Dielulula 5 - MUKANDA WA MYIDI MUKULU

Mikenji dikumi

¹ Moshe kubikila bena Izrayele bonsu, kubambila ne: — Bena Izrayele, telejayi meyi ne mikenji, bindi nnuambila lelu. Nubilonge, nubikumbaje.

² Maweja-Nangila Mvidi Mukulu wetu, uvua mutue netu ndondu mu mukuna wa Sinayi.

³ Ndondu awu, kavua mutue anu ne bakakuetu to. Uvua mumutue kabidi ne tuetu bonsu, batshidi ne muoyi lelu aba.

⁴ Nanku Maweja-Nangila uvua wakula, mutangilangane nenu, ku mukuna, munkatshi mua kapia.

⁵ Musangu awu, meme Moshe mvua muimane pankatshi penu ne Maweja-Nangila, bua kunumanyisha bionsu bivuaye wamba. Kanuvua basue kubanda ku mukuna to, bualu nuvua nutshina kapia aku. Ke Maweja-Nangila kunuambila ne:

⁶ “Ndi Maweja-Nangila, Mvidi Mukulu wenu, udi munupatule ku bupika mu Ejipitu.

⁷ “Nuntendelele anu meme, kanutendeledi mvidie mikuabu to.

⁸ “Kanusongi lupingu, kanuzodi tshimfuanyi tshidi tshileja tshintu tshidi mu diulu, pa buloba, nansha mu mayi adi muinshi mua buloba.

⁹ Kanukukuidi mpingu ya nanku, kanuyitendeledi. Meme nkayanyi ndi Maweja-Nangila Mvidi Mukulu wenu. Nanku muntu yonsu udi umbenga, ndi mmunyoka too ne ku ndelanganyi yende ya musangu muisatu nansha muinayi.

¹⁰ Kadi bantu badi bannanga meme, bitaba meyi anyi, ndi mbafuila luse too ne ku ndelanganyi tshinunu.

¹¹ “Kanutedi dina dianyi meme Maweja-Nangila Mvidi Mukulu wenu tshitelatela, bualu meme nennyoke muntu yonsu udi kayi unemeka dina dianyi.

¹² “Nuvuluke Dituku dia Dikisha, nudinemeke, bualu ndia tshijila, bu mumvua munuambile.

¹³ Nuenze midimu yonsu amu matuku asambombu, nuyijikije.

¹⁴ Dituku dia muanda mutekete ndia Dikisha, dia kunnemeka anu meme, Maweja-Nangila Mvidi Mukulu wenu. Nanku, nuenu bena Izrayele, bana benu, ngombe yenu, mpunde yenu, bimuna bienu bikuabu, nansha benyi badi ku mbelu yenu, kanuenji mudimu dituku adi. Too ne bena mudimu benu, balume ne bakaji, badi ne bua kuikisha, bu munudi nuikisha nuenu.

¹⁵ Nuenu bena Izrayele mwuluke ne: nuvua ku bupika mu ditunga dia Ejipitu. Meme Maweja-Nangila Mvidi Mukulu wenu kunupatula ku bukole buanyi. Ke pandi nnukandika, bua kanuenji midimu dituku dia Dikisha.

¹⁶ “Muntu yonsu wa kunudi anemeke tatuende ne mamuende, mundi munuambile. Nanku nenuikale bena diakalenga mu ditunga, dindi meme Maweja-Nangila Mvidi Mukulu wenu munupeshe bua nushalemu ne muoyi matuku a bungi.

¹⁷ “Kanushipi muntu.

¹⁸ “Nubenge tshiendenda.

¹⁹ “Kanuibi.

²⁰ “Kanushiminyinyi mukuenu bualu.

²¹ “Kanualakanyi tshintu tshia mukuenu: nansha mukajende, nzubu wende, ngombe wende, madimi ende, mupika wende mulume nansha mukaji, mpunde wende, nansha tshintu tshionsu tshia mu lubanza luende.”

²² Mikenji eyi, ke ivua Maweja-Nangila muakule ne diyi dikole, wambila bena Izrayele ku mukuna wa Sinayi. Uvua ubamanyishayi munkatshi mua kapia ne divuba dia muinshi. Uvua muyifunde pa mabue abidi, avuaye mumpeshe meme Moshe, kayi musakidileku mikenji mikuabu to.

Moshe, mufikishi wa malu a Mvidi Mukulu kudi bantu

²³ Nuenu bumvue diyi adi mu midima ivua ku mukuna utema kapia, bamfumu ne balombodi ba bisamba bienu bia bena Izrayele, kufika kundi,

²⁴ bamba ne: “Maweja-Nangila Mvidi Mukulu wetu, mmumane kutuleja butumbi ne bukole buende. Lelu tuakumumvua wakula munkatshi mua kapia. Nanku tuetu tudi bajadike ne: Mvidi Mukulu udi mua kuakula ne bantu, kabayi bafua to.

²⁵ Kadi katukebi njiwu ya lufu. Bualu kapia aka ka tshinyangu kadi mua kutubutula. Tudi bajadike ne: tuetu bumvue kabidi diyi edi, tudi tufua.

²⁶ Kakuena muntu ukadi mumvue Mvidi Mukulu wa muoyi wakula munkatshi mua kapia, bu mutudi tuetu bena Izrayele bumvue, kushalaye ne muoyi.

²⁷ Nanku wewe Moshe, usemene kudi Maweja-Nangila Mvidi Mukulu wetu, uteleje bionsu bidiye ukuambila, utumanyishabi. Tuetu netubiteleje, tubikumbaje kabidi.”

²⁸ Maweja-Nangila kuitaba majinga enu, kungambila ne: “Dilomba dia bena Izrayele didi dimpe.

²⁹ Kadi bobu balame kashidi muoyi wa kunnemeka, ne wa kukumbaja mikenji yanyi, nebikale bena diakalenga, pamue ne ndelanganyi yabu.

³⁰ Ubambile bapingane ku nzubu yabu ya ntenta.

³¹ Kadi wewe Moshe ushale pabuipi nanyi, bua nkuambile meyi ne mikenji bionsu bia kumanyisha bena Izrayele, bua babikumbaje mu ditunga dindi mbapesha.”

³² Moshe kuambila kabidi bena Izrayele ne: Nanku nukumbaje bionsu bidi Maweja-Nangila Mvidi Mukulu wenu munuambile, anu mudibi amu.

³³ Nuitabe bionsu bidi Maweja-Nangila wenu munuambile, bua nuikale bena diakalenga, nushale ne muoyi matuku a bungi mu ditunga didiye unupesha.