ Nenku, Mueyelu wa Tshijila udi uleja ne: patshidi ntenta wa tshijila muikaleku, kabena banji kunzulula njila wa kubuela muaba wa tshijila menemene.

⁹ Atshi ntshimfuanyi tshidi tshiumvuija malu a mu tshikondu tshitudi etshi. Tshidi tshileja ne: malambi ne milambu ya nyama ya kuosha bidibu balambula Mvidi Mukulu kabiena mua kufikisha muoyi wa muntu udi utendelela Mvidi Mukulu ku bujima buawu.

¹⁰ Ebi bidi amu mikenji ya bantu idi itangila biakudia, bia kunua, kabidi ne bibidilu bishilangane bia kudikobolola nabi. Mikenji eyi idi ne mudimu amu too ne ku diba didi Mvidi Mukulu ulongolola malu onsu tshiakabidi.

¹¹ Kadi Kristu mmufike bu mutuangaji munene wa bintu bitukadi nabi mpindiewu. Ntenta udiye wenzela mudimu, mmupite wa kumpala bua mushinga, kabidi udi mulenga tshishiki. Kabavua bamuasa kudi bantu. Mbuena kuamba ne: kena wa pa buloba ebu budibu bafuke nansha.

¹² Pavua Kristu mubuele muaba wa tshijila menemene musangu umue bua kashidi, kavua mulambule mashi a mbuji ya mpumbu, nansha a bana ba ngombe. Uvua mulambule mashi ende nkayende, mutupetele lupandu lua tshiendelele.

¹³ Mashi a mbuji ya mpumbu, ne a ngombe milume ne butu bua ngombe mukaji moshe, bidibu bamiamina pambidi pa bantu badi ne mikiya, bidi bibumusha mikiya ayi pambidi.

¹⁴ Pikalabi nanku, kadi mashi a Kristu neikale ne bukole kaayi? Neikale ne bukole bupite. Ku bukole bua Mueyelu wa tshiendelele, uvua mudilambule nkayende kudi Mvidi Mukulu bu mulambu kauyi kalema. Nanku mashi ende neumushe mu muoyi wetu malu onsu a tshianana, bua tumone mua kuenzela Mvidi Mukulu wa muoyi mudimu.

¹⁵ Ke padi Kristu mutuangaji bua ndondu mupiamupia, bua badi Mvidi Mukulu mubikile bapete bilenga bia kashidi bivuaye mulaye bantu bende. Badi mua kubipeta, bualu muntu mumane kufila. Ku lufu luende elu, mutupikule bantu ku bilema bivuabu benze, patshivuabu mu tshikondu tshia ndondu wa kumpala.

¹⁶ Muaba uvuabu bambe diyi dia ndekelu mbimpe bajadike ne: uvua mudiambe mmumane kufua.

¹⁷ Bualu diyi dia ndekelu kadiena ne mushinga padi muenadi mutshikale ne muoyi. Diyi adi didi ne mushinga amu padi muenadi mumane kufua.

¹⁸ Ke pavua ndondu wa kumpala kabidi kayi ne bukole, mashi kaayi manji kumata panshi.

¹⁹ Diambedi, Moshe uvua muambile bantu meyi ne mikandu bionsu, mudiye mubifunde mu mukanda wa mikenji. Pashishe kuangataye mashi a bana ba ngombe, kabidi ne mayi, ditamba dia mutshi wa nsompu pamue ne buanda bukunze, kumiaminaye mashi pa mukanda wa mikenji, kabidi pa mitu ya bantu bonsu.

²⁰ Uvua wamba ne: “Etshi mmashi adi ajadika ndondu udi Mvidi Mukulu unutumina diyi bua munulaye.

²¹ Pashishe Moshe kumiamina kabidi mashi ku ntenta ne ku bintu bionsu bivuabu benze nabi mudimu wa kutendelela.

²² Bu mudi mikenji yamba, badi bumusha mikiya ku bintu bu bionsu amu ne mashi. Badi bajimija mibi amu padi mashi amata panshi.

Mulambu wa Kristu udi ujimija mibi

²³ Pikalabu balengeja bimfuanyi bia malu a mu diulu, ku ditendelela dia malu a mushindu ewu, kadi malu malelela mene a mu diulu awu, adi akengela milambu mipite buimpe.

²⁴ Bualu Kristu kena mubuele muaba wa tshijila muasa kudi bantu, uvua amu tshimfuanyi tshia muaba mulelela. Kadi mmubuele mu diulu menemene, mudiye udileja kumpala kua Mvidi Mukulu bualu buetu.

²⁵ Mutuangaji munene wa bena Yuda udi ubuela muaba wa tshijila ku tshidimu ku tshidimu ne mashi a nyama ya milambu. Kadi Kristu kavua mubuele bua kudilambula misangu ya bungi nansha.

²⁶ Patupu, uvua mua kumvua makenga misangu ya bungi katshia bafuke buloba. Kadi Kristu mmumueneke mpindiewu, matuku a ku nshikidilu musangu amu umue bua kudilambula bu mulambu wa kujimija bubi.

²⁷ Muntu yonsu udi ne bua kufua musangu umue. Kunyima kua lufu, Mvidi Mukulu neamulumbuluishe.

²⁸ Ke muvuabu balambula Kristu musangu umue bua kujimija mibi ya bantu ba bungi. Neamueneke musangu muibidi, ki mbua kujimija mibi, kadi mbua kusungila badi bamuindila.