Dielulula 6 - MUKANDA WA MYIDI MUKULU

“Unange Maweja-Nangila Mvidi Mukulu webe”

¹ Telejayi meyi ne mikenji, bidi Maweja-Nangila Mvidi Mukulu wenu mungambile bua kunulongesha, bua nubikumbaje mu ditunga dinukadi pa kubuela bua kudikuata mpindiewu.

² Nanku nuenu ne ndelanganyi yenu, nenunemeke Maweja-Nangila Mvidi Mukulu wenu, panutshidi ne muoyi. Nenutumikile meyi ne mikenji biende bimvua munumanyishe. Nenushale ne muoyi matuku a bungi panu.

³ Nuenu bena Izrayele, nulame mikenji eyi bimpe, nuyikumbaje. Neyinupeteshe diakalenga. Nenutante mu ditunga didi ne biakudia bia bungi, bu muvua Maweja-Nangila Mvidi Mukulu wa bankambua benu munulaye.

⁴ “Nuenu bena Izrayele, telejayi: Maweja-Nangila, Maweja-Nangila nkayende, ke Mvidi Mukulu wetu. Kakuena mukuabu to.

⁵ Nunange Maweja-Nangila Mvidi Mukulu wenu, ne muoyi wenu mujima, ne mutshima wenu onsu, ne bukole buenu buonsu.

⁶ Mikenji ya Mvidi Mukulu indi nnuambila lelu eyi, nushale bayilame kashidi mu mioyi yenu.

⁷ Nuyilongeshe bana benu, nuyitele panudi basomba mu nzubu yenu, nansha bendakana mu misesu, panudi nulala, nansha nubika.

⁸ Bua nuenu kuvuluka mikenji eyi kashidi, nuyisuike ku maboku enu ne mu mpala yenu.

⁹ Nuyifunde kabidi ne ku biibi bia bimenga bienu, ne ku mishiku ya mbelu ya nzubu yenu.”

Bena Izrayele bavuluke Mvidi Mukulu wabu

¹⁰ Panuafika mu ditunga, didi Maweja-Nangila Mvidi Mukulu wenu unupesha, nuwuaye mulaye bankambua benu, Abrahame, Izake ne Yakobe, nenusangane bimenga bimpe, binene, binuvua kanuyi bibake to.

¹¹ Nenusangane kabidi nzubu miuwule tente ne bintu bia bubanji binuvua kanuyi bunguije, biina bia mayi binuvua kanuyi bumbule, mitshi ya mvinyo ne ya olive inuvua kanuyi bakune. Nenuikale ne biakudia bipite bungi.

¹² Diba adi, mwuluke Maweja-Nangila, Mvidi Mukulu wenu, uvua munupatule mu Ejipitu mumwuamu bupika. Kanuena mua kumupua muoyi to.

¹³ Numunemeke, numutendelele amu yeye nkayende. Nutshipe amu mu dina diende.

¹⁴ Kadi kanukukuidi mvidie mikuabu, mvidie ya bisamba binudi nabi mutumba.

¹⁵ Bualu Maweja-Nangila, Mvidi Mukulu wenu, udi munkatshi muenu. Mmusue kuikala amu Mvidi Mukulu nkayende. Kanumufikishi munda to, bualu udi mua kunubutula, kunumusha panu.

¹⁶ Kanutetshi Maweja-Nangila Mvidi Mukulu wenu, bu munuvua bamuenzele ku Masa.

¹⁷ Nuitabe ku meyi, nukumbaje mikenji yende, bivuaye munuambile.

¹⁸ Nusankishe Maweja-Nangila, nuenze bidi bimulengelela. Nanku nenuikale bena diakalenga, nenukuate ditunga dimpe, divua Maweja-Nangila mulaye bankambua benu.

¹⁹ Nenuipatemu baluishi benu, bu muvua Maweja-Nangila mumane kuamba.

²⁰ Dituku dikuabu, padi bana benu banukonka ne: “Maweja-Nangila, Mvidi Mukulu wetu, mmunuelele meyi ne mikenji ebi bua tshinyi?”

²¹ Nenubandamune ne: “Tuvua ku bupika kua mukalenga wa bena Ejipitu. Maweja-Nangila kutupatula mu ditunga adi ku bukole buende.

²² Tuvua badimuene bishima binene ne bia dikema, bivua Maweja-Nangila mukengeshe nabi mukalenga awu, diku diende ne bantu bende bonsu.

²³ Kutupatulaye mu Ejipitu bua kutufikisha mu ditunga edi, divuaye musue kutupa, bu nuwuaye mulaye bankambua betu.

²⁴ Ke Maweja-Nangila kutuambila bua tukumbaje meyi ne mikenji biende bionsu. Patudi tumunemeka, netuikale bena diakalenga diba dionsu, netushale ne muoyi, bu mutudi nawu mpindiewu.

²⁵ Eyowa, patuikala bakumbaje bimpe mikenji yonsu ivua Maweja-Nangila mutuambile, netuenze anu bidiye musue.”