Ebrewu 12 - MUKANDA WA MYIDI MUKULU

Mvidi Mukulu, Tatu wetu

¹ Tuetu kabidi, badi batunyunguluka kudi tshisumbu tshinene etshi tshia badi bitabe Mvidi Mukulu. Nenku tumbushayi malu onsu adi atupumbisha mua kutungunuka. Tulekele mibi idi itukuata lukasa. Tunyemene ne muoyi mushindame mu njila udibu batuleja.

² Tutangile Yezu, mfuki wa ditaba dietu, udi mua kudifikisha kabidi ku bujima buadi. Bua kupeta disanka divuabu bamulamine, kuitabaye bua bamushipe ku mutshi mutshiamakane, kayi umvua bundu bua lufu lua mushindu ewu. Mpindiewu udi musombe ku dia balume dia nkuasa wa butumbi wa Mvidi Mukulu.

³ Elanganayi meji kudiye, muvuaye muanyishe bua benji ba malu mabi bamubenge bibi nanku. Nanku kanujimiji ditekemena, kanutekeshi mu maboku.

⁴ Bualu nudi nuluisha mibi, kadi kanuena banji kuluangana too ne ku lufu.

⁵ Nukadi bapue muoyi, miaku idi Mvidi Mukulu unukolesha nuenu bana bende, nayi ku muoyi anyi? “Muananyi kupetudi dinyoka didi Maweja-Nangila ukubela nadi. Kuteketshi mu maboku padiye ukutandisha.

⁶ Bualu Maweja-Nangila udi unyoka udiye munange, udi ukuma muntu yonsu udiye wakidila bu muanende.”

⁷ Numvue makenga enu ne lutulu bualu ke adi anulongesha malu. Bualu makenga aa adi ajadika ne: Mvidi Mukulu udi unuenzela bu bana bende. Kudi muana udi tatuende kayi unyoka anyi?

⁸ Pikalabu kabayi banunyoka mudibu banyoka bana bonsu, nenku kanuena bana bende menemene to, kadi nudi bana ba kunga.

⁹ Tuvuluke batatuetu ba pa buloba! Bavua batunyoka, tuetu kubanemeka. Nenku tudi ne bua kutumikila Tatu wetu wa mu diulu bipitshidile, bua tuikale ne muoyi.

¹⁰ Batatuetu ba pa buloba bavua batunyoka bua tshitupa tshipi, muvuabu bamone ne ke bidi bimpe. Kadi Mvidi Mukulu udi utunyoka bua kutuenzela bimpe, bua tuikale ba tshijila bu Yeye.

¹¹ Diba didibu batunyoka, tudi dibungama, katuena tusanka to. Kadi kunyima, bavuabu banyoka balengeja nanku, badi bakuama bimuma bia ditalala, ne bia malu mimpe.

Mibelu

¹² Nenku bandishayi bianza bienu bidi bipungile, koleshayi mikolu yenu idi mitekete!

¹³ Endayi mu njila milulame bua dikasa didi ditebuka kadikoyoboki, kadi disangale.

¹⁴ Nudikolele bua numvuangane bimpe ne bantu bonsu. Nuikale bantu ba tshijila. Bualu kanuyi nuenza nanku, kanuena mua kumona Mfumu to.

¹⁵ Dimukayi bua muntu kabengi dinanga didi Mvidi Mukulu ununanga nadi. Muntu nansha umue kadienji bu mutshi wa bululu udi utoloka, ulewula bantu ba bungi ne lulengu luawu.

¹⁶ Muntu nansha umue kikadi muena malu a bundu, nansha munyangi wabintu bia tshijila, bu muvua Esawu mupane bukulu buende ku dilongu amu dimue dia biakudia.

¹⁷ Nudi bamanye ne: kunyima kua matuku, pavuaye musue bua tatuende amuele lupemba, bakamubenga. Bualu kavua mupete mushindu wa kukudimuna malu avuaye muenze, nansha muvuaye ulomba ne binsonji ku mesu.

¹⁸ Nuenu kanuena basemena bu bena Izrayele pabuipi ne mukuna udibu mua kulenga. Kanuena bamone kapia kakole, bufike ne miidima, tshipepele tshikole.

¹⁹ Kanuena bumvue muadi wa mpungi nansha tshiona tshia diyi. Pavua bena Izrayele bumvua diyi edi, bavua balomba bua kababambidi kabidi malu.

²⁰ Bualu batua batshina bikole mukenji wa ne: “Muntu yonsu walenga mukuna, nansha nyama mene, nebamuase mabue, bamushipe.”

²¹ Bualu buvuabu bamone buvua bubakuatshisha bowa bikole bipite. Ke mutua Moshe muambe ne: “Ndi nzakala, bualu ndi ne bowa bua bungi.”

²² Kadi nuenu nudi basemena pabuipi ne mukuna wa Siyone, kabidi ne tshimenga tshia Mvidi Mukulu wa muoyi, ke Yerushalayime wa mu diulu, muaba udi batumibue ba Mvidi Mukulu binunu ne binunu.

²³ Nudi basemena pabuipi ne tshisangilu tshia tshibilu tshia banabute ba Mvidi Mukulu badi ne mena abu mafunda mulu. Nudi basemena pabuipi ne Mvidi Mukulu, mulumbuluishi wa bantu bonsu. Nudi basemena pabuipi ne mieyelu ya bantu batata benze bidi Mvidi Mukulu musue, bafike ku bujima buabu.

²⁴ Nudi basemena pabuipi ne Yezu, mutuangaji wa ndondu mupiamupia, kabidi pabuipi ne mashi ende atota mamate panshi, adi akula ne diyi dipite dia Ebele.

²⁵ Nanku nudimuke! Kanubengi kuteleja udi wakula nenu. Bantu bavua babenga kuteleja muntu uvua ubabela pa buloba mu dina dia Mvidi Mukulu, batata bapete dinyoka. Nanku tuetu nangananga nebatunyoke patudi tubenga udi utuambila diyi didi difume mulu.

²⁶ Diba adi, diyi diende divua dizakaje buloba. Kadi mpindiewu udi utulaya ne: “Nenzakeje musangu wa ndekelu, ki anu buloba nkayabu, kadi ne diulu kabidi.”

²⁷ Miaku eyi: “Musangu wa ndekelu,” idi ileja ne: bintu bidibu bafuke nebizakale, bijimine, bua tshidi katshiyi tshizakala tshishale kashidi.

²⁸ Nenku tuele Mvidi Mukulu tuasakidila, bualu tudi tupeta bukalenga budi kabuyi buzakala. Tumuele tuasakidila pa kuenzela Mvidi Mukulu mudimu udi umusankisha. Tumutumikile, tumutshine.

²⁹ Bualu Mvidi Mukulu wetu udi kapia kadi kubutula.